Shashi Tharoor Compares Congress Campaign with CJP Protest: કોંગ્રેસના સાંસદ શશિ થરૂરે(Shashi Tharoor) ફરી એકવાર પોતાની જ પાર્ટીને લઈને એવું નિવેદન આપ્યું છે, જેના કારણે રાજકીય ચર્ચા તેજ બની શકે છે. મુંબઈમાં IIMUNના કાર્યક્રમ દરમિયાન વાતચીત કરતાં થરૂરે કોંગ્રેસના ‘વિદ્યાર્થીઓની ગૂંજ’ અભિયાન અને CJPના વિદ્યાર્થી આંદોલન વચ્ચેનો તફાવત સમજાવ્યો.
થરૂરે સ્વીકાર્યું કે CJPએ વિદ્યાર્થીઓ વચ્ચે જે મુદ્દાઓને લઈને મોટું આંદોલન ઊભું કર્યું, તેમાંથી ઘણા મુદ્દા કોંગ્રેસ અને રાહુલ ગાંધી પહેલેથી જ ઉઠાવી ચૂક્યા હતા. કોંગ્રેસનું ‘વિદ્યાર્થીઓની ગૂંજ’ અભિયાન પણ પેપર લીક અને વિદ્યાર્થીઓની સમસ્યાઓ પર કેન્દ્રિત હતું. તેમ છતાં કોંગ્રેસનું અભિયાન CJPના આંદોલન જેટલી અસર ઊભી કરી શક્યું નહીં.
‘શું અમે Gen-Zનું વલણ ઓળખી ન શક્યા?’
શશિ થરૂરે(Shashi Tharoor) આ તફાવતને લઈને કોંગ્રેસને આત્મમંથન કરવાની સલાહ આપી. તેમણે સવાલ કર્યો કે જો રાજકીય પક્ષ પહેલેથી જ કોઈ મુદ્દો ઉઠાવી રહ્યો હોય અને ત્યારબાદ કોઈ વિદ્યાર્થી સંગઠન એ જ મુદ્દાને લઈને રસ્તા પર ઉતરે અને તેને વધારે અસર મળે, તો પાર્ટીએ પોતાને સવાલ કરવો જોઈએ કે ભૂલ ક્યાં થઈ. થરૂરે સવાલ કર્યો કે શું કોંગ્રેસ યુવાનોને સાંભળવામાં નિષ્ફળ રહી? અથવા પાર્ટી Gen-Z એટલે કે નવી યુવા પેઢીની નાડી ઓળખી શકી નહીં?
તેમના જણાવ્યા મુજબ માત્ર મુદ્દો ઉઠાવવો પૂરતો નથી. તે મુદ્દો યુવાનો સુધી કઈ રીતે પહોંચે છે, તેમની સાથે કઈ ભાષામાં વાત કરવામાં આવે છે અને તેઓ પોતાને તે અભિયાન સાથે કેટલા જોડાયેલા અનુભવે છે, તે પણ મહત્વનું છે.
CJPએ પેપર લીક મુદ્દે શરૂ કર્યું હતું આંદોલન
CJP દ્વારા NEET-UG 2026ના કથિત પેપર લીકના વિરોધમાં 20 જૂનથી આંદોલન શરૂ કરવામાં આવ્યું હતું. આંદોલન દરમિયાન વિદ્યાર્થીઓએ સરકાર પાસે જવાબદારી નક્કી કરવાની અને કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ કરી હતી.
સમય જતાં આ આંદોલનને Gen-Zના વિરોધ તરીકે પણ જોવામાં આવ્યું. આ દરમિયાન વિદ્યાર્થીઓ અને અન્ય કાર્યકરો પણ આ મુદ્દા સાથે જોડાતા ગયા. ત્યારબાદ CJP દ્વારા 20 જુલાઈએ સંસદ માર્ચનું આહ્વાન કરવામાં આવ્યું હતું. પ્રસ્તાવિત માર્ચ પહેલાં જંતર-મંતર પરથી સોનમ વાંગચુકને હટાવવામાં આવ્યા હતા અને 20 જુલાઈએ વિરોધ કરી રહેલા વિદ્યાર્થીઓ સામે પોલીસ કાર્યવાહી પણ થઈ હતી. આ ઘટનાને પગલે વિપક્ષી પાર્ટીઓએ પણ પોલીસ કાર્યવાહીને લઈને સવાલો ઉઠાવ્યા હતા.
કોંગ્રેસે પણ પેપર લીકનો મુદ્દો પહેલેથી ઉઠાવ્યો હતો
કોંગ્રેસનું કહેવું છે કે પેપર લીક અને વિદ્યાર્થીઓની સમસ્યાઓ અંગે તેની વિદ્યાર્થી પાંખ NSUI પહેલેથી જ સક્રિય હતી. 12 મેના રોજ NSUIએ દિલ્હીમાં મોટું પ્રદર્શન કર્યું હતું. ત્યારબાદ રાહુલ ગાંધીએ 17 જૂને રાજસ્થાનના કોટાથી ‘વિદ્યાર્થીઓની ગૂંજ’ અભિયાનની શરૂઆત કરી હતી. આ અભિયાનનો હેતુ વિદ્યાર્થીઓ અને તેમના પરિવારો સાથે સીધો સંવાદ કરવાનો હતો.
રાહુલ ગાંધી બાદમાં દેહરાદૂન પણ પહોંચ્યા હતા, જ્યાં તેમણે પરીક્ષા સંબંધિત કથિત ગેરરીતિથી અસરગ્રસ્ત વિદ્યાર્થીઓ અને તેમના પરિવારો સાથે વાતચીત કરી હતી.
રાહુલ ગાંધીએ પણ ઉઠાવી હતી વિદ્યાર્થીઓની વાત
‘વિદ્યાર્થીઓની ગૂંજ’ અભિયાન દરમિયાન રાહુલ ગાંધીએ શિક્ષણ વ્યવસ્થા અને પેપર લીકના મુદ્દે સરકાર પર નિશાન સાધ્યું હતું. તેમણે વિદ્યાર્થીઓની સમસ્યાઓને દેશવ્યાપી ચર્ચાનો મુદ્દો બનાવવાની વાત કરી હતી. પરંતુ શશિ થરૂરના(Shashi Tharoor) જણાવ્યા મુજબ, આટલી પહેલ છતાં કોંગ્રેસનું અભિયાન તે સ્તરની વ્યાપક વિદ્યાર્થી એકતા ઊભી કરી શક્યું નહીં, જે CJPના આંદોલનમાં જોવા મળી.
Shashi Tharoorના નિવેદનથી કોંગ્રેસ માટે આત્મમંથનનો મોકો
શશિ થરૂરનું(Shashi Tharoor) નિવેદન કોંગ્રેસ માટે મહત્વપૂર્ણ માનવામાં આવી રહ્યું છે. પાર્ટી પાસે મુદ્દાઓ હતા, NSUI દ્વારા પ્રદર્શન પણ કરવામાં આવ્યા હતા અને રાહુલ ગાંધી દ્વારા વિદ્યાર્થીઓ સાથે સીધો સંવાદ પણ કરવામાં આવ્યો હતો. તેમ છતાં યુવાનો વચ્ચે CJPના આંદોલન જેવી રાજકીય ઊર્જા કેમ ઊભી ન થઈ, એ મોટો સવાલ છે.
Gen-Z રાજકારણને પરંપરાગત રીતે જોતી નથી. સોશિયલ મીડિયા, સીધો સંવાદ અને રસ્તા પરના આંદોલન જેવા માધ્યમો તેના માટે મહત્વપૂર્ણ બની રહ્યા છે. આવી સ્થિતિમાં કોંગ્રેસ માટે પડકાર માત્ર યુવાનોના મુદ્દા ઉઠાવવાનો નથી, પરંતુ તે મુદ્દાઓને યુવાનોની પોતાની અવાજ અને પોતાની લડત સાથે જોડવાનો પણ છે. થરૂરના (Shashi Tharoor) નિવેદનનો સૌથી મોટો સંદેશ એ છે કે મુદ્દો સાચો હોવો પૂરતો નથી, પરંતુ તેને લોકો સુધી કઈ રીતે પહોંચાડવામાં આવે છે તે પણ એટલું જ મહત્વનું છે. હવે જોવાનું એ રહેશે કે કોંગ્રેસ આ આત્મમંથનને પોતાની આગામી રાજકીય વ્યૂહરચનામાં કેવી રીતે સામેલ કરે છે.
આ પણ વાંચો:‘આજે ઘણા લોકોની ઉંઘ ઊડી જશે …’, PM મોદીએ શશી થરૂર સાથે સ્ટેજ શેર કર્યો
આ પણ વાંચો:રાહુલ ગાંધી બાદ શશી થરૂર અને અધીર રંજન ચૌધરી પણ કોરોના સંક્રમિત
