Gir Somnath News: શિયાળાની શરૂઆત થતાં જ પ્રથમ જ્યોતિર્લિંગ સોમનાથ મહાદેવના સાનિધ્યમાં આવેલા પવિત્ર ત્રિવેણી સંગમ (Triveni Sangam) ખાતે વિદેશી યાયાવર પક્ષીઓનું (Somnath Migratory Birds) આગમન શરૂ થયું છે. હિરણ, કપિલા અને સરસ્વતી નદીઓના સંગમથી અરબી સમુદ્ર સુધીના જળવિસ્તારમાં આ પક્ષીઓનો કલરવ પ્રવાસીઓ અને યાત્રાળુઓ માટે આકર્ષણનું કેન્દ્ર બન્યો છે.
દર વર્ષે નવેમ્બરથી ફેબ્રુઆરી દરમિયાન સાયબેરિયા, યુરોપ સહિતના ઠંડા પ્રદેશોમાંથી વિવિધ પ્રજાતિનાં યાયાવર પક્ષીઓ હજારો કિલોમીટરનું અંતર કાપીને સોમનાથ પહોંચે છે. પોતાના મૂળ વતનમાં શિયાળા દરમિયાન પડતી કડકડતી ઠંડી, બરફવર્ષા અને ખોરાકની અછતને કારણે આ પક્ષીઓ અનુકૂળ વાતાવરણ અને પૂરતા ખોરાકની શોધમાં ભારતના જળવિસ્તારો તરફ સ્થળાંતર કરે છે.
Somnath Migratory Birds: સીગલ સહિતનાં જળપક્ષીઓ બન્યાં આકર્ષણનું કેન્દ્ર
ત્રિવેણી સંગમ ખાતે મુખ્યત્વે સીગલ (ગલ પક્ષી) સહિતનાં સફેદ જળપક્ષીઓ મોટી સંખ્યામાં જોવા મળી રહ્યાં છે. આ ઉપરાંત શિયાળાની ઋતુમાં અન્ય સ્થાનિક અને યાયાવર પક્ષીઓ પણ અહીંના જળવિસ્તારમાં જોવા મળે છે. આ પક્ષીઓ નદીની સપાટી પર તરતાં, આકાશમાં સમૂહમાં ઉડાન ભરતાં અને નદીકાંઠે ખોરાક શોધતાં નજરે પડે છે.
ખાસ કરીને વહેલી સવારે સૂર્યનાં કિરણો જ્યારે ત્રિવેણી સંગમના પાણી પર પડે છે ત્યારે પાણીમાં તરતાં અને આકાશમાં ઉડતાં પક્ષીઓનું દૃશ્ય મનમોહક બની જાય છે. પક્ષીઓના (Siberian Birds) કલરવથી સમગ્ર સંગમ વિસ્તાર ગુંજી ઊઠે છે. આ નજારો પક્ષીપ્રેમીઓ અને ફોટોગ્રાફીના શોખીનો માટે પણ વિશેષ આકર્ષણરૂપ બન્યો છે.
ફેબ્રુઆરી સુધી રોકાણ કર્યા બાદ વતન પરત ફરશે
શિયાળાની ઋતુ દરમિયાન અનુકૂળ વાતાવરણ અને પૂરતો ખોરાક મળતો હોવાથી આ યાયાવર પક્ષીઓ સોમનાથના જળવિસ્તારમાં થોડા મહિના રોકાણ કરે છે. ત્યારબાદ હવામાનમાં ફેરફાર થતાં તેઓ પોતાના મૂળ વતન તરફ પરત ફરે છે.

યાયાવર પક્ષીઓના સંરક્ષણ માટે અપીલ
આ કુદરતી મહેમાનોનું (Foreign Birds Arrival) સંરક્ષણ કરવું પણ એટલું જ જરૂરી છે. યાયાવર પક્ષીઓના શિકાર પર પ્રતિબંધ છે. પ્રવાસીઓ અને સ્થાનિક નાગરિકોને પક્ષીઓને હેરાન ન કરવા, તેમને ખોરાક આપતી વખતે સાવચેતી રાખવા અને તેમના કુદરતી રહેઠાણને નુકસાન ન પહોંચાડવા અપીલ કરવામાં આવી છે.
![]()
આમ, ધાર્મિક આસ્થાનું કેન્દ્ર ગણાતું સોમનાથનું ત્રિવેણી સંગમ શિયાળાની ઋતુમાં વિદેશી યાયાવર પક્ષીઓના આગમનથી કુદરતી સૌંદર્યમાં વધારો કરી રહ્યું છે. જેના કારણે આ સ્થળ પક્ષીપ્રેમીઓ અને પ્રવાસીઓ માટે પણ વિશેષ આકર્ષણનું કેન્દ્ર બન્યું છે.
આ પણ વાંચો: પાટડીમાં વહેલું ખૂલ્યું ઘુડખર અભયારણ્ય, વિદેશી પક્ષીઓ જોવા સહેલાણીઓ ઉમટ્યા
આ પણ વાંચો: વિદેશી પક્ષીઓ બન્યા મહેમાનો,સોમનાથના વિશાળ દરિયા કિનારે પક્ષીઓનો જ્માવડો
આ પણ વાંચો: થોળ પક્ષી અભયારણ્યમાં વિદેશી પક્ષીઓનું આગમન, લોકોમાં જોવા મળ્યું કુતૂહલ
