Business News : રિટેલ ફુગાવાનો નવેમ્બરમાં દર ઘટીને 5.48 % પર આવી ગયો છે. રિટેલ ફુગાવાનો દર ગયા મહિના કરતાં 0.73 % ઓછો છે. ખાદ્યપદાર્થો મોંઘા થવાને કારણે ઓક્ટોબરમાં રિટેલ ફુગાવો 6.21% પર પહોંચી ગયો હતો. આ 14 મહિનામાં સૌથી વધુ સ્તર હતું. હવે ખાદ્ય ચીજવસ્તુઓના ભાવ ઘટવાને કારણે ફુગાવો ઘટ્યો છે. ફુગાવાની બાસ્કેટમાં ખાદ્ય પદાર્થોનો ફાળો લગભગ 50% જેટલો છે.
ઓક્ટોબરની સરખામણીમાં ફુગાવાના આંકડા
શહેરી ફુગાવો : 5.62% થી ઘટીને 4.83%
ગ્રામીણ ફુગાવો : 6.68% થી ઘટીને 5.95%
ખાદ્ય ફુગાવો : 10.87% થી ઘટીને 9.04%
| સામગ્રી | ઓક્ટોબર | નવેમ્બર |
| અનાજ | 6.94 % | 6.88 % |
| માંસ અને માછલી | 3.17 % | 4.67 % |
| દૂધ | 2.97 % | 2.85 % |
| રસોઈ તેલ | 9.51 % | 13.28 % |
| ફળ | 8.43 % | 7.68 % |
| શાકભાજી | 42.18 % | 29.33 % |
| કઠોળ | 7.43 % | 5.41 % |
| મસાલા | -7.01 % | -7.43 % |
| સોફિટ ડ્રિંક | 2.73 % | 2.72 % |
| પાન, તમાકુ | 2.50 % | 2.35 % |
| કપડાં, ફૂટવેર | 2.70 % | 2.75 % |
| ફયૂલ અને લાઈટ | -1.61 % | -1.83 % |
ફુગાવો કેવી રીતે વધે છે અને ઘટે છે?
ફુગાવાનો વધારો અને ઘટાડો ઉત્પાદનની માંગ અને પુરવઠા પર આધારિત છે. જો લોકો પાસે વધુ પૈસા હશે તો તેઓ વધુ વસ્તુઓ ખરીદશે. વધુ વસ્તુઓ ખરીદવાથી વસ્તુઓની માંગ વધશે અને જો માંગ પ્રમાણે પુરવઠો નહીં મળે તો આ વસ્તુઓની કિંમતમાં વધારો થશે. આ રીતે બજાર ફુગાવા માટે સંવેદનશીલ બને છે. સરળ શબ્દોમાં કહીએ તો, નાણાંનો વધુ પડતો પ્રવાહ અથવા બજારમાં માલની અછત ફુગાવાનું કારણ બને છે. જ્યારે માંગ ઓછી અને પુરવઠો વધુ હશે તો ફુગાવો ઓછો થશે.
ગ્રાહક તરીકે, તમે અને હું છૂટક બજારમાંથી માલ ખરીદીએ છીએ. આને લગતી કિંમતોમાં ફેરફાર દર્શાવવાનું કામ કન્ઝ્યુમર પ્રાઇસ ઇન્ડેક્સ એટલે કે CPI દ્વારા કરવામાં આવે છે. CPI એ સામાન અને સેવાઓ માટે જે સરેરાશ કિંમત ચૂકવીએ છીએ તે માપે છે. ક્રૂડ ઓઈલ, કોમોડિટીના ભાવ, ઉત્પાદિત ખર્ચ ઉપરાંત અન્ય ઘણી બાબતો છે જે છૂટક ફુગાવાના દરને નિર્ધારિત કરવામાં મહત્વની ભૂમિકા ભજવે છે. લગભગ 300 વસ્તુઓ એવી છે કે જેના ભાવના આધારે છૂટક ફુગાવાનો દર નક્કી કરવામાં આવે છે.
