અરૂણાચલ પ્રદેશમાં ભારત-ચીન સીમા પર શનિવારની વહેલી સવાર 4.04 વાગ્યે ભૂકંપના ઝટકા અનુભવાયા હતાં. ભૂકંપની તીવ્રતા રિક્ટર સ્કેલ પર 6.4 આંકવામાં આવી છે. અત્યારે આ ભૂકંપથી કોઈ જાનહાની કે માલહાની થઈ હોવાના અહેવાલ નથી.
મહત્વનું છે કે ભૂકંપનું કેન્દ્ર ભારત-ચીન સીમા છે, આથી સુરક્ષાને લઈને તપાસ આદરવામાં આવી છે. ભારતીય હવામાન વિભાગ દ્વારા આપવામાં આવેલી જાણકારી પ્રમાણે, ભૂકંપ સવારે 4 વાગ્યે, 4 મિનિટ પર આવ્યો હતો. ભૂકંપનું કેન્દ્ર જમીનની અંદર 10 કિલોમીટર ઉંડું હતું.
ચીનના કબજાવાળા તિબેટનો એક મોટો હિસ્સો આ ભૂકંપની ઝપટમાં આવી ગયો છે. ચાલુ વર્ષેની શરૂઆતમાં પણ આ વિસ્તારમાં ભૂકંપ આવ્યો હતો. 4 જાન્યુઆરીના રોજ આવેલા ભૂકંપનું કેન્દ્ર કુરંગ કુમેય જિલ્લામાં હતું.