દેશના સૌથી મોટા ઉદ્યોગપતિઓમાંથી એક આનંદ મહિન્દ્રાએ કેનેડાને લઈને એવો નિર્ણય લીધો છે જેનાથી વેપાર જગતમાં ખળભળાટ મચી ગયો છે. વાસ્તવમાં આનંદ મહિન્દ્રાએ કેનેડામાંથી તેની એક કંપનીનો બિઝનેસ બંધ કરવાનો નિર્ણય લીધો છે.જેની માહિતી શેરબજારને પણ આપવામાં આવી છે. મહિન્દ્રા એન્ડ મહિન્દ્રા દ્વારા આપવામાં આવેલી માહિતી અનુસાર,સબસિડિયરી કંપની રેસન એરોસ્પેસ કોર્પોરેશનની કામગીરી બંધ કરવાનો નિર્ણય લેવામાં આવ્યો છે.
વર્તમાન સમયમાં કેનેડા અને ભારતના સંબંધો કેટલા તંગ બની ગયા છે તે કહેવાની જરૂર નથી.માત્ર ભારતીય ઉદ્યોગપતિઓ જ નહીં પરંતુ કેનેડિયન કંપનીઓએ પણ ભારતમાં જંગી રોકાણ કર્યું છે.આનંદ મહિન્દ્રાના આ નિર્ણય બાદ આનંદ મહિન્દ્રાની મહિન્દ્રા એન્ડ મહિન્દ્રાને 7200 કરોડ રૂપિયાથી વધુનું નુકસાન થયું છે.શું છે આખો મામલો અને કેવી રીતે મહિન્દ્રા એન્ડ મહિન્દ્રાને 7200 કરોડ રૂપિયાથી વધુનું નુકસાન થયું છે.
આનંદ મહિન્દ્રાએ શું નિર્ણય લીધો?
ગુરુવારે માહિતી આપતા મહિન્દ્રા એન્ડ મહિન્દ્રાએ કહ્યું કે, તેની કેનેડા સ્થિત સબસિડિયરી કંપની રેસન એરોસ્પેસ કોર્પોરેશને તેની કામગીરી બંધ કરવાની જાહેરાત કરી છે. રેસન એરોસ્પેસ કોર્પોરેશનમાં મહિન્દ્રા એન્ડ મહિન્દ્રાનો 11.18 ટકા હિસ્સો હતો. કંપનીએ સ્વૈચ્છિક કામગીરી બંધ કરવા અરજી કરી હતી. શેરબજારને માહિતી આપતા મહિન્દ્રા એન્ડ મહિન્દ્રાએ જણાવ્યું હતું કે રેસનને 20 સપ્ટેમ્બર, 2023ના રોજ કામગીરી બંધ કરવાની મંજૂરી માટે કોર્પોરેશન કેનેડા પાસેથી જરૂરી દસ્તાવેજો મળ્યા છે. કંપનીએ કહ્યું કે આ પછી રેસને તેની કામગીરી બંધ કરી દીધી છે. તે હવે 20 સપ્ટેમ્બર 2023થી કંપનીની પેટાકંપની નથી.
કંપનીના શેરમાં 3 ટકાનો ઘટાડો નોંધાયો
આનંદ મહિન્દ્રાના નિર્ણય બાદ મહિન્દ્રા એન્ડ મહિન્દ્રાના શેરમાં મોટો ઘટાડો જોવા મળ્યો છે. માહિતી અનુસાર, બોમ્બે સ્ટોક એક્સચેન્જ પર મહિન્દ્રા એન્ડ મહિન્દ્રાનો શેર 3 ટકાના ઘટાડા સાથે રૂ. 1583.80 પર બંધ થયો હતો. જ્યારે ટ્રેડિંગ સેશન દરમિયાન કંપનીના શેરમાં સાડા ત્રણ ટકાથી વધુનો ઘટાડો થયો હતો અને તે દિવસના નીચલા સ્તરે રૂ. 1575.75 પર પહોંચી ગયો હતો. એક દિવસ પહેલા કંપનીનો શેર 1634.05 રૂપિયા પર બંધ થયો હતો. જોકે, કંપનીના શેરોએ આ વર્ષે નિફ્ટી પર લગભગ 26 ટકા વળતર આપ્યું છે. એક વર્ષમાં કંપનીનું વળતર 21 ટકાથી વધુ રહ્યું છે.
કંપનીને 7200 કરોડથી વધુનું નુકસાન થયું
કંપનીના શેરમાં ઘટાડાને કારણે કંપનીના માર્કેટ કેપને પણ મોટું નુકસાન થયું છે. આંકડાઓની વાત કરીએ તો કંપનીનું માર્કેટ કેપ એક દિવસ પહેલા 2 લાખ કરોડ એટલે કે 2,03,025.78 કરોડથી વધુ હતું. ટ્રેડિંગ સેશન દરમિયાન જ્યારે કંપનીના શેર દિવસના સૌથી નીચા સ્તરે એટલે કે 1575.75 પર પહોંચ્યા ત્યારે કંપનીનું માર્કેટ કેપ 1,95,782.18 કરોડ થયું હતું. આનો અર્થ એ થયો કે ટ્રેડિંગ સેશન દરમિયાન કંપનીને 7,243.6 કરોડનું નુકસાન થયું હતું. જ્યારે બજાર બંધ થયું ત્યારે કંપનીનું માર્કેટ કેપ 1,96,950.10 કરોડ હતું.
આ પણ વાંચો: IND Vs AUS 1st ODI Live/ ભારતીય ટીમની વિસ્ફોટક બેટિંગ, શુભમન ગિલે અડધી સદી ફટકારી
આ પણ વાંચો: Delimitation/ મહિલાઓ માટે કંઈ બેઠક રહેશે અનામત,કેવી રીતે નક્કી થશે સીમાંકન,જાણો A To Z માહિતી
આ પણ વાંચો: Raid/ 200 કરોડથી વધુની કરચોરીનો આરોપઃ લક્સ ઇન્ડસ્ટ્રીઝ પર રેડ