Pappu Yadav Flood Relief Update September 2026:  બિહારમાં ભારે પૂર વચ્ચે પૂર્ણિયાના અપક્ષ સાંસદ રાજેશ રંજન ઉર્ફે પપ્પુ યાદવ સતત અસરગ્રસ્ત વિસ્તારોની મુલાકાત લઈ રહ્યા છે. સોશિયલ મીડિયા પર તેમના અનેક વીડિયો સામે આવ્યા છે, જેમાં તેઓ પૂરગ્રસ્ત લોકો સુધી પહોંચી રાહત સામગ્રી પહોંચાડતા જોવા મળે છે. કેટલાક સ્થળોએ તેમણે પૂરપીડિત પરિવારોને, ખાસ કરીને મહિલાઓને, ₹500ની રોકડ સહાય પણ આપી છે.

અનેક વિસ્તારોમાં રાહત સામગ્રીનું વિતરણ

પપ્પુ યાદવે(Pappu Yadav) પટનાના દીઘા ઘાટ ઉપરાંત પૂર્ણિયા, કટિહાર અને રાઘોપુર જેવા વિસ્તારોમાં રાહત કામગીરી કરી હોવાના અહેવાલ છે. તેમની ટીમ દ્વારા ચુડા, ચોખા, લોટ સહિતની જરૂરી ચીજવસ્તુઓનું વિતરણ કરવામાં આવ્યું. મહિલાઓને સેનિટરી પેડ પણ આપવામાં આવ્યા છે. પૂરગ્રસ્ત વિસ્તારોમાં લોકોને અવરજવર માટે બોટની વ્યવસ્થા કરાવવાનો પણ પ્રયાસ કરવામાં આવ્યો છે.

‘સરકાર પાસે પણ નહીં હોય એટલા પૈસા’ના નિવેદનની ચર્ચા

રાહત કામગીરી દરમિયાન પપ્પુ યાદવનું(Pappu Yadav) એક નિવેદન પણ ચર્ચામાં આવ્યું છે. તેમણે પોતાના પાસે મોટી રકમ હોવાનો દાવો કર્યો અને કહ્યું કે સરકાર પાસે પણ એટલા પૈસા નહીં હોય. તેમણે જણાવ્યું કે રાહત માટેનો રાશનનો જથ્થો પૂરો થયા બાદ લોકોની તાત્કાલિક જરૂરિયાતો પૂરી કરવા માટે રોકડ સહાય આપવી પડી. આ દરમિયાન પટનામાં રાહત સામગ્રીના વિતરણ વખતે ભીડનો લાભ લઈને તેમના બેગ અથવા ખિસ્સામાંથી આશરે ₹1 લાખની ચોરી થયાનો દાવો પણ સામે આવ્યો છે. પપ્પુ યાદવે પૂર રાહતને લઈને રાજ્ય સરકાર અને કેન્દ્ર સરકારની કામગીરી પર પણ સવાલ ઉઠાવ્યા છે.

2024ના હલફનામા મુજબ 12 કરોડથી વધુની સંપત્તિ

હવે સોશિયલ મીડિયા પર લોકો તેમની સંપત્તિ અંગે સવાલ કરી રહ્યા છે. 2024ની લોકસભા ચૂંટણી દરમિયાન પપ્પુ યાદવે(Pappu Yadav) દાખલ કરેલા ચૂંટણી હલફનામા મુજબ તેમની કુલ જાહેર કરાયેલી સંપત્તિ ₹12,08,84,682 હતી, એટલે કે લગભગ ₹12.08 કરોડ. હલફનામામાં તેમની કુલ દેવું અથવા જવાબદારીઓ ₹1,72,36,808, એટલે કે લગભગ ₹1.72 કરોડ દર્શાવવામાં આવી હતી. જાહેર કરાયેલી સંપત્તિમાં રોકડ, બેંકમાં જમા રકમ, વાહન, સોનું તેમજ જમીન સહિતની ચલ અને અચલ મિલકતોનો સમાવેશ થાય છે.

એક ઇનોવા અને 204 ગ્રામ સોનાનો પણ ઉલ્લેખ

હલફનામા મુજબ પપ્પુ યાદવના(Pappu Yadav) નામે એક ઇનોવા કાર અને આશરે 204 ગ્રામ સોનું પણ દર્શાવવામાં આવ્યું હતું. અચલ સંપત્તિમાં રહેણાંક અને વ્યાવસાયિક ઉપયોગની જમીન સંબંધિત મિલકતોનો સમાવેશ થાય છે. જોકે, મહત્વની વાત એ છે કે આ આંકડા 2024ની લોકસભા ચૂંટણી વખતે દાખલ કરાયેલા સ્વઘોષિત ચૂંટણી હલફનામા પર આધારિત છે. તેથી તેને પપ્પુ યાદવની વર્તમાન કુલ સંપત્તિ તરીકે જોવી યોગ્ય નથી. હાલની સંપત્તિમાં ફેરફાર થયો હોય શકે છે.

આ પણ વાંચો : સાંસદ પપ્પુ યાદવને મળ્યા જાનથી મારવાના ધમકીભર્યા ફોન; કહ્યું ‘હું ડરવાનો નથી’.

આ પણ વાંચો : પપ્પુ યાદવની પ્રેસ કોન્ફરન્સમાં હોબાળો અને હુમલાનો પ્રયાસ;પ્રેસ કોન્ફરન્સમાં છરી સાથે શખ્સ ઘૂસ્યો

આ પણ વાંચો : દિલ્હીમાં બ્લાસ્ટ, બિહાર ચૂંટણીમાં વ્યસ્તતા પર પપ્પુ યાદવે મોદી-શાહના રાજીનામાની માંગ કરી