Mehsana News: મહેસાણા શહેરના નાગલપુર વિસ્તારમાં પકવાન હોટલ સામે ગત રાત્રે સરેઆમ ફાયરિંગની ઘટનાથી સમગ્ર વિસ્તારમાં ચકચાર (Mehsana Firing Bhavesh Jhiliya) મચી ગઈ હતી. ફોર્ચ્યુનર કારમાં જઈ રહેલા ચાણસ્માના ઝીલીયા ગામના ભાવેશ રબારી ઉર્ફે ભાવેશ ઝીલીયા પર સ્કોર્પિયો કારમાં આવેલા શખ્સોએ ફાયરિંગ કર્યું હોવાની ફરિયાદ નોંધાઈ છે. હુમલાખોરોએ પહેલા ભાવેશની ફોર્ચ્યુનર કારને ત્રણથી ચાર વખત ટક્કર મારી હતી અને ત્યારબાદ ફાયરિંગ કરીને ઘટનાસ્થળેથી ફરાર થઈ ગયા હતા. ઘટનાની જાણ થતાં મહેસાણા બી-ડિવિઝન પોલીસનો કાફલો તાત્કાલિક ઘટનાસ્થળે પહોંચ્યો હતો. પોલીસ દ્વારા સમગ્ર વિસ્તારના CCTV ફૂટેજ તપાસવામાં આવી રહ્યા છે અને હુમલાખોરોની ઓળખ તથા ધરપકડ માટે અલગ અલગ ટીમો દ્વારા તપાસ હાથ ધરવામાં આવી છે.

પકવાન હોટલ સામે અચાનક હુમલો

ગત રાત્રે ભાવેશ રબારી ઉર્ફે ભાવેશ ઝીલીયા પોતાની ફોર્ચ્યુનર કાર લઈને નાગલપુર (Nagalpur Firing) વિસ્તારમાં આવેલા પકવાન ડાઇનિંગ હોલ પાસે પસાર થઈ રહ્યા હતા. આ દરમિયાન સફેદ રંગની સ્કોર્પિયો કારમાં આવેલા અજાણ્યા શખ્સોએ તેમની કારનો પીછો કર્યો હતો. સ્કોર્પિયો સવારોએ ભાવેશની ફોર્ચ્યુનર કારને ત્રણથી ચાર વખત જોરદાર ટક્કર મારી હતી. અચાનક બનેલી આ ઘટનાથી આસપાસના લોકોમાં પણ ગભરાટ ફેલાયો હતો.

કારને ટક્કર માર્યા બાદ સ્કોર્પિયોમાં સવાર શખ્સોએ રિવોલ્વર વડે ભાવેશ રબારી પર ફાયરિંગ કર્યું હોવાનો આક્ષેપ છે. ફાયરિંગ કર્યા બાદ હુમલાખોરો સ્કોર્પિયો કાર લઈને ઘટનાસ્થળેથી ફરાર થઈ ગયા હતા. ભાવેશ રબારીએ સમગ્ર બનાવ અંગે મહેસાણા બી-ડિવિઝન પોલીસ મથકમાં અજાણ્યા હુમલાખોરો વિરુદ્ધ ફરિયાદ નોંધાવી છે. ફરિયાદના આધારે પોલીસે ગુનો નોંધી તપાસ શરૂ કરી છે.

Mehsana Firing Bhavesh Jhiliya: CCTV ફૂટેજના આધારે તપાસ

ફાયરિંગની ઘટના જાહેર માર્ગ પર બનતા પોલીસ દ્વારા આસપાસના CCTV કેમેરાના ફૂટેજ મેળવવામાં આવ્યા છે. પોલીસ ટીમો હુમલાખોરો કઈ દિશામાંથી આવ્યા અને ઘટનાને અંજામ આપ્યા બાદ કયા રૂટ પરથી ફરાર થયા તેની તપાસ કરી રહી છે. CTVમાં દેખાતી સ્કોર્પિયો કાર અને તેમાં સવાર શખ્સોની ઓળખ મેળવવા માટે પણ તપાસ તેજ કરવામાં આવી છે.

ભાવેશની કારમાંથી રિવોલ્વર અને કારતૂસ મળ્યાં

ફાયરિંગની ફરિયાદની તપાસ ચાલી રહી હતી ત્યારે પોલીસને ભાવેશ ઝીલીયાની ફોર્ચ્યુનર કારની તપાસ દરમિયાન ચોંકાવનારી વસ્તુઓ મળી આવી હતી. કારમાંથી એક રિવોલ્વર, છ જીવતા કારતૂસ અને લાકડાના હાથામાં ફિટ કરેલો છરો મળી આવ્યો હતો. હથિયારો મળી આવતાં પોલીસ તપાસનો દિશા પણ બદલાઈ છે. પ્રાથમિક તપાસના આધારે ઘટના સમયે ભાવેશ રબારી તરફથી પણ વળતું ફાયરિંગ કરવામાં આવ્યું હોવાની શક્યતા પોલીસ દ્વારા ચકાસવામાં આવી રહી છે.

હથિયારો મળતાં વધુ એક ગુનો નોંધાયો

ફોર્ચ્યુનર કારમાંથી હથિયારો મળી આવતા પોલીસે આ મામલે અલગથી કાયદેસરની કાર્યવાહી હાથ ધરી છે. મહેસાણા બી-ડિવિઝન પોલીસ દ્વારા ભાવેશ ઝીલીયા અને તેના સાગરીતો સહિત કુલ ચાર શખ્સો સામે વધુ એક ગુનો નોંધવામાં આવ્યો છે. આ કેસમાં ત્રણ આરોપીઓની ધરપકડ કરવામાં આવી હોવાનું સામે આવ્યું છે. પોલીસે ઝડપાયેલા શખ્સોની પૂછપરછ શરૂ કરી છે અને હથિયારો ક્યાંથી આવ્યા તથા તેનો ઉપયોગ કયા હેતુથી કરવામાં આવવાનો હતો તે અંગે તપાસ હાથ ધરી છે.

કોણ છે ભાવેશ ઝીલીયા?

ભાવેશ રબારી ઉર્ફે ભાવેશ ઝીલીયા ચાણસ્મા તાલુકાના ઝીલીયા ગામનો રહેવાસી છે. તે રામાધણી ફાર્મહાઉસ એટલે કે ‘સ્ટેટ ઓફ રામાધણી’નો માલિક હોવાનું જણાવાય છે. સ્થાનિક સ્તરે તેની સાથે જોડાયેલા જૂથને ‘મસ્તાની ગેંગ’ અથવા ‘ચોટી ગેંગ’ તરીકે ઓળખવામાં આવતું હોવાનું સામે આવ્યું છે. ભાવેશ ઝીલીયાનું નામ અગાઉ પણ ચાણસ્મા પંથકમાં બનેલી હિંસક ઘટનાઓને લઈને ચર્ચામાં આવ્યું હતું.

માર્ચમાં ફાર્મહાઉસ પર થયો હતો હુમલો

17 માર્ચ, 2026ના રોજ ચાણસ્મા વિસ્તારમાં આવેલા ભાવેશ ઝીલીયાના ફાર્મહાઉસ પર ઘાતક હથિયારો સાથે હુમલો થયો હતો. આ ઘટનાને અંગત અદાવત સાથે જોડવામાં આવી હતી અને હુમલા પાછળ ‘વામૈયા ગેંગ’ની સંડોવણી હોવાની માહિતી સામે આવી હતી. આ બનાવ બાદ ચાણસ્મા શહેરમાં હિંસાની ઘટનાઓને લઈને પોલીસે કાર્યવાહી હાથ ધરી હતી. પોલીસે આ કેસમાં સંડોવાયેલા આરોપીઓ સામે કડક કાર્યવાહી કરી હતી.

ફાર્મહાઉસ પર થયેલા હુમલાના કેસમાં પોલીસે આશરે 18 આરોપીઓને ઝડપી પાડ્યા હતા. ત્યારબાદ પોલીસ દ્વારા આરોપીઓને જાહેરમાં લઈ જઈ સરઘસ કાઢવામાં આવ્યું હતું. તમામ આરોપીઓને પાટણ કોર્ટમાં રજૂ કરવામાં આવ્યા હતા, જ્યાં તેમને પાંચ દિવસના પોલીસ રિમાન્ડ પર મોકલવામાં આવ્યા હતા.

પોલીસ અધિકારીઓ સામે પણ કાર્યવાહી થઈ હતી

ફાર્મહાઉસ પર થયેલી ઘટનાની ગંભીરતાને ધ્યાનમાં રાખીને પોલીસ વિભાગ દ્વારા પણ કાર્યવાહી કરવામાં આવી હતી. ચાણસ્મા પોલીસ સ્ટેશનના કેટલાક અધિકારીઓ અને કર્મચારીઓને સસ્પેન્ડ કરવામાં આવ્યા હતા. સસ્પેન્ડ કરાયેલા અધિકારીઓમાં પીઆઈ આર.એચ. સોલંકી, એએસઆઈ હરેશ અર્જનભાઈ અને હેડ કોન્સ્ટેબલ સંજય મોહનલાલનો સમાવેશ થતો હોવાનું જણાવાયું હતું. આ ઉપરાંત ફરજ પરના પાંચ GRD કર્મચારીઓને પણ સેવામાંથી દૂર કરવામાં આવ્યા હતા.

રામાધણી ફાર્મહાઉસ પર બુલડોઝર કાર્યવાહી

વામૈયા ગેંગ સામે કાર્યવાહી બાદ જિલ્લા પોલીસની ટીમે મસ્તાની ગેંગના નામે ઓળખાતા જૂથ સામે પણ કડક પગલાં લીધા હતા. ભાવેશ ઝીલીયાના રામાધણી ફાર્મહાઉસ ખાતે પોલીસની ટીમ પહોંચી હતી અને ફાર્મહાઉસના બાંધકામ સામે બુલડોઝર કાર્યવાહી કરવામાં આવી હતી.

હવે નાગલપુર ફાયરિંગથી જૂની અદાવતની ચર્ચા

હવે મહેસાણાના નાગલપુર વિસ્તારમાં ભાવેશ ઝીલીયા પર થયેલા ફાયરિંગ બાદ ફરી જૂની અદાવતનો મુદ્દો ચર્ચામાં આવ્યો છે. જોકે, હાલના ફાયરિંગ પાછળનું ચોક્કસ કારણ શું છે અને હુમલાખોરો કોણ હતા તે અંગે પોલીસની તપાસ ચાલી રહી છે. એક તરફ ભાવેશ રબારી દ્વારા અજાણ્યા હુમલાખોરો સામે ફાયરિંગની ફરિયાદ કરવામાં આવી છે, તો બીજી તરફ તેની કારમાંથી હથિયારો મળી આવતા પોલીસે (Mehsana Police) તેની સામે પણ કાર્યવાહી શરૂ કરી છે. આમ, એક જ ઘટનામાં બે અલગ દિશામાં તપાસ ચાલી રહી છે.

હાલ મહેસાણા બી-ડિવિઝન પોલીસ CCTV ફૂટેજ, હથિયારો, વાહન અને ઝડપાયેલા આરોપીઓની પૂછપરછના આધારે સમગ્ર ઘટનાની કડીઓ જોડવાનો પ્રયાસ કરી રહી છે. ફાયરિંગ પાછળનું ચોક્કસ કારણ અને અન્ય કેટલા લોકો સંડોવાયેલા છે તે અંગેની વિગતો તપાસ પૂર્ણ થયા બાદ સામે આવી શકે છે.

આ પણ વાંચો: મહેસાણામાં પકવાન હોટલ સામે ફાયરિંગથી ચકચાર

આ પણ વાંચો: બિલપાવર લોન કૌભાંડમાં EDના મુંબઈ-વડોદરામાં દરોડા, 12.20 કરોડની જ્વેલરી અને 43.90 લાખ રોકડ જપ્ત

આ પણ વાંચો: ‘મિત્ર’ બનીને બે શખ્સોએ આચાર્યને ફસાવ્યા! ક્રેડિટ કાર્ડ-લોનના નામે લાખોની છેતરપિંડી