દિવાળી પહેલા, મોદી સરકારે કોરોના યુગમાં મંદ પડેલી અર્થવ્યવસ્થાને વેગ આપવા માટે એક ઉત્તેજના પેકેજની જાહેરાત કરી છે. નાણાં પ્રધાન નિર્મલા સીતારામને પત્રકાર પરિષદમાં આત્મનિર્ભર ભારત 3.0 હેઠળ નવી આત્મનિર્ભર ભારત રોજગાર યોજનાની જાહેરાત કરી.
કોરોના પુન પ્રાપ્તિ તબક્કામાં નવા રોજગાર પેદા કરવાના ઉદ્દેશ્ય સાથે આત્મનિર્ભર ભારત 3.0 હેઠળ રોજગાર યોજના શરૂ કરવામાં આવી છે. નાણાં પ્રધાન નિર્મલા સીતારામને ગુરુવારે કહ્યું હતું કે, લાંબા અને કડક લોકડાઉન પછી ભારતીય અર્થવ્યવસ્થાની સ્થિતિ મજબૂત રીતે સુધરવા જઈ રહી છે.
તેમણે અર્થવ્યવસ્થાને વેગ આપવા માટે કેટલાક વધુ પ્રોત્સાહનોની જાહેરાત કરવા યોજાયેલી પત્રકાર પરિષદમાં જણાવ્યું હતું કે, મેક્રો ઇકોનોમિક સૂચકાંકો પરિસ્થિતિમાં સુધારણા તરફ ઇશારો કરી રહ્યા છે. નિર્મલા સીતારામને જણાવ્યું હતું કે દેશમાં કોવિડ -19 ના સક્રિય કેસ એક સમયે 10 લાખથી વધુ હતા, જ્યારે હવે આ કેસ ઘટીને 4.89 લાખ પર આવી ગયા છે અને મૃત્યુ દર ઘટીને 1.47 ટકા પર આવી ગયો છે.
અર્થવ્યવસ્થામાં થયેલા સુધારાની વિગતો આપતાં તેમણે જણાવ્યું હતું કે કંપનીઓના વ્યવસાયિક વિકાસની ગતિ દર્શાવતો સંયુક્ત ખરીદી મેનેજર્સ ઇન્ડેક્સ (પીએમઆઈ) પાછલા મહિનામાં 54.6 ની સરખામણીએ ઓક્ટોબરમાં 58.9 પર પહોંચી ગયો છે. તેમણે કહ્યું કે ઓક્ટોબર દરમિયાન ઉર્જા વપરાશમાં 12 ટકાનો વધારો થયો છે, જ્યારે ગુડ્ઝ એન્ડ સર્વિસ ટેક્સ (જીએસટી) ના સંગ્રહમાં 10 ટકાનો વધારો થયો છે અને તે રૂ. 1.05 લાખ કરોડથી વધુ છે. નાણાં પ્રધાને કહ્યું કે, દૈનિક રેલ્વે ભાડામાં સરેરાશ 20 ટકાના દરે વધારો થયો છે. તેમણે વધુમાં કહ્યું કે, બેંક ધિરાણમાં પણ 5.1 ટકાનો સુધારો થયો છે.
આ અગાઉ બુધવારે સરકારે ઘરેલુ ઉત્પાદનને વેગ આપવાના હેતુથી 10 વધુ ક્ષેત્રો માટે 2 લાખ કરોડ રૂપિયાની ઉત્પાદન આધારિત પ્રોત્સાહક યોજનાઓને મંજૂરી આપી હતી. પ્રોડકશન આધારિત પ્રોત્સાહક યોજનાના ફાયદાથી રેફ્રિજરેટર, વોશિંગ મશીન પ્રોડક્ટ્સ, ફાર્માસ્યુટિકલ્સ, ખાસ પ્રકારના સ્ટીલ, વાહનો, ટેલિકમ્યુનિકેશન્સ, કાપડ, ખાદ્ય ઉત્પાદનો, સોલર ફોટોવોલ્ટેઇક અને મોબાઇલ ફોન બેટરી જેવા ઉદ્યોગોના રોકાણકારોને લાભ થશે.
અન્ય વિશેષ બાબતો:
- ઇમરજન્સી ક્રેડિટ ગેરંટી યોજના 31 માર્ચ 2021 સુધી વિસ્તૃત કરવામાં આવી
- કેન્દ્ર સરકાર નવી રોજગારી આપતી સંસ્થાઓને સબસિડી આપશે, આ અંતર્ગત સરકાર નવી ભરતી માટે બે વર્ષ માટે પ્રોવિડન્ટ ફંડમાં ફાળો આપશે.
- નાણાં પ્રધાને પ્રધાનમંત્રી આવાસ યોજના (શહેરી) માટે રૂ. 18,000 કરોડની વધારાની રકમ ફાળવવાની જાહેરાત કરી
જુઓ અહીં – કેન્દ્રીય નાણામંત્રી નિર્મલા સીતારમણની પ્રેસ કોન્ફરન્સ
