National News: વડાપ્રધાન નરેન્દ્ર મોદી (Narendra Modi) તેમની બે દિવસીય મુલાકાતે મોરેશિયસ (Mauritius) પહોંચી ગયા છે. અધિકારીઓએ જણાવ્યું કે મંગળવારથી શરૂ થનારી મુલાકાત દરમિયાન પીએમ મોદી ક્ષમતા નિર્માણથી લઈને સમુદાય આધારિત ઈન્ફ્રાસ્ટ્રક્ચર પ્રોજેક્ટ્સ સુધીના 20થી વધુ ભારત નિર્મિત પ્રોજેક્ટ્સનું ઉદ્ઘાટન કરશે.
આ દરમિયાન પીએમ મોદી તેમના સમકક્ષ નવીનચંદ્ર રામગુલામ સાથે સિવિલ સર્વિસ કોલેજ બિલ્ડિંગનું ઉદ્ઘાટન કરશે. અંદાજે 4.75 મિલિયન ડોલરના ખર્ચે આ ઈમારતનું નિર્માણ પૂર્ણ થયું છે. આ પ્રોજેક્ટ માટે 2017માં એક મેમોરેન્ડમ ઓફ અન્ડરસ્ટેન્ડિંગ (એમઓયુ) પર હસ્તાક્ષર કરવામાં આવ્યા હતા.
મોદી 20 સામુદાયિક પ્રોજેક્ટ્સ અને વિસ્તાર આરોગ્ય કેન્દ્રોનું પણ ઈ-ઉદઘાટન કરશે, જે લગભગ 7 કરોડ રૂપિયાના ખર્ચે તૈયાર કરવામાં આવ્યા છે. આ સામુદાયિક પ્રોજેક્ટ્સમાં રમતગમત સંબંધિત માળખાકીય સુવિધાઓનો પણ સમાવેશ કરવામાં આવ્યો છે.
તમામ 34 મંત્રીઓએ પીએમ મોદીનું સ્વાગત કર્યું
એરપોર્ટ પર પહોંચતા જ પીએમ મોદીનું ઉષ્માભર્યું સ્વાગત કરવામાં આવ્યું હતું. મોરેશિયસના નાયબ વિદેશ મંત્રી હંબીરાજન નરસિમ્હને કહ્યું કે વડાપ્રધાન નરેન્દ્ર મોદીની મોરેશિયસ મુલાકાતથી તેઓ સન્માનિત છે. તેને ‘ખાસ પ્રસંગ’ ગણાવતા તેમણે કહ્યું કે વડાપ્રધાન મોદીના સ્વાગત માટે તમામ 34 મંત્રીઓ એરપોર્ટ પર હાજર રહેશે. તેમણે કહ્યું કે પીએમ મોદીનું ખૂબ જ ધામધૂમથી સ્વાગત કરવામાં આવશે.
નરસિંહને 2015માં વડાપ્રધાન મોદીની મોરેશિયસની મુલાકાતને યાદ કરી અને કહ્યું કે ભારત ઘણા ક્ષેત્રોમાં તેમના દેશ માટે “રોલ મોડલ” છે. તેમણે કહ્યું, ‘મોદી 10 વર્ષથી વધુ સમય પછી મોરેશિયસ આવી રહ્યા છે. તેમની છેલ્લી મુલાકાત 2015માં થઈ હતી.
)
આપને જણાવી દઈએ કે વડાપ્રધાન મોદી સોમવારે મોડી રાત્રે બે દિવસની સરકારી મુલાકાતે મોરેશિયસ જવા રવાના થયા હતા. તેઓ 12 માર્ચે રાષ્ટ્રીય દિવસની ઉજવણીમાં મુખ્ય અતિથિ તરીકે ભાગ લેશે. વિદેશ મંત્રાલયે કહ્યું કે આ મુલાકાત “ભારત-મોરેશિયસના કાયમી સંબંધોને મજબૂત” બનાવવા માટે છે.
શું કહ્યું પીએમ મોદીએ?
મોરેશિયસની મુલાકાત પહેલા વડાપ્રધાન મોદીએ સોમવારે કહ્યું હતું કે આ મુલાકાત બંને દેશો વચ્ચેના સંબંધોમાં એક નવો અને ઉજ્જવળ અધ્યાય ખોલશે. દરમિયાન, મોરેશિયસના વિદેશ પ્રધાન ધનંજય રામફુલે સમાચાર એજન્સી પીટીઆઈને જણાવ્યું હતું કે વડા પ્રધાન મોદીની મુલાકાત દરમિયાન 12 માર્ચે લાઇન ઑફ ક્રેડિટ પર સમજૂતી કરાર (એમઓયુ) પર હસ્તાક્ષર કરવામાં આવશે. 2016માં ભારતે મોરેશિયસને $353 મિલિયનનું વિશેષ આર્થિક પેકેજ આપ્યું હતું. જેમાં મેટ્રો એક્સપ્રેસ પ્રોજેક્ટ, સુપ્રીમ કોર્ટ બિલ્ડીંગ, નવી ENT હોસ્પિટલ, સોશિયલ હાઉસિંગ પ્રોજેક્ટ અને શાળાના બાળકો માટે ડિજિટલ ટેબલેટનો સમાવેશ થાય છે.
મોરેશિયસ અને ભારતના ગાઢ સંબંધો છે
મોરેશિયસ આફ્રિકન ખંડના સૌથી નાના દેશોમાંનો એક છે. અહીંની કુલ 12 લાખ વસ્તીમાંથી લગભગ 70 ટકા ભારતીય મૂળના છે. આ મુલાકાત પહેલા પીએમ મોદી એકવાર મોરેશિયસ ગયા હતા. પીએમ મોદીએ માર્ચ 2015માં રાષ્ટ્રીય દિવસની ઉજવણીના પ્રસંગે મોરેશિયસની મુલાકાત લીધી હતી.
