Kheda News: ખેડા જિલ્લાના નડિયાદ તાલુકાના હાથનોલી ગામમાં ભારે વરસાદ બાદ સર્જાયેલી જળબંબાકાર સ્થિતિએ ખેડૂતોની મુશ્કેલી (Paddy Crop Damage) વધારી છે. ગામના સીમ વિસ્તારમાં છેલ્લા 13 દિવસથી વરસાદી પાણી ભરાયેલું હોવાથી અંદાજે 250 વીઘા જેટલી ખેતીલાયક જમીન પાણીમાં ગરકાવ હોવાનું ખેડૂતોનું કહેવું છે. પાણીનો નિકાલ ન થતાં મહેનતથી તૈયાર કરેલો ડાંગરનો પાક (Paddy Crop Damage) બગડી ગયો છે.
ખેડૂતોના જણાવ્યા મુજબ, 31 જુલાઈના રોજ પડેલા ભારે વરસાદ બાદ ખેતરોમાં મોટા પ્રમાણમાં પાણી ભરાયું હતું. ત્યારથી સતત પાણી ભરાયેલું રહેતા ડાંગરના છોડ સડી જવા લાગ્યા છે. ચોમાસાની શરૂઆતમાં જ પાકને થયેલા નુકસાનથી ખેડૂતોને મોટો આર્થિક ફટકો પડ્યો છે.
હાથમાં બગડેલો ડાંગર લઈને અધિક કલેક્ટર સમક્ષ રજૂઆત
પાકના નુકસાન (Paddy Crop Damage)થી પરેશાન હાથનોલી ગામના ખેડૂતો બગડેલા અને સડી ગયેલા ડાંગરના છોડ હાથમાં લઈને જિલ્લા કલેક્ટર કચેરીએ પહોંચ્યા હતા. ખેડૂતોએ અધિક કલેક્ટરને રૂબરૂ મળી પોતાની સમસ્યા રજૂ કરી હતી અને ખેતરોમાંથી પાણીનો તાત્કાલિક નિકાલ કરવાની માગ કરી હતી.ખેડૂતોનું કહેવું છે કે દર ચોમાસામાં યોગ્ય ડ્રેનેજ વ્યવસ્થાના અભાવે ખેતરોમાં પાણી ભરાય છે. દર વર્ષે આ સમસ્યા સર્જાતી હોવા છતાં તેના કાયમી ઉકેલ માટે પૂરતી કામગીરી કરવામાં આવતી ન હોવાનો ખેડૂતોનો આક્ષેપ છે.
Paddy Crop Damage: 250 વીઘા જમીનમાંથી પાણીનો તાત્કાલિક નિકાલ કરવાની માગ
ખેડૂતોએ વહીવટી તંત્ર સમક્ષ માંગણી કરી છે કે આશરે 250 વીઘા જમીનમાં ભરાયેલા વરસાદી પાણીનો તાત્કાલિક નિકાલ કરવામાં આવે. આ માટે યોગ્ય ડ્રેનેજ અથવા કન્સલ્ટિંગ કેનાલ જેવી વ્યવસ્થા ઊભી કરવામાં આવે, જેથી આગામી ચોમાસામાં ફરીથી આવી સ્થિતિ ઊભી ન થાય.ખેડૂતોનું કહેવું છે કે લાંબા સમય સુધી ખેતરોમાં પાણી ભરાઈ રહેવાના કારણે માત્ર હાલના પાકને જ નુકસાન થયું નથી, પરંતુ આગામી ખેતીને પણ અસર થવાની શક્યતા છે.
પાક નુકસાનનો સરવે કરી વળતરની માગ
હાથનોલીના ખેડૂતોએ પાણી ભરાવાના કારણે સડી ગયેલા ડાંગરના પાક (Paddy Crop Damage)નો તાત્કાલિક સરવે કરાવવાની પણ માગ કરી છે. અસરગ્રસ્ત ખેડૂતોને નિયમ મુજબ સરકારી વળતર અને જરૂરી આર્થિક સહાય આપવામાં આવે તેવી રજૂઆત કરવામાં આવી છે.ખેડૂતોનું કહેવું છે કે પાકમાં થયેલા નુકસાનનો યોગ્ય અંદાજ મેળવી વહેલી તકે રાહત આપવામાં આવે તો આર્થિક મુશ્કેલીમાં મુકાયેલા ખેડૂતોને મદદ મળી શકે.
કાયમી ઉકેલ નહીં આવે તો આંદોલનની ચીમકી
ખેડૂતોએ સ્પષ્ટ ચીમકી આપી છે કે જો પાણીના નિકાલ માટે કાયમી વ્યવસ્થા ઊભી કરવામાં નહીં આવે અને તેમની રજૂઆતનો વહેલી તકે ઉકેલ નહીં આવે તો આગામી દિવસોમાં ગાંધી ચિંધ્યા માર્ગે આંદોલન કરવાની ફરજ પડશે.
બીજી તરફ, અધિક કલેક્ટરે ખેડૂતોની રજૂઆત સાંભળી હતી અને સમગ્ર મામલે સંબંધિત સિંચાઈ તથા ડ્રેનેજ વિભાગના અધિકારીઓને સ્થળ તપાસ કરાવી જરૂરી કાર્યવાહી કરવાની ખાતરી આપી હતી.હવે ખેડૂતોની નજર વહીવટી તંત્ર દ્વારા કરવામાં આવતી સ્થળ તપાસ અને પાણીના નિકાલ માટેની કામગીરી પર છે. સાથે જ પાક નુકસાનનો સરવે ક્યારે થાય છે અને અસરગ્રસ્ત ખેડૂતોને સરકારી સહાય ક્યારે મળે છે તે પણ મહત્વનું રહેશે.
આ પણ વાંચો:નવસારીમાં મેઘતાંડવ: જૂજ ડેમની કેનાલમાં ગાબડું પડતાં ખેતરોમાં પાણી ફરી વળ્યા, પૂર જેવી સ્થિતિ સર્જાઈ
આ પણ વાંચો:બોટાદના નાગનેશમાં ધોધમાર વરસાદ, ખેતરોમાં પાણી ફરી વળ્યા, ખેડૂતોમાં ખુશીનો માહોલ
આ પણ વાંચો:સુરેન્દ્રનગરના ચુડામાં કેનાલમાં ગાબડું પડતાં ખેતરોમાં પાણી ફરી વળ્યું
