Surat News : કઠપૂતળીના પ્રોગ્રામમાં ઢોલ વગાડીને ગુજરાન ચલાવતો રાજુ ભાટ બે ચૂટેલા પથ્થરથી દેશભરમાં છવાઈ ગયો છે. તેનો તૂટેલા પથ્થર પર ગીત ગાતો વીડિયો 146M પર પહોંચી ગયો છે. સામાન્ય રીતે કોઈ પ્રોફેશનલ સિંગર જ્યારે મોંઘા મ્યુઝિકલ ઇન્સ્ટ્રુમેન્ટ્સ પર ગીતો ગાય છે ત્યારે તેને વાઇરલ થતાં સમય લાગે છે, પરંતુ ગુજરાતના સુરતના રાજુ ભાટે આ તમામ ધારણાઓને ખોટી પાડી દીધી છે. તેણે એક તૂટેલા પથ્થર પર સંગીત વગાડીને અને ગીત ગાઈને થોડા જ દિવસોમાં એટલી ખ્યાતિ મેળવી છે કે સોશિયલ મીડિયા પર તેનાં ગીતોની રીલ્સનો રાફડો ફાટી નીકળ્યો છે.
તેનો એક વાઇરલ વીડિયો 146 મિલિયન પર પહોંચી ગયો છે.રાંદેર વિસ્તારમાં રહેતા અને કઠપૂતળીના કાર્યક્રમોમાં ઢોલ વગાડીને ગુજરાન ચલાવતા રાજુભાઈ ભાટે (રાજુ કલાકાર) ક્યારેય વિચાર્યું પણ નહોતું કે તૂટેલા પથ્થરને વગાડીને ગાયેલું તેનું ગીત આખા દેશમાં પ્રખ્યાત થઈ જશે. તેનો વીડિયો એટલો ઝડપથી વાઇરલ થયો કે 146 મિલિયન કરતાં વધુ લોકોએ જોયો અને આ સંખ્યા સતત વધી રહી છે. તેના મિત્ર રાજકાલીએ આ વીડિયો શૂટ કરીને પોતાના ઇન્સ્ટાગ્રામ પેજ પર પોસ્ટ કર્યો હતો અને સોશિયલ મીડિયા પર તેની ભરપૂર પ્રશંસા થઈ રહી છે.
આ ગીત વાઇરલ થવા પાછળનું કારણ રાજુએ જણાવતાં કહ્યું હતું કે તેઓ સુરતમાં પોતાના મિત્રને મળવા ગયા હતા ત્યારે તેમનો મૂડ ખરાબ હતો અને “દિલ તૂટ્યું હતું”. એ સમયે તેમના મિત્રએ તેમને ગીત ગાવા માટે કહ્યું. રાજુ પાસે ત્યારે કોઈ મ્યુઝિકલ ઇન્સ્ટ્રુમેન્ટ નહોતું, એટલે તેમણે ત્યાં જ પડેલો એક પથ્થર ઊંચકીને ગીત ગાયું. તેણે પોતાના મિત્રને કહ્યું કે “દિલ તૂટી ગયું છે, દિલ તૂટી જાય ત્યારે જે ગીત હોય છે એ તને સંભળાવીશ.” તેના મિત્રએ તેના ગીતનો વીડિયો સોશિયલ મીડિયા પર મૂક્યો અને એ વાઇરલ થઈ ગયો.
રાજુએ વધુમાં જણાવ્યું હતું કે તૂટેલા પથ્થરથી સંગીત કઈ રીતે વગાડી શકાય એ તેણે ટ્રેનમાં એક છોકરાને આવી જ રીતે પથ્થરથી સંગીત વગાડતો જોઈને શીખ્યું હતું. તેણે તે છોકરા પાસેથી 15 દિવસની તાલીમ લીધી હતી. ત્યારે રાજુએ ક્યારેય વિચાર્યું નહોતું કે આવી રીતે પથ્થર વગાડીને પણ ગીત ગાવાથી લોકો તેમને આટલો પ્રેમ આપશે. એક સમયે રાજુને કોઈ ઓળખતું નહોતું, પરંતુ આજે ગુજરાતની એક સામાન્ય વ્યક્તિને દેશભરના લોકો ઓળખી રહ્યા છે અને તેમના ગીતને ખૂબ જ પસંદ કરી રહ્યાં છે.
હાલમાં રાજુએ પોતાનું એક ઇન્સ્ટાગ્રામ આઇડી “રાજુ કલાકાર” પણ બનાવી દીધું છે, જેના પર ગણતરીના કલાકોમાં જ તેમને 102K ફોલોવર્સ પણ મળી ગયા છે. રાજુ ભાટની આ કહાની દર્શાવે છે કે કલા અને પ્રતિભાને કોઈ સીમાડા નથી હોતા અને ઘણીવાર સૌથી અસામાન્ય સંજોગોમાં જ સૌથી અદ્ભુત કલાનો જન્મ થાય છે.
આ પણ વાંચો: અમદાવાદ: ગ્રામજનોની ફરિયાદ બાદ અમદાવાદના સાંસદે લખ્યો MLAને પત્ર
આ પણ વાંચો: Gujarat Universityનાં કુલપતિના ઘરે NSUIનો હોબાળો, પ્રોફેસરોને વધુ રૂપિયા આપવાનો આક્ષેપ
આ પણ વાંચો: ગુજરાત ગૌરવ દિને મુખ્યમંત્રી ભૂપેન્દ્ર પટેલે પંચમહાલ જિલ્લાને રૂ.૬૪૪.૭૨ કરોડના વિકાસકામોની ધરી ભેટ
