New Delhi News : પશ્ચિમ બંગાળના રાજકારણમાં મોટા ફેરફારોના સંકેતો વચ્ચે તૃણમૂલ કોંગ્રેસ (TMC)માં આંતરિક અસંતોષ હવે ખુલ્લેઆમ સામે આવતો જોવા મળી રહ્યો છે. દિલ્હીમાં ભાજપના વરિષ્ઠ નેતા ભૂપેન્દ્ર યાદવના નિવાસસ્થાને થયેલી બેઠક બાદ પાર્ટીમાં મોટા ભાગલાની અટકળો તેજ બની છે.
સૂત્રોના જણાવ્યા મુજબ, તૃણમૂલ કોંગ્રેસના 14 લોકસભા સાંસદોએ પશ્ચિમ બંગાળના વિપક્ષના નેતા શુભેન્દુ અધિકારી સાથે મહત્વપૂર્ણ બેઠક કરી હતી. આ બેઠકમાં ભાજપના નેતા અને ત્રિપુરાના પૂર્વ મુખ્યમંત્રી બિપ્લબ દેબ પણ હાજર રહ્યા હોવાનું કહેવાય છે.
રાજકીય વર્તુળોમાં એવી ચર્ચા છે કે ટીએમસીના કેટલાક સાંસદો પાર્ટીના વર્તમાન નેતૃત્વથી નારાજ છે અને લોકસભામાં નવી નેતાગીરીની માંગ કરી રહ્યા છે. બળવાખોર જૂથ અભિષેક બેનર્જીની જગ્યાએ કાકોલી ઘોષને સંસદીય નેતા તરીકે જોવાની ઇચ્છા વ્યક્ત કરી રહ્યું હોવાનું કહેવાય છે.
આ વચ્ચે ટીએમસીના વરિષ્ઠ રાજ્યસભા સાંસદ સુખેન્દુ શેખર રોયે પાર્ટી અને સાંસદ પદેથી રાજીનામું આપતા રાજકીય ચર્ચાઓ વધુ તેજ બની છે. રાજીનામા બાદ કેટલાક અસંતુષ્ટ સાંસદોએ તેમની મુલાકાત પણ લીધી હતી, જેના કારણે પાર્ટીમાં આંતરિક અસંતોષ વધુ સ્પષ્ટ બન્યો છે.
દિલ્હીમાં એક તરફ મુખ્યમંત્રી મમતા બેનર્જી INDIA ગઠબંધનની બેઠકમાં ભાગ લઈ રહ્યા છે અને કોંગ્રેસ નેતા સોનિયા ગાંધી સાથે મુલાકાત કરી રહ્યા છે, ત્યારે બીજી તરફ પાર્ટીના સાંસદોમાં વધી રહેલી નારાજગી TMC માટે ચિંતાનો વિષય બની છે.
લોકસભામાં TMCના કુલ 28 સાંસદો છે. સંસદીય નિયમો અનુસાર અલગ જૂથને સત્તાવાર માન્યતા મેળવવા માટે ઓછામાં ઓછા 19 સાંસદોની જરૂર પડે છે. આ કારણે આગામી દિવસોમાં કેટલા સાંસદો બળવાખોર જૂથ સાથે જોડાય છે તેના પર સૌની નજર રહેશે.
રાજકીય નિરીક્ષકોના મતે જો અસંતુષ્ટ સાંસદોની સંખ્યા વધે છે તો પશ્ચિમ બંગાળની રાજનીતિમાં મોટો રાજકીય ભૂકંપ આવી શકે છે. જોકે TMC તરફથી હજુ સુધી આ સમગ્ર મામલે કોઈ સત્તાવાર નિવેદન આપવામાં આવ્યું નથી.
