બોલિવૂડ સિંગર-કમ્પોઝર રાહુલ જૈન વિરુદ્ધ 30 વર્ષની મહિલા ‘કોસ્ચ્યુમ સ્ટાઈલિશ’ પર બળાત્કાર કરવાના આરોપમાં FIR નોંધવામાં આવી છે. એક અધિકારીએ આ જાણકારી આપી હતી. જોકે, ગાયકે આરોપોને નકારી કાઢ્યા હતા અને તેને “ખોટા અને પાયાવિહોણા” ગણાવ્યા હતા.
એક પોલીસ અધિકારીએ એફઆઈઆરને ટાંકીને જણાવ્યું હતું કે ફરિયાદીએ ઓશિવરા પોલીસ સ્ટેશનમાં નોંધાયેલા તેના નિવેદનમાં જણાવ્યું હતું કે જૈને તેનો ઈન્સ્ટાગ્રામ પર સંપર્ક કર્યો હતો અને તેના કામની પ્રશંસા કરી હતી. આરોપીએ ફરિયાદીને તેના ઉપનગર અંધેરીમાં સ્થિત ફ્લેટમાં બોલાવી હતી.
અધિકારીએ જણાવ્યું કે મહિલા 11 ઓગસ્ટના રોજ જૈનના ફ્લેટમાં ગઈ હતી. આરોપી તેને પોતાનો સામાન બતાવવાના બહાને તેના બેડરૂમમાં લઈ ગયો અને પછી તેના પર બળાત્કાર ગુજાર્યો. પોલીસના જણાવ્યા અનુસાર, મહિલા સ્વતંત્ર ‘કોસ્ચ્યુમ સ્ટાઈલિશ’ તરીકે કામ કરે છે. મહિલાએ કહ્યું કે જ્યારે તેણે વિરોધ કર્યો તો જૈને તેને માર માર્યો અને પુરાવાનો નાશ કરવાનો પ્રયાસ કર્યો.
પોલીસે ભારતીય દંડ સંહિતાની કલમ 376, 323 અને 506 હેઠળ જૈન વિરુદ્ધ FIR નોંધી છે. જો કે હજુ સુધી આરોપી પકડવામાં નથી આવ્યો.
જ્યારે જૈનનો સંપર્ક કરવામાં આવ્યો ત્યારે તેણે કહ્યું કે, હું આ મહિલાને ઓળખતો નથી. તેમના દ્વારા લગાવવામાં આવેલા આરોપો ખોટા અને પાયાવિહોણા છે. અગાઉ પણ એક મહિલાએ મારા પર આવા જ આરોપ લગાવ્યા હતા, પરંતુ મને ન્યાય મળ્યો. આ મહિલા તેની સાથી હોઇ શકે છે.
નોંધનીય છે કે બોલિવૂડના એક ગીતકાર અને લેખકે રાહુલ જૈન વિરુદ્ધ બળાત્કાર, બળજબરીથી ગર્ભપાત અને છેતરપિંડી સહિતના વિવિધ આરોપોમાં ગયા વર્ષે ઓક્ટોબરમાં FIR દાખલ કરી હતી.
