Sports News : IPL 2026ની સિઝન લખનૌ સુપર જાયન્ટ્સ (LSG) માટે નિરાશાજનક રહી હતી. ટીમ આખી સિઝન દરમિયાન સંઘર્ષ કરતી જોવા મળી અને પ્લેઓફ સુધી પહોંચવામાં નિષ્ફળ રહી. સતત ખરાબ પ્રદર્શન અને ટીમની નિષ્ફળતા વચ્ચે હવે એક મોટો ફેરફાર સામે આવ્યો છે. LSGના કેપ્ટન ઋષભ પંતે (Rishabh Pant) કેપ્ટનશીપ છોડવાનો નિર્ણય લીધો છે. મીડિયા રિપોર્ટ્સ મુજબ, પંતે ફ્રેન્ચાઇઝી મેનેજમેન્ટને પોતાની કેપ્ટનશીપની જવાબદારીમાંથી મુક્ત કરવાની વિનંતી કરી હતી. ત્યારબાદ લખનૌ સુપર જાયન્ટ્સે સોશિયલ મીડિયા પર સત્તાવાર જાહેરાત કરી હતી.
સિઝન દરમિયાન ટીમનું પ્રદર્શન રહ્યું નબળું
આ સિઝનમાં LSGની બેટિંગ અને બોલિંગ બંને વિભાગમાં અસંતુલન જોવા મળ્યું હતું. ટીમ ઘણી મહત્વપૂર્ણ મેચોમાં દબાણ હેઠળ તૂટી પડી હતી. કેપ્ટન તરીકે ઋષભ પંત પર પણ સતત સવાલો ઉઠતા રહ્યા હતા.
ટીમના કેટલાક સ્ટાર ખેલાડીઓ અપેક્ષા મુજબનું પ્રદર્શન આપી શક્યા નહોતાં, જેના કારણે પોઈન્ટ્સ ટેબલમાં ટીમ પાછળ રહી ગઈ હતી. ચાહકોમાં પણ ટીમના પ્રદર્શનને લઈને ભારે નિરાશા જોવા મળી હતી.
પંતનો નિર્ણય ચાહકો માટે આશ્ચર્યજનક
ઋષભ પંત (Rishabh Pant) નો આ નિર્ણય ક્રિકેટ જગતમાં ચર્ચાનો વિષય બન્યો છે. ઘણા ચાહકો માને છે કે ટીમના સતત ખરાબ પ્રદર્શન બાદ પંતે આ પગલું લીધું છે જેથી ફ્રેન્ચાઇઝી આગામી સિઝન માટે નવા નેતૃત્વ સાથે આગળ વધી શકે.
હવે સૌથી મોટો સવાલ એ છે કે IPL 2027 માટે લખનૌ સુપર જાયન્ટ્સનો નવો કેપ્ટન કોણ બનશે. ફ્રેન્ચાઇઝી આગામી દિવસોમાં નવા કેપ્ટનની જાહેરાત કરી શકે છે.
સોશિયલ મીડિયા પર ચાહકોની પ્રતિક્રિયા
LSG દ્વારા જાહેરાત થયા બાદ સોશિયલ મીડિયા પર ચાહકો અલગ અલગ પ્રતિક્રિયા આપી રહ્યા છે. કેટલાક લોકોએ ઋષભ પંતના (Rishabh Pant) નિર્ણયને જવાબદારીપૂર્ણ ગણાવ્યો છે તો કેટલાક ચાહકો માને છે કે તેમને વધુ એક તક મળવી જોઈએ હતી.
આગામી સિઝન પહેલા હવે LSGમાં મોટા ફેરફારો જોવા મળી શકે છે અને ટીમ મેનેજમેન્ટ નવા પ્લાન સાથે મેદાનમાં ઉતરવાની તૈયારી કરી રહ્યું છે.
