કોરોનાના નવા કેસોમાં સતત વધારો થઈ રહ્યો છે. દેશમાં સતત ત્રીજા દિવસે 20 હજારથી વધુ કોરોના કેસ મળી આવ્યા છે. છેલ્લા 24 કલાકમાં દેશમાં કોરોનાના 20 હજાર 528 કેસ નોંધાયા છે, જે ગઈકાલની સરખામણીએ 2.4% વધુ છે. આ સાથે કોવિડને કારણે 49 લોકોએ જીવ ગુમાવ્યા છે. અગાઉ શનિવારે 20,044 જ્યારે શુક્રવારે કોરોનાના 20,038 કેસ નોંધાયા હતા.સ્વાસ્થ્ય મંત્રાલયના જણાવ્યા અનુસાર કેરળમાં સૌથી વધુ નવા કેસ જોવા મળ્યા છે. અહીં 2 હજાર 871 કેસની પુષ્ટિ થઈ છે. આ પછી પશ્ચિમ બંગાળમાં 2 હજાર 839, મહારાષ્ટ્રમાં 2 હજાર 382, તમિલનાડુમાં 2 હજાર 340 અને કર્ણાટકમાં 1 હજાર 374 કેસ નોંધાયા છે.
દેશમાં છેલ્લા 24 કલાકમાં 49 કોરોના સંક્રમિત દર્દીઓના પણ મોત થયા છે, જેના કારણે દેશમાં કોરોનાથી મૃત્યુ પામેલા લોકોની કુલ સંખ્યા વધીને 5 લાખ 25 હજાર 709 થઈ ગઈ છે.દેશમાં કોરોનાનો રિકવરી રેટ હવે 98.47% છે. છેલ્લા 24 કલાકમાં કુલ 17 હજાર 790 દર્દીઓ સાજા થયા છે. હાલમાં દેશમાં કોરોનાના 1 લાખ 43 હજાર 449 સક્રિય કેસ છે. છેલ્લા 24 કલાકમાં સક્રિય કેસોમાં 2,689 નો વધારો થયો છે.
કોરોના રસીકરણના મામલામાં દેશમાં એક નવો રેકોર્ડ બનવા જઈ રહ્યો છે. સંભવ છે કે આજે દેશમાં રસીકરણની કુલ સંખ્યા બે અબજ ડોઝ સુધી પહોંચી શકે છે. આ સાથે ભારત બે અબજથી વધુ ડોઝ આપનારો વિશ્વનો બીજો દેશ બની જશે. ભારત કરતાં વધુ રસીના ડોઝ માત્ર ચીનમાં જ લાગુ કરવામાં આવ્યા છે.
