Vadodara News : વડોદરા જિલ્લાના કલેક્ટર Anil Dhameliyaના અધ્યક્ષસ્થાને કલેક્ટર કચેરી ખાતે પ્રી-મોન્સૂન (Pre Monsoon) તૈયારીઓ અંગે મહત્વપૂર્ણ સમીક્ષા બેઠક યોજાઈ હતી. બેઠકમાં શહેર અને ગ્રામ્ય વિસ્તારોમાં ચોમાસા દરમિયાન ઊભી થતી સમસ્યાઓને પહોંચી વળવા વિવિધ વિભાગોને આગોતરા તૈયારી રાખવા સૂચનાઓ આપવામાં આવી હતી.
કંટ્રોલ રૂમથી લઈ પાણી નિકાલ સુધી તૈયારી
કલેક્ટરે ચોમાસા દરમિયાન 24 કલાક કંટ્રોલ રૂમ કાર્યરત રાખવા, પાણી ભરાતા વિસ્તારોમાં સમયસર કામગીરી કરવા તેમજ ગટર, કેનાલ અને વરસાદી પાણીના નિકાલની વ્યવસ્થા સુનિશ્ચિત કરવા પર ભાર મૂક્યો હતો. સાથે જ પીવાના પાણીમાં ક્લોરિનેશન અને શહેરમાં સ્વચ્છતા જળવાઈ રહે તે માટે પણ ખાસ સૂચનાઓ આપવામાં આવી.
જર્જરિત મકાનો અને હોર્ડિંગ્સ પર ખાસ નજર
ચોમાસા દરમિયાન અકસ્માત ટાળવા માટે શહેર અને ગ્રામ્ય વિસ્તારોમાં આવેલા જર્જરિત મકાનોની યાદી તૈયાર કરવા તેમજ મોટા હોર્ડિંગ્સનું નિરીક્ષણ કરીને જરૂરી હોય ત્યાં દૂર કરવાની સૂચનાઓ આપવામાં આવી હતી. ફાયર અને રેસ્ક્યુ ટીમના સાધનોની ચકાસણી કરવા પણ અધિકારીઓને જણાવાયું.
ગામડાઓમાં રેસ્ક્યુ અને આરોગ્ય સેવાઓ પર ફોકસ
વધુ વરસાદમાં કેટલાક ગામો સંપર્કવિહોણા બની જાય તેવી પરિસ્થિતિને ધ્યાનમાં રાખીને તંત્રને રેસ્ક્યુ માટે સજ્જ રહેવા સૂચના અપાઈ હતી. પ્રાથમિક આરોગ્ય કેન્દ્રોમાં વીજળી, દવાઓ અને તબીબી સ્ટાફ ઉપલબ્ધ રહે તેની સમીક્ષા પણ બેઠકમાં કરવામાં આવી હતી.
પૂર અને વાવાઝોડા સામે તકેદારી
બેઠકમાં ડેમોના પ્રી-મોન્સૂન (Pre Monsoon) ઇન્સ્પેક્શન, વૃક્ષો પડવાના બનાવોમાં ઝડપી કામગીરી તેમજ પુર, ભારે વરસાદ અને વાવાઝોડા જેવી પરિસ્થિતિમાં લોકોનું સમયસર સ્થળાંતર થાય તે માટે આગોતરા આયોજન અંગે ચર્ચા કરવામાં આવી હતી.
અધિકારીઓ ઉપસ્થિત રહ્યા
બેઠકમાં જિલ્લા વિકાસ અધિકારી Mamta Hirpara, જિલ્લા પોલીસ અધિક્ષક Sushil Agrawal સહિત વિવિધ વિભાગોના અધિકારીઓ હાજર રહ્યા હતા.
