બર્મિઘમ,
ભારત અને ઈંગ્લેંડ વચ્ચે રમાઈ રહેલી પાંચ ટેસ્ટ મેચની શ્રેણીની પ્રથમ મેચમાં ભારતીય ટીમ મજબૂત સ્થિતિમાં જોવા મળી રહી છે. ભારતની પ્રથમ ઇનિંગ્સમાં ૨૭૪ રનમાં ઓલઆઉટ થયા બાદ યજમાન ટીમનો બીજી ઇનિંગ્સમાં ધબડકો થયો છે. સ્પિન બોલર આર. અશ્વિન અને ફાસ્ટ બોલર ઇશાંત શર્માની વેધક બોલિંગ સામે ઈંગ્લેંડની ટીમનો કોઈ પણ બેટ્સમેન ટકી શક્યો ન હતો અને લંચ સુધી ૬ વિકેટના નુકશાને ૮૬ રન બનાવી લીધા છે.
ઈંગ્લેંડ તરફથી વિકેટકીપર બેટ્સમેન જોની બેયર્સ્ટોએ સૌથી વધુ ૨૮ રન નોધાવી આઉટ થયો હતો. આ પહેલા કેપ્ટન વિરાટ કોહલીની શાનદાર સદી સાથે ભારતે પહેલી ઇનિંગ્સમાં ૨૭૪ રન નોધાવ્યા હતા. ઓપનર બેટ્સમેન શિખર ધવન અને મુરલી વિજયની જોડીએ પ્રથમ વિકેટ માટે ૫૦ રનની ભાગીદારી નોધાવ્યા બાદ ટીમનો ધબડકો થયો હતો. ધવને ૨૬ રન જયારે વિજયે ૨૦ રન નોધાવ્યા હતા.
જો કે ત્યારબાદ ભારતીય ટીમનો ધબડકો થયો હતો. કે એલ રાહુલ ૪, અજીન્ક્ય રહાને ૧૫, વિકેટકીપર બેટ્સમેન દિનેશ કાર્તિક પોતાનું ખાતું ખોલાવ્યા વગર જ પેવેલિયનમાં ભેગો થયો હતો, જયારે બીજી બાજુ કેપ્ટન વિરાટ કોહલીએ ટીમનો એક છેડો સાચવી રાખી સદી ફટકારતા ૧૪૯ રનની શાનદાર ઇનિંગ્સ રમી હતી. આ સાથે જ કોહલીએ પોતાના કેરિયરની ૨૨મી સદી ફટકારી છે.
જયારે ઈંગ્લેંડ તરફથી સામ કુરાને સૌથી વધુ ૪ વિકેટ જયારે બેન સ્ટોક્સ અને આદિલ રશીદે અનુક્રમે ૨-૨ વિકેટ ઝડપી હતી.
આ પહેલા ટેસ્ટ મેચના પહેલા દિવસે સ્પિન બોલર આર. અશ્વિન અને ફાસ્ટ બોલર મોહમ્મદ શામીની શાનદાર બોલિંગના સહારે ભારતે યજમાન ટીમે પોતાની પહેલી ઇનિંગ્સમાં ૨૮૭ રન પર સીમિત રાખી હતી.
ટોસ જીતીને પ્રથમ બેટિંગ કરતા ઈંગ્લેંડની ટીમની શરૂઆત ખરાબ રહી હતી. ટેસ્ટ મેચના પહેલા સત્રમાં જ યજમાન ટીમના ઓપનર એલિસ્ટર કૂકને ૯મી ઓવરમાં જ અશ્વિને પેવેલિયનમાં મોકલ્યા હતા. ત્યારબાદ ઓપનર બેટ્સમેન કેટન જેનિંગ્સ અને કેપ્ટન જો રુટ વચ્ચે બીજી વિકેટ માટે ૭૨ રનની ભાગીદારી નોધાવી હતી. ઓપનર બેટ્સમેન જેનિંગ્સ ૪૨ રન બનાવી ઝડપી બોલર મોહમ્મદ શામીનો પહેલો શિકાર બન્યો હતો.
જો કે ત્યારબાદ કેપ્ટન જો રુટ અને જોની બેયર્સ્ટો વચ્ચે ચોથી વિકેટ માટે ૧૦૪ રનની ભાગીદારી નોધાવી હતી અને પોતાની ટીમને મજબૂત સ્થિતિમાં પહોચાડી હતી. રૂટે ૮૦ રન બનાવી રન આઉટ થયો હતો, જયારે જોની બેયર્સ્ટો ૭૦ રન બનાવી ઝડપી બોલર ઉમેશ યાદવનો શિકાર બન્યો હતો.
પરંતુ ત્યારબાદ યજમાન ટીમનો ધબડકો થયો હતો અને સમયાંતરે વિકેટ ગુમાવી હતી અને પૂરી ઈંગ્લેંડની ટીમ ૨૮૭ રન બનાવી શકી હતી. ભારત તરફથી સ્પિન બોલર આર.અશ્વિને સૌથી વધુ ૪ વિકેટ, જયારે મોહમ્મદ શામીએ ૩ અને ઉમેશ યાદવ અને ઇશાંત શર્માએ ૧-૧ વિકેટ ઝડપી હતી.
