NSUI Protests DU VC Event Satya Niketan Tragedy: દિલ્હીના સત્ય નિકેતન વિસ્તારમાં થયેલા બિલ્ડિંગ અકસ્માત બાદ વિદ્યાર્થીઓમાં રોષ યથાવત છે. આ દરમિયાન દિલ્હી યુનિવર્સિટીના કુલપતિ પ્રોફેસર યોગેશ સિંહ એક કાર્યક્રમમાં પહોંચ્યા ત્યારે NSUIના કાર્યકરોએ વિરોધ પ્રદર્શન કર્યું હતું. સંગઠને કુલપતિ પર વિદ્યાર્થીઓની સુરક્ષા અને અકસ્માતથી અસરગ્રસ્ત પરિવારો પ્રત્યે સંવેદનહીન વલણ રાખવાનો આરોપ લગાવ્યો હતો અને તેમના તાત્કાલિક રાજીનામાની માંગ કરી હતી.
વિદ્યાર્થીઓએ જવાબદારી અંગે સવાલ ઉઠાવ્યા
વિરોધ દરમિયાન વિદ્યાર્થીઓએ સવાલ ઉઠાવ્યો હતો કે સત્ય નિકેતન(Satya Niketan) બિલ્ડિંગ દુર્ઘટનાની જવાબદારી કોણ લેશે. આ અકસ્માતમાં કુલ સાત લોકોના મોત થયા હોવાનું જણાવાયું છે, જેમાં પાંચ વિદ્યાર્થીઓનો સમાવેશ થાય છે. ઘટનાને લઈને દિલ્હી યુનિવર્સિટીના વિવિધ વિદ્યાર્થી સંગઠનો દ્વારા સતત વિરોધ કરવામાં આવી રહ્યો છે.
હોસ્ટેલની સુવિધા આપવાની માંગ
સત્ય નિકેતન(Satya Niketan) અકસ્માત બાદ NSUI ઉપરાંત ડાબેરી વિચારધારા સાથે જોડાયેલા વિદ્યાર્થી સંગઠનો અને ABVP પણ વિરોધ કરી રહ્યા છે. વિદ્યાર્થીઓની મુખ્ય માંગોમાં યુનિવર્સિટી અને તેની આસપાસ વિદ્યાર્થીઓ માટે પૂરતી હોસ્ટેલ સુવિધા ઉપલબ્ધ કરાવવાનો સમાવેશ થાય છે. વિદ્યાર્થી સંગઠનોનું કહેવું છે કે બહારથી અભ્યાસ માટે આવતા વિદ્યાર્થીઓ માટે સુરક્ષિત રહેઠાણની વ્યવસ્થા મહત્વપૂર્ણ છે. આ ઉપરાંત અકસ્માતમાં જીવ ગુમાવનારા વિદ્યાર્થીઓના પરિવારજનોને યોગ્ય વળતર અને જરૂરી સહાય આપવાની પણ માંગ કરવામાં આવી રહી છે.
કુલપતિએ અગાઉ વ્યક્ત કર્યું હતું દુઃખ
બીજી તરફ, દિલ્હી યુનિવર્સિટીના કુલપતિ પ્રોફેસર યોગેશ સિંહે આ દુર્ઘટના અંગે દુઃખ વ્યક્ત કર્યું હતું. તેમણે કોલેજોના પ્રિન્સિપાલોની બેઠક બોલાવી હતી, જેમાં અકસ્માતમાં મૃત્યુ પામેલા વિદ્યાર્થીઓને શ્રદ્ધાંજલિ આપવા માટે બે મિનિટનું મૌન પાળવામાં આવ્યું હતું.
નવા હોસ્ટેલ બનાવવા પર ભાર
કુલપતિએ(Satya Niketan) કોલેજોને હાલની વિદ્યાર્થી આવાસ વ્યવસ્થાની સમીક્ષા કરવા અને બાંધકામ હેઠળના હોસ્ટેલનું કામ ઝડપથી પૂર્ણ કરવા સૂચના આપી હતી. સાથે જ નવા હોસ્ટેલ બનાવવાની શક્યતાઓ શોધવા અને ઉપલબ્ધ જગ્યા તથા સરકારી યોજનાઓનો ઉપયોગ કરીને વધુ વિદ્યાર્થીઓને રહેઠાણની સુવિધા આપવાની દિશામાં કામ કરવા જણાવ્યું હતું. કુલપતિએ યુનિવર્સિટી તરફથી અકસ્માતથી પ્રભાવિત વિદ્યાર્થીઓ અને તેમના પરિવારજનોને શક્ય તમામ મદદ પૂરી પાડવાનો વિશ્વાસ પણ વ્યક્ત કર્યો હતો. જોકે, આ વચ્ચે NSUIના વિરોધ અને રાજીનામાની માંગને કારણે સમગ્ર મુદ્દો ફરી ચર્ચામાં આવ્યો છે.
આ પણ વાંચો: દિલ્હીના સત્ય નિકેતન બિલ્ડિંગ હોનારતમાં ડીયુના 5 વિદ્યાર્થીઓ સહિત 7 લોકોના કરૂણ મોત
આ પણ વાંચો:LIVE: દિલ્હીમાં ત્રણ માળની ઇમારત ધરાશાયી: કાટમાળમાં લોકો ફસાયા હોવાની આશંકા
આ પણ વાંચો: વારાણસીથી દિલ્હી જતી ફ્લાઈટમાં ધુમાડાનું એલર્ટ, લખનૌમાં કરાઈ ઇમરજન્સી લેન્ડિંગ
