Rajkot Gas Cylinder Blast: રાજકોટ શહેરના સહકાર મેઈન રોડ પર આવેલી સાધના સોસાયટીમાં આજે બપોરે એક રહેણાંક મકાનમાં ગેસ સિલિન્ડર બ્લાસ્ટ (Blast) થતા ભારે અફરાતફરી મચી ગઈ હતી. 40 જેટલા ગેસ સિલિન્ડર અને 5 ડીઝલના કેરબા વચ્ચે થયેલા આ બ્લાસ્ટમાં એક 20 વર્ષીય યુવાન ગંભીર રીતે દાઝી ગયો છે. ફાયર બ્રિગેડની સતર્કતાને કારણે મોટી જાનહાનિ ટળી છે, પરંતુ આ ઘટનાએ રહેણાંક વિસ્તારોમાં ચાલતા ગેરકાયદેસર સ્ટોરેજ સામે મોટા સવાલો ઉભા કર્યા છે.
શું હતી સમગ્ર ઘટના?
સાધના સોસાયટી શેરી નંબર 2/5 ના ખૂણે આવેલા એક G+2 બિલ્ડિંગના પાર્કિંગમાં કેટરર્સનો સામાન રાખવામાં આવ્યો હતો. આજે બપોરે અંદાજે 12.55 વાગ્યે અચાનક ગેસના બાટલામાં બ્લાસ્ટ થયો હતો. મકાન માલિક અશોકભાઈ રૈયાણીના જણાવ્યા મુજબ, તેઓ પાણી ગરમ કરી રહ્યા હતા ત્યારે આ દુર્ઘટના બની હતી. જોકે, ઘટનાસ્થળેથી ગેસ રિફિલિંગ કરવાની ઈલેક્ટ્રિક મોટર મળી આવતા ફાયર વિભાગને આશંકા છે કે ગેરકાયદેસર રિફિલિંગ દરમિયાન આ બ્લાસ્ટ થયો હોવો જોઈએ.
Blast થવાનું કારણ
ફાયર ફાઈટરો જ્યારે ઘટનાસ્થળે પહોંચ્યા ત્યારે દ્રશ્યો જોઈને ચોંકી ગયા હતા. પાર્કિંગમાં અંદાજે 40 જેટલા LPG સિલિન્ડર અને ડીઝલના 5 કેરબા પડ્યા હતા. જો આગ આ જથ્થા સુધી પહોંચી હોત તો આખી સોસાયટીમાં મોટી તબાહી મચી શકી હોત. આગમાં 20 વર્ષીય મોહિતગોહિલ નામના વ્યક્તિ દાઝી જતાં તેને તાત્કાલિક સિવિલ હોસ્પિટલમાં ખસેડવામાં આવ્યા છે.
તંત્ર દ્વારા કડક કાર્યવાહી
આ ઘટના બાદ તંત્ર એક્શન મોડમાં આવ્યું છે:
પુરવઠા વિભાગની કાર્યવાહી: પુરવઠા વિભાગે સ્થળ પરથી 40 ગેસ સિલિન્ડર અને ડીઝલના બેરલ કબજે કર્યા છે.
નોટિસ ફટકારાઈ: ફાયર વિભાગે મકાન માલિકને રહેણાંક વિસ્તારમાંથી તમામ જોખમી સામગ્રી હટાવવા અને બિલ્ડિંગની BU પરમિશન સહિતના ડોક્યુમેન્ટ રજૂ કરવા નોટિસ આપી છે.
પોલીસ તપાસ: ભક્તિનગર પોલીસ સ્ટેશનમાં આ મામલે જાણવા જોગ એન્ટ્રી કરવામાં આવી છે અને આગળની તપાસ હાથ ધરવામાં આવી છે.
આ બ્લાસ્ટ(Blast) ને કારણે પાર્કિંગમાં પડેલી કાર અને એક્ટિવા જેવા વાહનોને પણ નુકસાન પહોંચ્યું છે. સદનસીબે, ફાયર બ્રિગેડના જવાનોએ સમયસર આગ (Blast)પર કાબૂ મેળવી લેતા આસપાસના રહીશોનો જીવ બચ્યો હતો.
આ પણ વાંચો: રાજકોટમાં યસ બેંકમાં મોડી રાત્રે ફાટી નીકળી આગ, ફાયર બ્રિગેડની જહેમત બાદ કાબૂમાં
આ પણ વાંચો: રાજકોટમાં મનમંદિર ફ્લેટમાં લાગેલી આગમાં માતાપુત્રના મોત
આ પણ વાંચો: રાજકોટ જેતપુરના રબારીકા રોડ પર ટેકસટાઇલના કારખાનામાં લાગી આગ
