Ahmedabad News: ગુજરાતમાં એલન ઇન્સ્ટિટ્યુટના કૌભાંડનો પર્દાફાશ મંતવ્ય ન્યૂઝે કર્યો છે. આ પર્દાફાશમાં સ્કૂલ અને એલન વચ્ચેના સાંઠગાંઠનું રહસ્યોદઘાટન થયું છે. તેમાં એડમિશન સ્કૂલમાં પણ ભણવાનું એલનમાં હોય છે. આ રીતે ફક્ત ગુજરાતમાં જ નહીં દેશભરમાં કેટલાય વિદ્યાર્થીઓના ભવિષ્યની સાથે ચેડા કરવામાં આવી રહ્યા છે. આના પગલે રીતસરનો ભૂતિયા વિદ્યાર્થીઓનો રાફડો ફાટ્યો છે, આ વિદ્યાર્થીને પણ ખબર નથી તે ખરેખર ભૂતિયા વિદ્યાર્થી છે, આમ તેના ભવિષ્ય સાથે ચેડા થઈ રહ્યા છે. બીજી બાજુએ શાળા અને કોચિંગ ઇન્સ્ટિટ્યુટ રૂપિયા ખંખેરી રહ્યા છે. આ કૌભાંડને લઈને કોંગ્રેસના આગેવાન હેમાંગ રાવલ અને નિકુલ પટેલે આપેલા પ્રત્યાઘાતને જાણો
મંતવ્ય ન્યૂઝના સ્ટિંગ ઓપરેશનમાં સ્પષ્ટ પુરાવા સામે આવ્યા છે કે આ ભૂતિયા એડમિશનના જાળમાં હજારો વિદ્યાર્થીઓ ફસાઈ ચૂક્યા છે. આ ગેરકાયદેસર સાંઠગાંઠ દ્વારા શિક્ષણ વિભાગની સિસ્ટમને અંદરથી ખોખલી કરવામાં આવી રહી છે. કાયદાને ઉલ્લંઘીને નિયમોનો દુરુપયોગ થઈ રહ્યો છે, જેની સીધી અસર બાળકોના ભવિષ્ય પર પડી રહી છે.
આ ખુલાસા બાદ વાલીઓ અને સમાજમાં આક્રોશ ફેલાયો છે. ઘણા વાલીઓએ જણાવ્યું કે તેઓ પોતાના બાળકોના ઉજ્જવળ ભવિષ્ય માટે મોટી રકમ ચૂકવે છે, પરંતુ બદલામાં તેમને શાળાનું શિક્ષણ મળતું નથી. આ ઉપરાંત, અન્ય સ્ટિંગ ઓપરેશનમાં પણ એલન અને આકાશ ઇન્સ્ટિટ્યૂટ જેવી કોચિંગ સંસ્થાઓની સમાન પ્રકારની ગેરરીતિઓ સામે આવી છે, જે શિક્ષણના પવિત્ર વ્યવસાયને કલંકિત કરી રહી છે.
