Surat Sewage Problem: ગટર, ગંદકી અને મચ્છરોનો ઉપદ્રવ: સુરતના જહાંગીરપુરામાં રહીશોનો આક્રોશ

Surat News: સુરતના જહાંગીરપુરા વિસ્તારમાં આવેલા ચુડા સાંસ્કૃતિક આવાસમાં ગટરની સમસ્યા (Surat Sewage Problem)ને લઈને સ્થાનિકોમાં ભારે રોષ જોવા મળી રહ્યો છે. રહીશોના આક્ષેપ મુજબ છેલ્લા દોઢ વર્ષથી વસાહતમાં ગટરનું પાણી ઉભરાવાની સમસ્યા યથાવત છે. ગટરના પાણીના કારણે રસ્તાઓ પર ગંદકી અને દુર્ગંધ ફેલાઈ રહી છે, જ્યારે બોરિંગના પાણીમાં પણ ગટરનું પાણી ભળતું હોવાનો સ્થાનિકોએ આક્ષેપ કર્યો છે.

ચુડા સાંસ્કૃતિક આવાસમાં અંદાજે 24 બિલ્ડિંગ આવેલી છે અને અહીં 10 હજારથી વધુ લોકો રહેતા હોવાનો દાવો કરવામાં આવી રહ્યો છે. મોટી સંખ્યામાં લોકો વસવાટ કરતા વિસ્તારમાં લાંબા સમયથી ગટર (Surat Sewage Problem) અને સફાઈની સમસ્યા હોવાના કારણે રહીશોમાં તંત્ર સામે નારાજગી વધી છે.

મુખ્ય પ્રવેશદ્વાર પાસે જ ગટર ઉભરાતા મુશ્કેલી

સ્થાનિકોના જણાવ્યા મુજબ આવાસના મુખ્ય પ્રવેશદ્વાર પાસે લાંબા સમયથી ગટર બેક મારી રહી છે. ગટરનું ગંદુ પાણી રસ્તા પર ફરી વળતાં અવરજવર કરતા લોકોને પણ મુશ્કેલીનો સામનો કરવો પડે છે.લાંબા સમયથી પાણી ભરાઈ રહેવાના કારણે આસપાસ લીલ જામી ગઈ હોવાનું અને મચ્છરોનો ઉપદ્રવ પણ વધ્યો હોવાનો રહીશોએ આક્ષેપ કર્યો છે. ગંદકી અને દુર્ગંધના કારણે સમગ્ર વિસ્તારમાં રહેતા લોકો પરેશાન હોવાનું સ્થાનિકોનું કહેવું છે.

Surat Sewage Problem: બોરિંગના પાણીમાં ગટરનું પાણી ભળ્યાનો આક્ષેપ

સ્થાનિકો દ્વારા સૌથી ગંભીર આક્ષેપ પીવાના પાણી અંગે કરવામાં આવ્યો છે. રહીશોના જણાવ્યા મુજબ બિલ્ડિંગની ગટર (Surat Sewage Problem)નું પાણી બોરિંગના પાણીમાં ભળી રહ્યું છે.આ પરિસ્થિતિને કારણે દૂષિત પાણી પીવાનો વારો આવતો હોવાનો સ્થાનિકોએ આક્ષેપ કર્યો છે. તેમના જણાવ્યા મુજબ વિસ્તારમાં અનેક લોકો બીમાર પડી રહ્યા છે અને તાવ તથા મેલેરિયા જેવા રોગોના કેસ વધ્યા હોવાની ફરિયાદો છે.જોકે, આ દાવાઓ અંગે સત્તાવાર આરોગ્ય વિભાગનો અહેવાલ કે પાણીના નમૂનાની તપાસના પરિણામો જાહેર થયા છે કે કેમ તે અંગે સ્પષ્ટ માહિતી સામે આવી નથી.

‘ઘરમાં જ બધા સભ્યો બીમાર પડ્યા’

સ્થાનિક એડવોકેટ મમતાબેને તંત્ર સામે નારાજગી વ્યક્ત કરતા જણાવ્યું કે ગટર અને પાણીની સમસ્યાને કારણે તેમના પોતાના પરિવારના સભ્યો પણ બીમાર પડ્યા છે.તેમનો આક્ષેપ છે કે સમગ્ર વિસ્તારમાં તાવ અને મેલેરિયાની સમસ્યા વધી રહી છે. રહીશોએ વારંવાર રજૂઆતો કરી હોવા છતાં સમસ્યાનું કાયમી નિરાકરણ આવ્યું નથી.મમતાબેનનો વધુ આરોપ છે કે કેટલાક કિસ્સામાં મનપાના અધિકારીઓ સ્થળ પર તપાસ કરવા આવ્યા વિના જ ફરિયાદ ‘રીઝોલ્વ’ કરવામાં આવી હોવાનું દર્શાવવામાં આવે છે.

કચરાની ગાડી પણ નિયમિત ન આવતી હોવાનો દાવો

ગટર ઉપરાંત કચરાના નિકાલને લઈને પણ સ્થાનિકોએ ફરિયાદ કરી છે. રહીશોના જણાવ્યા મુજબ કચરાની ગાડી સમયસર ન આવવાને કારણે વિસ્તારમાં ગંદકીનું પ્રમાણ વધી જાય છે.ચુડા સંસ્થા અને સુરત મહાનગરપાલિકાના અધિકારીઓ દ્વારા સ્થળની મુલાકાત લઈ સમસ્યા ઉકેલવાની ખાતરી આપવામાં આવતી હોવા છતાં લાંબા સમયથી કાયમી ઉકેલ મળ્યો ન હોવાનું સ્થાનિકોનું કહેવું છે.

નબળી કામગીરીને કારણે સમસ્યા સર્જાઈ હોવાનો આક્ષેપ

આવાસના બિલ્ડિંગ પ્રમુખ ત્રિકમભાઈ સોલંકીએ આક્ષેપ કર્યો છે કે બાંધકામ અને અન્ય કામગીરીમાં નબળી ગુણવત્તાના કામના કારણે આજે આ સમસ્યાઓ સર્જાઈ છે.તેમના જણાવ્યા મુજબ 10 હજારથી વધુ લોકોની વસાહતમાં ગટર (Surat Sewage Problem) અને પીવાના પાણી જેવી મૂળભૂત સમસ્યા લાંબા સમય સુધી રહેવી ગંભીર બાબત છે. સ્થાનિક કોર્પોરેટર વિજય ભાટિયાને પણ વારંવાર જાણ કરવામાં આવી હોવા છતાં સંતોષકારક કાર્યવાહી ન થઈ હોવાનો તેમણે આક્ષેપ કર્યો છે.

એક અઠવાડિયાનો અલ્ટીમેટમ, નહીં તો ધરણાની ચીમકી

લાંબા સમયથી સમસ્યાનો ઉકેલ ન આવતા સ્થાનિકો હવે આંદોલનના મૂડમાં છે. રહીશોએ તંત્રને એક અઠવાડિયાનો સમય આપ્યો હોવાનું જણાવ્યું છે.સ્થાનિકોની માંગ છે કે ગટર (Surat Sewage Problem)નું પાણી રસ્તા પર ઉભરાવાની સમસ્યા, પીવાના પાણીમાં ગટર (Surat Sewage Problem)નું પાણી ભળતું હોવાનો મુદ્દો અને કચરાના નિકાલની સમસ્યાનો કાયમી ઉકેલ લાવવામાં આવે.

જો આગામી એક અઠવાડિયામાં સમસ્યાનું નિરાકરણ નહીં આવે તો ચુડા સાંસ્કૃતિક આવાસના રહીશો એકત્ર થઈ સુરત મહાનગરપાલિકાની મુખ્ય કચેરી સામે અનિશ્ચિત મુદતના ધરણાં શરૂ કરશે તેવી ચીમકી આપવામાં આવી છે.હવે જોવાનું એ રહેશે કે 10 હજારથી વધુ લોકોના આરોગ્ય અને મૂળભૂત સુવિધાઓ સાથે જોડાયેલા આ મુદ્દે સુરત મહાનગરપાલિકા અને સંબંધિત તંત્ર દ્વારા શું કાર્યવાહી કરવામાં આવે છે.