સેન્ચુરિયન,
ભારત અને દક્ષિણ આફ્રિકા વચ્ચે રમાઈ રહેલી ૬ ODI મેચની શ્રેણીની અંતિમ વન-ડેમાં ભારતીય ટીમે ૮ વિકેટે વિજય મેળવી આફ્રિકાને સીરીઝમાં ૫-૧ હરાવ્યું હતું. ટોસ હારીને પ્રથમ બેટિંગ કરવા મેદાને ઉતરેલી દક્ષિણ આફ્રિકન ટીમ માત્ર ૨૦૪ રન પર જ સમેટાઈ ગઈ હતી અને ભારતે આ ટાર્ગેટ માત્ર ૩૨.૧ ઓવરમાં જ 2 વિકેટના નુકશાને વટાવી દીધો હતો. ભારતની ઇનિંગ્સમાં કેપ્ટન વિરાટ કોહલીએ કેરિયરની ૩૫મી સદી ફટકારી હતી. આ શાનદાર સદી સાથે જ વિરાટ કોહલીએ રેકોર્ડની હારમાળા સર્જી હતી. આ ઉપરાંત ૬ ODI મેચની શ્રેણીમાં કેપ્ટન વિરાટ કોહલીના શાનદાર પરફોર્મન્સના આધારે તેમને મેન ઓફ ધ સીરીઝ અને મેન ઓફ ધ મેચ તરીકે પસંદ કરવામાં આવ્યા હતા.
કેપ્ટન વિરાટ કોહલીએ આફ્રિકા સામેની વન-ડે સીરીઝ દરમિયાન બનાવ્યા આ વર્લ્ડ રેકોર્ડ,
૧. એક દ્વિપક્ષીય સીરીઝમાં કોઈ પણ બેટ્સમેન દ્વારા બનાવેલ સૌથી વધુ રન
ભારતીય કેપ્ટન વિરાટ કોહલીએ 6 મેચની સીરીઝમાં 186ની એવરજથી કુલ 558 રન બનાવ્યા હતા. જેમાં 3 સદી અને 1અડધી સદી ફટકારી હતી. જે કોઈ પણ બેટ્સમેન દ્વારા એક દ્વિપક્ષીય સીરીઝમાં સૌથી વધુ રન છે.
આ પહેલા આ રેકોર્ડ ભારતીય ટીમના સાથી ઓપનર બેટ્સમેન રોહિત શર્માના નામે હતો. રોહિત શર્માએ ૨૦૧૩-૧૪માં ઓસ્ટ્રેલિયા વિરૂદ્ધ દ્વિપક્ષીય વન ડે સિરીઝમાં 491 રન બનાવ્યા હતા.
૨. સૌથી ઝડપી ૯૫૦૦ રન
દક્ષિણ આફ્રિકા સામેની વન-ડેમાં શાનદાર પ્રદર્શન કરનાર ભારતીય કેપ્ટન આ સાથે સૌથી ઝડપી ૯૫૦૦ રન બનાવવાનો રેકોર્ડ પોતાના નામે કર્યો છે. વિરાટ કોહલીએ માત્ર ૨૦૮ વન-ડે મેચની ૨૦૦મી ઇનિંગ્સમાં ૯૫૦૦ રન ફટકારી દક્ષિણ આફ્રિકાના દિગ્ગજ બેટ્સમેન એ બી ડીવિલિયર્સના રેકોર્ડને તોડી નાખ્યો છે.
આ પહેલા ગત વર્ષે ઓક્ટોબરમાં બાંગ્લાદેશ વિગૂદ્ધ એ બી ડીવિલિયર્સે ૨૧૫ ઇનિંગ્સમાં ૯૫૦૦ રન ફટકારી આ રેકોર્ડ પોતાના નામે કર્યો હતો. પરંતુ માત્ર ૪ મહિનામાં આ રેકોર્ડ ભારતીય કેપ્ટને પોતાના નામે કર્યો છે.
૩. ૩૦ વર્ષની વય સુધી સૌથી ઝડપી ૩૫ સદી
દક્ષિણ આફ્રિકા સામેની ૬ વન-ડે સીરીઝમાં ત્રણ સદી ફટકારવાની સાથે ભારતીય કેપ્ટન કોહલી ૩૦ વર્ષની વય સુધી સૌથી ઝડપી ૩૫ સદી ફટકારવાનો રેકોર્ડ પોતાના નામે કરી લીધો છે. આ પહેલા માસ્ટર બ્લાસ્ટર સચિન તેંડુલકરે ૩૦ વર્ષની વય સુધી સૌથી વધુ ૩૪ સદી ફટકારી છે.
૪. ત્રણ ફોર્મેટમાં સૌથી ઝડપી ૧૭૦૦૦ રન
દક્ષિણ આફ્રિકા સામેની ૬ વન-ડે મેચની સીરીઝમાં ૫૫૮ રન બનાવવાની સાથે જ કેપ્ટન વિરાટ કોહલી ક્રિકેટના તમામ ફોર્મેટમાં સૌથી ઝડપી ૧૭૦૦૦ રન બનાવનારો ખેલાડી બની ગયો છે. ભારતીય કેપ્ટને ૩૬૩ ઇનિંગ્સમાં રન ફટકારી આ રેકોર્ડ પોતાના નામે કર્યો છે.આ પહેલા દક્ષિણ આફ્રિકાના હાશિમ અમલાએ ૩૮૧ ઇનિંગ્સમાં ૧૭૦૦૦ રન ફટકાર્યા હતા.
