Mehsana News: વિજાપુર નજીક સાબરમતી નદીના કિનારે ચાલી રહેલા દેશી દારૂના ગોરખધંધાને લઈને લાંબા સમયથી સ્થાનિક લોકોમાં અસંતોષ અને ભયનું માહોલ હતો. અનેકવાર ફરિયાદો મળ્યા બાદ અંતે મહેસાણા LCB (લોકલ ક્રાઈમ બ્રાંચ)ની ટીમે ગુપ્ત માહિતીના આધારે અચાનક દરોડો પાડ્યો.
આ દરોડા દરમિયાન પોલીસે સાબરમતી નદીના તટ પર ચાલતા દેશી દારૂના ભઠ્ઠાઓ પર ત્રાટકી, મોટા પાયે ગેરકાયદે દારૂની બનાવટ અને છુપાવવાની વ્યવસ્થા પકડી પાડી હતી. પોલીસે વિજાપુર તાલુકાના ભાથીપુરા ગામના ત્રણ બુટલેગરોની સંડોવણી બહાર પાડી છે.
પ્રાથમિક માહિતી મુજબ, બુટલેગરો નદીના કિનારે રાત્રિના સમયે ગેરકાયદે રીતે દારૂ ગાળી બનાવતા હતા. તે દારૂ નાના કેરબામાં ભરીને ભાણપુર ગામના બિનવારસી મકાનમાં છુપાવાતો હતો. પોલીસને મળેલી ચોક્કસ માહિતીના આધારે જ્યારે LCB ટીમે રેડ પાડી, ત્યારે ત્યાંથી મોટી માત્રામાં દારૂ મળી આવ્યો.
પોલીસે સ્થળ પરથી 42 મોટા કેરબામાં ભરેલ 1,470 લીટર દેશી દારૂ ઝડપ્યો હતો, જેની કુલ બજાર કિંમત આશરે રૂ. 2.94 લાખ ગણવામાં આવી છે.
અધિકારીઓએ જણાવ્યું કે, “આ બુટલેગરો લાંબા સમયથી સાબરમતી નદીના કિનારે ભઠ્ઠા ચલાવી રહ્યા હતા. તેઓ નદીના પાણીનો ઉપયોગ કરીને દારૂ બનાવતા અને તેને રાત્રે બિનવારસી મકાનમાં ગાળી રાખતા. નગરજનોની સતત ફરિયાદો બાદ પોલીસે કાર્યવાહી હાથ ધરી હતી.”
દરોડા દરમ્યાન ત્રણ મુખ્ય આરોપીઓ ફરાર થવામાં સફળ રહ્યા છે, પરંતુ પોલીસે તેમની ઓળખ મેળવી લીધી છે અને તેમની ધરપકડ માટે તલાશી કામગીરી શરૂ કરી દીધી છે.
વિજાપુર પોલીસ મથકના PIએ જણાવ્યું કે, “આ વિસ્તાર લાંબા સમયથી બુટલેગિંગ માટે કિખ્યાત રહ્યો છે. પરંતુ આ વખતનો દરોડો સૌથી મોટો ગણાય છે. આગામી દિવસોમાં વધુ દરોડા પાડવામાં આવશે જેથી દારૂના ગોરખધંધાને પૂરેપૂરો ખતમ કરી શકાય.”
સ્થાનિક લોકોએ પોલીસની આ કાર્યવાહીનું સ્વાગત કર્યું છે અને જણાવ્યું કે નદીના કિનારે ચાલતા ગેરકાયદે દારૂના ધંધાને કારણે યુવાનોમાં નશાની લત ફેલાઈ રહી હતી. ગામના એક વડીલે કહ્યું કે, “પોલીસે સાચો સમય જોયો અને યોગ્ય પગલું ભર્યું છે. હવે આવા લોકો સામે કડક કાર્યવાહી થવી જ જોઈએ.”
LCB ટીમે દારૂ સાથે મળેલા કેરબા, ભઠ્ઠાની સામગ્રી અને અન્ય સાધનો કબજે કર્યા છે. તપાસ દરમ્યાન જાણવા મળ્યું છે કે આ બુટલેગરો દર અઠવાડિયે 300 લીટરથી વધુ દારૂ તૈયાર કરતા અને આસપાસના ગામોમાં પુરવઠો કરતા હતા.
મહેસાણા પોલીસ અધિક્ષક દ્વારા આ દરોડાને મોટી સફળતા ગણાવવામાં આવી છે અને ટીમને પ્રશંસા પાઠવવામાં આવી છે. પોલીસ હવે દારૂના પુરવઠા ચેઇન સુધી પહોંચી વધુ લોકો સામે કાર્યવાહી કરવા માટે તપાસ આગળ વધારશે.
