Sandeep Pathak BJP News: ભાજપના નવા રાષ્ટ્રીય અધ્યક્ષ નીતિન નવીન દ્વારા 64 સભ્યોની નવી રાષ્ટ્રીય ટીમ ( Nitin Nabin BJP Team) જાહેર કરવામાં આવી છે. આ ટીમમાં આમ આદમી પાર્ટી (AAP) છોડીને ભાજપમાં જોડાયેલા 7 રાજ્યસભા સાંસદોમાંથી સંદીપ પાઠકને રાષ્ટ્રીય સચિવ (Sandeep Pathak BJP) તરીકે સ્થાન મળ્યું છે. પાઠકને સંગઠન અને ચૂંટણીની રણનીતિના નિષ્ણાત તરીકે જોવામાં આવે છે. ખાસ કરીને પંજાબમાં AAPના સંગઠનને મજબૂત બનાવવામાં તેમની મહત્વની ભૂમિકા રહી હોવાનું માનવામાં આવે છે.

Sandeep Pathak BJP: 7 સાંસદોમાંથી માત્ર પાઠકને મહત્વની જવાબદારી

AAPમાંથી ભાજપમાં જોડાયેલા સાત રાજ્યસભા સાંસદોમાંથી સંદીપ પાઠકને જ ભાજપની નવી રાષ્ટ્રીય ટીમમાં (BJP National Team 2026) સંગઠનાત્મક જવાબદારી આપવામાં આવી છે. રાષ્ટ્રીય સચિવ તરીકેની (National Secretary) તેમની નિમણૂકને ભાજપ દ્વારા તેમના રાજકીય અને સંગઠનાત્મક અનુભવના ઉપયોગ તરીકે જોવામાં આવી રહી છે.

કેમ્બ્રિજમાંથી PhD, IIT દિલ્હીમાં પ્રોફેસર

સંદીપ પાઠકનો રાજકારણમાં પ્રવેશ અન્ય ઘણા નેતાઓથી અલગ રહ્યો છે. છત્તીસગઢના વતની પાઠકે કેમ્બ્રિજ યુનિવર્સિટીમાંથી PhD કરી હતી. ત્યારબાદ તેમણે ઓક્સફર્ડ અને MITમાં સંશોધન કર્યું હતું અને IIT દિલ્હીમાં પ્રોફેસર તરીકે પણ સેવા આપી હતી. રાજકારણમાં આવ્યા બાદ તેમણે પરંપરાગત રાજકીય ભાષણો કરતાં ડેટા એનાલિસિસ, સર્વે, બૂથ લેવલ મેનેજમેન્ટ અને માઇક્રો-મેનેજમેન્ટ પર વધુ ભાર મૂક્યો હતો.

AAPમાં ‘ચાણક્ય’ તરીકે ઓળખ

AAPમાં સંદીપ પાઠકને પાર્ટીના મહત્વના રણનીતિકારોમાં ગણવામાં આવતા હતા. ડિસેમ્બર 2022માં તેમના માટે પાર્ટીમાં રાષ્ટ્રીય મહાસચિવનું નવું પદ પણ બનાવવામાં આવ્યું હતું. 2017ની પંજાબ વિધાનસભા ચૂંટણી બાદ તેમણે સંગઠનને બૂથ સ્તર સુધી મજબૂત કરવા માટે લાંબા સમય સુધી કામ કર્યું હોવાનું જણાવાય છે. આ જ સંગઠનાત્મક મોડલને 2022ની ચૂંટણીમાં AAPની સફળતા સાથે પણ જોડવામાં આવે છે.

2022માં પંજાબમાં AAPની મોટી જીત

2022ની પંજાબ વિધાનસભા ચૂંટણીમાં AAPએ 117માંથી 92 બેઠકો જીતી હતી. પંજાબમાં પાર્ટીના ગ્રાઉન્ડ સંગઠન અને ચૂંટણી રણનીતિમાં સંદીપ પાઠકની ભૂમિકા મહત્વપૂર્ણ રહી હોવાનું માનવામાં આવે છે. હવે 2027ની પંજાબ વિધાનસભા ચૂંટણીને ધ્યાનમાં રાખીને ભાજપ તેમની સંગઠનાત્મક ક્ષમતા અને ચૂંટણીના અનુભવનો ઉપયોગ કરવા માગે છે તેવી રાજકીય ચર્ચા શરૂ થઈ છે.

ભાજપ માટે પંજાબમાં મોટો દાવ

2027ની પંજાબ વિધાનસભા ચૂંટણી પહેલાં ભાજપ સંગઠનને મજબૂત કરવા માટે સંદીપ પાઠકની નિમણૂકને મહત્વપૂર્ણ માનવામાં આવી રહી છે. પંજાબના ગ્રામીણ વિસ્તારોમાં સંગઠન ઊભું કરવું અને બૂથ સ્તરે પાર્ટીની હાજરી મજબૂત કરવી ભાજપ માટે મોટો પડકાર છે. પાઠકને આ પ્રકારના માઇક્રો-મેનેજમેન્ટ અને ગ્રાઉન્ડ લેવલ ચૂંટણી રણનીતિનો અનુભવ હોવાથી ભાજપ તેમની ક્ષમતાનો ઉપયોગ પંજાબમાં કરી શકે છે.

કેજરીવાલ માટે રાજકીય આંચકો?

સંદીપ પાઠકને AAPમાં અરવિંદ કેજરીવાલના નજીકના અને મહત્વના રણનીતિકારોમાં ગણવામાં આવતા હતા. તેથી હવે તેમને ભાજપમાં રાષ્ટ્રીય સચિવની જવાબદારી મળવી AAP માટે સંગઠનાત્મક નુકસાન તરીકે જોવામાં આવી રહી છે. ખાસ કરીને 2022ની પંજાબની ચૂંટણીમાં મહત્વની ભૂમિકા ભજવનારા નેતાઓમાંથી એક ભાજપમાં પહોંચતા આગામી પંજાબ ચૂંટણીમાં તેની અસર જોવા મળે છે કે નહીં તેના પર રાજકીય વર્તુળોની નજર રહેશે.

હવે પાઠક સામે મોટો પડકાર

ભાજપે સંદીપ પાઠકને રાષ્ટ્રીય સ્તરે જવાબદારી સોંપીને તેમની સંગઠનાત્મક ક્ષમતા પર વિશ્વાસ વ્યક્ત કર્યો છે. હવે તેમની સામે માત્ર પંજાબ પૂરતું નહીં પરંતુ ભાજપના રાષ્ટ્રીય સંગઠનમાં પણ પોતાની રણનીતિક ક્ષમતા સાબિત કરવાનો પડકાર રહેશે. ખાસ કરીને 2027ની પંજાબ વિધાનસભા ચૂંટણી તેમના માટે મોટી કસોટી બની શકે છે.

આ પણ વાંચો: નીતિન નવીનની નવી ટીમની જાહેરાત: વસુંધરા રાજે, રામ માધવ અને સ્મૃતિ ઈરાનીને મળી મહત્વની જવાબદારી

આ પણ વાંચો: ભાજપની નવી રાષ્ટ્રીય ટીમમાં ગુજરાતના 4 નેતાઓને સ્થાન, હેમાંગ જોશી બન્યા રાષ્ટ્રીય યુવા મોરચા અધ્યક્ષ

આ પણ વાંચો: રાશન વિતરણને ગ્રહણ! સર્વર ડાઉનથી ગ્રાહકો પરેશાન, પ્રહલાદ મોદીનો સરકાર પર પ્રહાર