Ahmedabad News : અમદાવાદ શહેરમાં નશીલા પદાર્થોની હેરાફેરી સામે ક્રાઇમ બ્રાન્ચની કાર્યવાહી દરમિયાન મોટી સફળતા મળી છે. નરોડા-હંસપુરા ચાર રસ્તા વિસ્તારમાંથી પોલીસે મેફેડ્રોન (Mephedrone)ના જથ્થા સાથે મધ્યપ્રદેશના ત્રણ શખ્સોને ઝડપી પાડ્યા છે. પોલીસના જણાવ્યા મુજબ, આરોપીઓ પાસેથી કુલ 939.81 ગ્રામ મેફેડ્રોન મળી આવ્યું છે, જેની સ્થાનિક કિંમત આશરે ₹28.19 લાખ અને આંતરરાષ્ટ્રીય બજાર કિંમત આશરે ₹4.69 કરોડ હોવાનું જણાવાયું છે.
અમદાવાદ ક્રાઇમ બ્રાન્ચ (Ahmedabad Crime Branch)એ કાર રોકી તપાસ કરી
પોલીસને 11 સપ્ટેમ્બર, 2026ના રોજ ચોક્કસ બાતમી મળી હતી કે ત્રણ શખ્સો કાર મારફતે ડ્રગ્સનો જથ્થો લઈને અમદાવાદ તરફ આવી રહ્યા છે. બાતમીના આધારે ક્રાઇમ બ્રાન્ચની ટીમે નરોડા-હંસપુરા ચાર રસ્તા પાસે વોચ ગોઠવી હતી.
આ દરમિયાન GJ01-RF-1476 નંબરની હોન્ડા સિટી કારને રોકી તેમાં સવાર ત્રણેય શખ્સોની કાયદેસરની તપાસ કરવામાં આવી હતી. તપાસ દરમિયાન કારમાંથી નશીલા પદાર્થનો જથ્થો મળી આવતાં પોલીસે વધુ કાર્યવાહી હાથ ધરી હતી.
પોલીસે કારમાંથી કુલ 939.81 ગ્રામ મેફેડ્રોન (Mephedrone) જપ્ત કર્યું હતું. આ ઉપરાંત ત્રણ મોબાઇલ ફોન અને હોન્ડા સિટી કાર સહિત કુલ ₹31.35 લાખથી વધુનો મુદ્દામાલ કબજે કરવામાં આવ્યો છે.
મધ્યપ્રદેશના ત્રણ શખ્સોની ધરપકડ
આ કેસમાં પોલીસે મધ્યપ્રદેશના મંદસૌર જિલ્લાના ત્રણ શખ્સોની ધરપકડ કરી છે. તેમની ઓળખ અસલમ અજીઝ પંજારા (મન્સુરી), ઉંમર 29 વર્ષ, ઇમરાન મહબુબ મન્સુરી, ઉંમર 28 વર્ષ અને શેજાદ શબ્બીર મન્સુરી, ઉંમર 22 વર્ષ તરીકે કરવામાં આવી છે.
પોલીસના જણાવ્યા પ્રમાણે, ત્રણેય આરોપીઓ મંદસૌર જિલ્લાના અલગ-અલગ વિસ્તારોમાં રહે છે.
ડ્રગ્સ જપ્ત (Drug Seizure) બાદ ડિલિવરી અંગે તપાસ
પ્રાથમિક પૂછપરછમાં પોલીસને જાણવા મળ્યું છે કે ત્રણેય શખ્સો સાથે મળીને મેફેડ્રોનનો જથ્થો અમદાવાદ લાવ્યા હતા. પોલીસના જણાવ્યા પ્રમાણે, તેઓ ઇમરાન પઠાણ ઉર્ફે લાલાના કહેવાથી ડ્રગ્સની ડિલિવરી આપવા માટે અમદાવાદ આવ્યા હતા.
આરોપીઓ અમદાવાદ પહોંચ્યા બાદ મોબાઇલ ફોન મારફતે ઇમરાન પઠાણ ઉર્ફે લાલાના સંપર્કમાં હોવાનો પણ પોલીસનો દાવો છે. ડ્રગ્સનો જથ્થો લેવા આવનાર વ્યક્તિને તેની ડિલિવરી કરવાની હોવાનું પ્રાથમિક તપાસમાં સામે આવ્યું હોવાનું પોલીસે જણાવ્યું છે.
ડ્રગ્સ રેકેટ (Drug Racket)ના મૂળ સુધી પહોંચવા તપાસ
આ કેસમાં પોલીસે માત્ર ડ્રગ્સના જથ્થાની જપ્તી પૂરતી કાર્યવાહી નહીં કરતાં સમગ્ર નેટવર્ક સુધી પહોંચવા તપાસ શરૂ કરી છે. મેફેડ્રોનની ડિલિવરી અમદાવાદમાં કયા સ્થળે કરવાની હતી, આ જથ્થો ક્યાંથી લાવવામાં આવ્યો હતો અને તેની પાછળ અન્ય કોણ-કોણ વ્યક્તિઓ સંડોવાયેલી છે તે અંગે તપાસ ચાલી રહી છે.
પોલીસે ત્રણેય આરોપીઓને કોર્ટમાં રજૂ કરીને 10 દિવસના રિમાન્ડ મેળવ્યા છે. હવે રિમાન્ડ દરમિયાન ડ્રગ્સના સપ્લાય નેટવર્ક અને સંભવિત અન્ય આરોપીઓ અંગે મહત્વની વિગતો બહાર આવે તેવી શક્યતા છે.
અમદાવાદ ક્રાઇમ બ્રાન્ચ (Ahmedabad Crime Branch)દ્વારા નશીલા પદાર્થોની ગેરકાયદેસર હેરાફેરી, સંગ્રહ અને વેચાણ સાથે સંકળાયેલા લોકો સામે સતત નજર રાખવામાં આવી રહી છે. પોલીસ દ્વારા નાગરિકોને પણ ડ્રગ્સ અંગેની કોઈ માહિતી હોય તો પોલીસ અથવા ક્રાઇમ બ્રાન્ચને ગુપ્ત રીતે જાણ કરી નશામુક્ત અભિયાનમાં સહકાર આપવા અપીલ કરવામાં આવી છે.
