Vadodara Savli Election News: ગુજરાતમાં સ્થાનિક સ્વરાજ્યની ચૂંટણીનો માહોલ ધીમે-ધીમે ગરમાઈ રહ્યો છે. ઉમેદવારી પત્ર ભરવાના અંતિમ દિવસોમાં રાજકીય પારો સાતમા આસમાને પહોંચ્યો છે, ત્યારે વડોદરા જિલ્લાના સાવલીમાંથી એક ચોંકાવનારા સમાચાર સામે આવ્યા છે. સાવલી તાલુકા પંચાયત કચેરીના પ્રાંગણમાં ફોર્મ ભરવા આવેલ બે જૂથો વચ્ચે અચાનક ઉગ્ર બબાલ થઈ હતી, જે જોતજોતામાં મારામારીમાં ફેરવાઈ ગઈ હતી. કચેરીના મેદાનમાં જ સર્જાયેલા આ હાઈડ્રામાના કારણે ભારે નાસભાગ મચી ગઈ હતી.
Savli :કચેરીના પ્રાંગણમાં જ સામસામે આવી ગયા બે જૂથ
પ્રાપ્ત વિગતો અનુસાર, આજે સાવલી તાલુકા પંચાયત કચેરી ખાતે વિવિધ રાજકીય પક્ષો અને અપક્ષ ઉમેદવારો પોતાના સમર્થકો સાથે ઉમેદવારી ફોર્મ ભરવા માટે ઉમટી પડ્યા હતા. આ ભીડભાડ વચ્ચે કોઈ અગમ્ય કારણોસર બે જૂથના લોકો વચ્ચે સામાન્ય બોલાચાલી શરૂ થઈ હતી. આ વિવાદ એટલી હદે વકરી ગયો કે બંને પક્ષના સમર્થકો ઉશ્કેરાઈ ગયા હતા અને જાહેર કચેરીના મેદાનમાં જ એકબીજા પર છૂટાહાથની મારામારી કરવા લાગ્યા હતા.
પોલીસે દોડી આવીને મામલો થાળે પાડ્યો
ફોર્મ ભરવાના સ્થળે અચાનક હિંસક દ્રશ્યો સર્જાતા અન્ય ઉમેદવારો અને કચેરીના કર્મચારીઓમાં ડરનો માહોલ જોવા મળ્યો હતો. જોકે, સદ્ભાગ્યે સ્થળ પર સુરક્ષા માટે તૈનાત સાવલી પોલીસનો કાફલો તાત્કાલિક એક્શનમાં આવ્યો હતો. પોલીસે વચ્ચે પડીને બંને જૂથોને અલગ કર્યા હતા અને મામલો કાબૂમાં લીધો હતો. પોલીસની સમયસૂચકતાના કારણે એક મોટી દુર્ઘટના ટળી હતી, પરંતુ આ બબાલના કારણે ફોર્મ ભરવાની પ્રક્રિયા થોડા સમય માટે ખોરવાઈ ગઈ હતી. સાવલી પોલીસે આ મામલે બંને જૂથના મુખ્ય લોકોની પૂછપરછ શરૂ કરી છે.
લોહિયાળ ચૂંટણીના એંધાણ?
સ્થાનિક સ્વરાજ્યની ચૂંટણીના હજુ તો પ્રારંભિક તબક્કા ચાલી રહ્યા છે. માત્ર ફોર્મ ભરવાના દિવસે જ જો ઉમેદવારો અને સમર્થકો આટલા ઉગ્ર બનીને મારામારી પર ઉતરી આવતા હોય, તો આવનારા દિવસોમાં ચૂંટણી પ્રચાર અને મતદાન વખતે સ્થિતિ કેટલી વણસી શકે છે તેનો અંદાજ લગાવી શકાય છે. રાજકીય વિશ્લેષકોના મતે આ ઘટના સાવલીમાં એક લોહિયાળ ચૂંટણીના એંધાણ આપી રહી છે. આ ઘટના બાદ સંવેદનશીલ વિસ્તારો અને મતદાન મથકો પર પોલીસ બંદોબસ્ત કડક કરવાની માંગ ઉઠી રહી છે.
આ પણ વાંચો: સ્થાનિક સ્વરાજ્યની ચૂંટણી માટે ગાંધીનગર જિલ્લા અને તાલુકા પંચાયત તથા નપાના ઉમેદવાર જાહેર
આ પણ વાંચો: સ્થાનિક સ્વરાજ્યની ચૂંટણી માટે પાટણ જિલ્લા અને તાલુકા પંચાયત તથા નપાના ઉમેદવાર જાહેર
આ પણ વાંચો: ફોર્મ ન ભરાતા AAP મહિલા ઉમેદવારનો આત્મહત્યાનો પ્રયાસ
