કેન્દ્રીય વિદ્યાલયમાં પ્રવેશ પ્રક્રિયાને પારદર્શક બનાવવા માટે કેન્દ્રની નરેન્દ્ર મોદી સરકારે ક્વોટા સિસ્ટમ નાબૂદ કરી છે. કેન્દ્રીય વિદ્યાલય સંગઠને સુધારા સાથે આ અંગે નવી માર્ગદર્શિકા પણ બહાર પાડી છે. જે ક્વોટા નાબૂદ કરવામાં આવ્યા છે તેમાં સાંસદો, શિક્ષણ મંત્રાલયના અધિકારીઓ, કેન્દ્રીય વિદ્યાલયના નિવૃત્ત કર્મચારીઓ અને શાળા પ્રબંધન સમિતિના અધ્યક્ષ સહિત પ્રવેશ સંબંધિત અડધો ડઝન જેટલા ક્વોટાનો સમાવેશ થાય છે.
કેન્દ્રીય વિદ્યાલયમાં આ ક્વોટામાંથી ભરવાની લગભગ 40 હજાર બેઠકો ફ્રી થઈ ગઈ છે. જેમાં દર વર્ષે સાંસદોની ભલામણ પર લગભગ 8,000 બેઠકો ભરવામાં આવતી હતી. દરેક સાંસદને 10 બેઠકોનો ક્વોટા આપવામાં આવ્યો હતો. ખાસ ક્વોટામાંથી ભરવાની આ બેઠકો શાળાઓમાં નિયત ક્ષમતા ઉપરાંતની હતી. આવી સ્થિતિમાં, વિદ્યાર્થી-શિક્ષકનો ગુણોત્તર અને KVની ગુણવત્તા સહિત અન્ય ઘણા પરિમાણો આ પ્રવેશ પર અસર કરી રહ્યા હતા.
વડાપ્રધાન નરેન્દ્ર મોદીએ આ ક્વોટા પ્રથાને ખતમ કરવાનું કહ્યું હતું. આ પછી, સૌ પ્રથમ, શિક્ષણ પ્રધાને પોતે પોતાનો ક્વોટા સમાપ્ત કર્યો અને કેન્દ્રીય વિદ્યાલય સંગઠનને પ્રવેશ સંબંધિત વિશેષ ક્વોટાની સમીક્ષા કરવા પણ કહ્યું. KVS એ ભૂતકાળમાં ક્વોટા પર પ્રતિબંધ મૂકવાની સાથે આ બાબતની સમીક્ષા કરવાનો નિર્ણય લીધો હતો. પ્રવેશ સંબંધિત વિશેષ ક્વોટાને નાબૂદ કરવાની સાથે, KVS એ મંગળવારે એડમિશન સંબંધિત સુધારેલી માર્ગદર્શિકા પણ જારી કરી હતી.
એવું માનવામાં આવે છે કે આ પહેલ કેન્દ્રીય વિદ્યાલયોની ગુણવત્તામાં સુધારો કરશે. આ સાથે રાષ્ટ્રીય શિક્ષણ નીતિની ભલામણોને લાગુ કરવામાં પણ સરળતા રહેશે. હાલમાં દેશમાં લગભગ 1250 કેન્દ્રીય વિદ્યાલયો છે. તેઓ શિક્ષણ મંત્રાલય દ્વારા સંચાલિત થાય છે. આ શાળાઓ મૂળ સેના, રેલવે વગેરેના લોકો સહિત કેન્દ્રીય કર્મચારીઓ માટે સ્થાપવામાં આવી હતી.
આ પણ વાંચો: કૃષિ પ્રધાન નરેન્દ્ર સિંહ તોમરનો દાવો, ખેડૂતોની 10 ગણી વધી છે આવક
