Islamabad News: પાકિસ્તાની એરલાઇન ‘પાકિસ્તાન ઇન્ટરનેશનલ એરલાઇન્સ’ (PIA)ના કર્મચારીઓએ બેદરકારીપૂર્વક છ વર્ષના બાળકના મૃતદેહને એરપોર્ટ પર છોડી દીધો હતો. બાળકના મૃતદેહને પ્લેન દ્વારા પાકિસ્તાન અધિકૃત ગિલગિટ બાલ્ટિસ્તાન મોકલવાનો હતો. ખાસ વાત એ છે કે તેના માતા-પિતા પ્લેનમાં મુસાફરી કરી રહ્યા હતા. મીડિયા દ્વારા પ્રસારિત કરવામાં આવેલા સમાચારમાં આ માહિતી આપવામાં આવી છે.
સારવાર દરમિયાન મૃત્યુ થયું હતું
ડોન અખબારે અહેવાલ આપ્યો છે કે બાળકને ગાંઠ હતી અને રાવલપિંડીની હોસ્પિટલમાં તેની સારવાર કરવામાં આવી રહી હતી, પરંતુ ગુરુવારે તેનું મૃત્યુ થયું હતું. અખબારે અહેવાલ આપ્યો હતો કે બાળકના મૃતદેહને દફનવિધિ માટે વિમાન દ્વારા પાકિસ્તાનના કબજા હેઠળના ગિલગિટ બાલ્ટિસ્તાન ક્ષેત્રમાં તેના મૂળ ગામ કાત્શી લઈ જવામાં આવશે. અખબારના જણાવ્યા અનુસાર, મૃતકના માતા-પિતાએ શુક્રવારે સવારે ઇસ્લામાબાદથી સ્કર્દુ જતી PIA ફ્લાઇટમાં ટિકિટ બુક કરાવી હતી. તેઓ સવારે છ વાગ્યે મૃતદેહને ઈસ્લામાબાદ એરપોર્ટ પર લાવ્યા હતા.
માતા-પિતા બેહોશ થઈ ગયા
અખબારના જણાવ્યા અનુસાર, તેઓએ મૃતદેહને એરલિફ્ટ કરવાની પ્રક્રિયા પૂર્ણ કરી હતી પરંતુ જ્યારે તેઓ સ્કર્દુ પહોંચ્યા ત્યારે તેમને કહેવામાં આવ્યું કે મૃતદેહ ભૂલથી ઈસ્લામાબાદ એરપોર્ટ પર છોડી દેવામાં આવ્યો હતો. આ સાંભળીને, માતા-પિતા આઘાતમાં એરપોર્ટ પર બેહોશ થઈ ગયા અને તેમના સંબંધીઓ મૃતદેહની રાહ જોતા એરપોર્ટની લાઉન્જમાં એકઠા થઈ ગયા. તેઓએ PAI મેનેજમેન્ટની બેદરકારી સામે ત્રણ કલાક સુધી પ્રદર્શન કર્યું. મૃતકના માતા-પિતા અને સંબંધીઓએ પીઆઈએ પ્રશાસન સામે સૂત્રોચ્ચાર કર્યા હતા અને આરોપ લગાવ્યો હતો કે ગરીબ પરિવારે પીઆઈએની ફ્લાઈટ મારફતે લાશ લાવવા માટે પૈસા ચૂકવ્યા હતા પરંતુ તેમાં ઘોર બેદરકારી દર્શાવવામાં આવી હતી. આ બેદરકારી માટે જવાબદારો સામે પગલાં લેવા તેમણે સરકારને અપીલ કરી હતી.
કાર્યવાહી કરવામાં આવશે
PIA, સિવિલ એવિએશન ઓથોરિટી અને સ્કર્દુ એરપોર્ટ પર ફરજ પરના અન્ય વિભાગોના અધિકારીઓએ તેમની ભૂલ સ્વીકારી અને માતા-પિતાને ખાતરી આપી કે શનિવારે મૃતદેહ તેમને પહોંચાડવામાં આવશે. PIA અધિકારીઓએ કહ્યું કે આ બેદરકારી માટે જવાબદાર લોકો સામે કડક કાર્યવાહી કરવામાં આવશે.
આ પણ વાંચોઃબે દાયકામાં સૌથી શક્તિશાળી સૌર વાવાઝોડું પૃથ્વી પર ટકરાયુ
