મહારાષ્ટ્રમાં એક મોટા રાજકીય વિકાસમાં, NCPના વરિષ્ઠ નેતા અજિત પવારે રવિવારે (2 જુલાઈ) એકનાથ શિંદેના નેતૃત્વવાળી મહારાષ્ટ્ર સરકારમાં નાયબ મુખ્ય પ્રધાન તરીકે શપથ લીધા. અજિત પવાર સાથે બળવો કરનારા NCPના ઘણા નેતાઓએ પણ મંત્રી તરીકે શપથ લીધા છે. હવે આ મંત્રીઓને કયું મંત્રાલય મળશે તે જોવાનું રહ્યું.
સૂત્રોના જણાવ્યા અનુસાર, MVA સરકારમાં જે મંત્રાલયો NCP સાથે હતા, તે જ મંત્રાલય શિંદે સરકારમાં NCP ક્વોટામાંથી સરકારમાં સામેલ થયેલા મંત્રીઓને આપવામાં આવી શકે છે. મંત્રી તરીકે શપથ લેનારા નેતાઓમાં છગન ભુજબળ, દિલીપ વાલસે પાટીલ, હસન મુશરફ, ધનંજય મુંડે, અદિતિ તટકરે, ધર્મરાવ આત્રામ, અનિલ પાટીલ અને સંજય બંસોડનો સમાવેશ થાય છે. રાજ્યપાલ રમેશ બૈસે તમામને શપથ લેવડાવ્યા હતા. રાજભવન ખાતે આયોજિત સમારોહમાં મહારાષ્ટ્રના મુખ્યમંત્રી એકનાથ શિંદે, નાયબ મુખ્યમંત્રી દેવેન્દ્ર ફડણવીસ અને અન્ય વરિષ્ઠ નેતાઓ પણ હાજર હતા. શપથ લેતા પહેલા અજિત પવારે શુક્રવારે વિપક્ષના નેતા (LoP) પદ પરથી રાજીનામું આપી દીધું હતું, જેને સ્પીકરે સ્વીકારી લીધું હતું.રાજભવનમાં ડેપ્યુટી સ્પીકર નરહરિ જીરવાલ અને NCPના કાર્યકારી અધ્યક્ષ પ્રફુલ પટેલ પણ હાજર હતા. અજિત પવારે દાવો કર્યો છે કે NCPના તમામ 53 ધારાસભ્યો તેમની સાથે છે.
સૂત્રોએ જણાવ્યું કે અજિત પવાર અને તેમના સમર્થકો તાજેતરમાં પટનામાં વિપક્ષી પાર્ટીઓની બેઠકમાં એનસીપી પ્રમુખ શરદ પવાર અને પાર્ટીના કાર્યકારી અધ્યક્ષ સુપ્રિયા સુલેની હાજરીથી નારાજ હતા. અજિત પવારે કહ્યું કે તેમની પાર્ટીએ દેશના વિકાસ માટે એકનાથ શિંદે સરકારનો ભાગ બનવાનો નિર્ણય કર્યો છે. તેઓ ભવિષ્યની તમામ ચૂંટણી NCPના સિમ્બોલ પર જ લડશે.
