Bhopal News : ભોપાલનો ચર્ચિત ત્વિષા શર્મા (Twisha Sharma)મૃત્યુ કેસ હવે દેશની સર્વોચ્ચ અદાલત સુધી પહોંચી ગયો છે. Supreme Court of India એ આ સંવેદનશીલ મામલે સ્વતઃસંજ્ઞાન લઈને સોમવાર, 25 મેના રોજ મહત્વપૂર્ણ સુનાવણી નક્કી કરી છે. આ કેસની સુનાવણી ભારતના મુખ્ય ન્યાયાધીશ Surya Kant ની અધ્યક્ષતાવાળી ત્રણ સભ્યોની વિશેષ બેન્ચ કરશે.
બેન્ચમાં ન્યાયાધીશ Joymalya Bagchi અને ન્યાયાધીશ Vipul M. Pancholi પણ સામેલ રહેશે. સુપ્રીમ કોર્ટ રજિસ્ટ્રી દ્વારા તૈયાર કરાયેલી નોંધમાં મીડિયા અહેવાલો અને તપાસ પર સંભવિત પ્રભાવ અંગે ગંભીર પ્રશ્નો ઉઠાવવામાં આવ્યા છે.
શું છે સમગ્ર મામલો?
33 વર્ષીય કોર્પોરેટ પ્રોફેશનલ અને ભૂતપૂર્વ અભિનેત્રી Twisha Sharma 12 મેના રોજ ભોપાલના કટારા હિલ્સ વિસ્તારમાં આવેલા તેમના સાસરિયાના ઘરે શંકાસ્પદ પરિસ્થિતિમાં મૃત હાલતમાં મળી આવી હતી. પરિવારજનોએ આને આત્મહત્યા નહીં પરંતુ દહેજ અને માનસિક ત્રાસના કારણે થયેલું મોત ગણાવ્યું છે.
પરિવારે સાસરિયાઓ પર દહેજની માંગણી, શારીરિક-માનસિક હેરાનગતિ અને બળજબરીથી ગર્ભપાત કરાવવાના ગંભીર આરોપો લગાવ્યા છે. મૃતકની સાસુ નિવૃત્ત જિલ્લા ન્યાયાધીશ હોવાને કારણે તપાસ પર સંસ્થાકીય દબાણ અને પ્રભાવના આરોપો પણ સામે આવ્યા છે.
તપાસની નિષ્પક્ષતા પર સવાલ
સુપ્રીમ કોર્ટ રજિસ્ટ્રીની નોંધમાં ઉલ્લેખ કરવામાં આવ્યો છે કે મામલાની નિષ્પક્ષ તપાસ અંગે ગંભીર શંકાઓ ઉભી થઈ રહી છે. આ કારણે કેસમાં “સુઓમોટો રિટ પિટિશન (ક્રિમિનલ)” તરીકે નોંધ કરવાની ભલામણ પણ કરવામાં આવી હતી.
Twisha Sharmaના પરિવારે સુપ્રીમ કોર્ટની દેખરેખ હેઠળ તપાસ કરવાની માંગ કરી છે. તેમનું માનવું છે કે સાસરિયાઓના ન્યાયતંત્ર સાથેના સંબંધોને કારણે તપાસ પ્રભાવિત થઈ શકે છે.
હાઈકોર્ટનો મહત્વપૂર્ણ આદેશ
આ કેસમાં પરિવારજનોએ હાઈકોર્ટનો પણ દરવાજો ખટખટાવ્યો હતો. હાઈકોર્ટે સમગ્ર મામલાની ગંભીરતા ધ્યાનમાં લઈને બીજું પોસ્ટમોર્ટમ કરાવવાનો આદેશ આપ્યો હતો. કોર્ટે All India Institute of Medical Sciences ના નિષ્ણાતોની સ્વતંત્ર ટીમને ભોપાલ જઈ ફરી પોસ્ટમોર્ટમ કરવાની સૂચના આપી હતી.
હવે સુપ્રીમ કોર્ટે (Supreme Court)પણ આ કેસમાં સ્વતઃસંજ્ઞાન લઈને મામલાને વધુ ગંભીરતાથી હાથ ધર્યો છે. સોમવારે થનારી સુનાવણી પર સમગ્ર દેશની નજર રહેશે.
