નવી દિલ્હી,
આજથી લગભગ ૬ વર્ષ અગાઉ રાજધાની દિલ્હીમાં સામે આવેલી નિર્ભયા રેપકાંડની ઘટનાએ દેશભરમાં હાહાકાર મચાવી દીધો હતો. આ ઘટના બાદ સરકાર દ્વારા અનેક દાવાઓ – પ્રતિદાવાઓ કરાયા પરંતુ અત્યારસુધી આરોપીઓ ફાંસીના ફંડા સુધી પહોંચી શક્યા નથી.
આ વચ્ચે દિલ્હીમાં જ એક રેપની ઘટના સામે આવી છે, જેને લઈ દેશની રાજધાની શર્મશાર થઇ ગઈ છે.
હકીકતમાં આ ઘટના દિલ્હીના બિંદાપુર વિસ્તારની છે, જ્યાં માત્ર ત્રણ વર્ષની માસૂમ બાળકી સાથે પડોશના ઘરમાં રહેતા એક શખ્સ દ્વારા કથિત રીતે રેપ કરાયો છે.
જો કે આ રેપ બાદ બાળકી રડવા લાગી હતી. આ જોઇને પડોશીઓને બાળકી સાથે કઈ ઘટિત થયું હોવાનો શક ગયો હતો. પછીથી આરોપીને સ્થાનિક લોકોએ દબોચી લીધો હતો અને પોલીસના હવાલે કર્યો હતો.
જોવામાં આવે તો, જે માસુમ બાળકી સાથે હેવાનિયત આચરવામાં આવી છે તેની વાત કરવામાં આવે તો, તે બાળકીના દુનિયામાં આવ્યાને હજી ત્રણ જ વર્ષ થયા છે, પરંતુ તે આ જ ઉમંરે કોઈના હવસની શિકાર બની ગઈ છે.
અત્રે ઉલ્લેખનીય છે કે, ૧૬ ડિસેમ્બર, ૨૦૧૨ના રોજ દિલ્હીમાં બનેલી નિર્ભયા કાંડની ઘટના બાદ દેશભરમાં આ હેવાનિયત આચરનારા આરોપીઓ સામે સખ્ત કાર્યવાહી કરવા માટે વિરોધ પ્રદર્શન થયા, ચર્ચાઓના દોર જામ્યા, સત્તા પક્ષ અને વિપક્ષ દ્વારા આરોપ-પ્રત્યારોપનો મારો ચલાવવામાં આવ્યો છે, પરંતુ પરિણામ શૂન્ય જ છે.