Telegram Ban in India NEET UG 2026: ભારતમાં આ વર્ષે પેપર લીક થવાના વિવાદને કારણે રદ થયેલી NEET-UG ની ફરીથી યોજાનારી પરીક્ષાને લઈને કેન્દ્ર સરકારે એક અત્યંત મોટો અને આકરો નિર્ણય લીધો છે. દેશભરમાં NEET રી-એક્ઝામ નિષ્પક્ષ અને સુરક્ષિત રીતે યોજાય તે માટે ભારતમાં લોકપ્રિય મેસેજિંગ એપ ‘ટેલિગ્રામ’ (Telegram) ના ઉપયોગ પર અસ્થાયી (ટેમ્પરરી) પ્રતિબંધ લગાવી દેવામાં આવ્યો છે. નેશનલ ટેસ્ટિંગ એજન્સી (NTA) એ મંગળવારે એક સત્તાવાર પ્રેસ રિલીઝ જારી કરીને આ ચોંકાવનારી માહિતી આપી છે.

IT એક્ટની કલમ 69A હેઠળ એક્શન

નેશનલ ટેસ્ટિંગ એજન્સી (NTA) ના જણાવ્યા અનુસાર, કેન્દ્રીય ઇલેક્ટ્રોનિક્સ અને સૂચના પ્રૌદ્યોગિકી મંત્રાલયે (MeitY) સૂચના પ્રૌદ્યોગિકી કાયદો, 2000 ની કલમ 69A (Section 69A) હેઠળ ટેલિગ્રામ પર આ પ્રતિબંધ લાદ્યો છે:

ભારતમાં ટેલિગ્રામની પહોંચ પરનો આ આંશિક પ્રતિબંધ 22 June 2026 સુધી લાગુ રહેશે.

સરકારે ટેલિગ્રામને તેનું સૌથી પ્રખ્યાત ‘મેસેજ એડિટ ફીચર’ આગામી 30 June સુધી બંધ રાખવાનો કડક આદેશ આપ્યો છે. એટલે કે, ભારતમાં યુઝર્સ પહેલાથી મોકલેલા મેસેજને આગામી 30 જૂન સુધી સુધારી કે એડિટ કરી શકશે નહીં.

નકલી પુરાવા અને એડિટ ફીચરનો દુરુપયોગ રોકવા મોટું પગલું

NTA એ ખુલાસો કર્યો છે કે ટેલિગ્રામ પર આ ડિજિટલ સ્ટ્રાઈક અંતિમ વિકલ્પ તરીકે કરવામાં આવી છે. કેટલાક અસામાજિક તત્વો અને એક્ઝામ માફિયા ટેલિગ્રામના એડિટ ફીચરનો દુરુપયોગ કરીને પેપર લીકના નકલી પુરાવા ઊભા કરી રહ્યા હતા. તેઓ પહેલાથી મોકલેલા જૂના મેસેજને એડિટ કરીને તેમાં પરીક્ષાનું પ્રશ્નપત્ર કે નકલી PDF ઉમેરી દેતા હતા, અને પછી એવો ખોટો દાવો કરતા હતા કે આ પેપર પરીક્ષા શરૂ થતાં પહેલાં જ લીક થઈ ગયું હતું. આવી અફવાઓથી વિદ્યાર્થીઓમાં ગભરાટ ફેલાતો હતો.

ટેલિગ્રામ પર ચાલતી હતી માફિયા ચેનલો

તપાસમાં સામે આવ્યું છે કે ટેલિગ્રામ પર “Paper Leaked NEET”, “Re-NEET 2026”, “Private Mafia” અને “REE NEET MAFIAA” જેવા નામોથી ગેરકાનૂની ચેનલો ધમધમી રહી હતી. આ ચેનલો દ્વારા નિર્દોષ વિદ્યાર્થીઓ અને વાલીઓ પાસેથી અસલી પેપર અપાવવાના બહાને હજારોથી લઈને લાખો રૂપિયા પડાવવામાં આવી રહ્યા હતા.

અમદાવાદ સાયબર ક્રાઈમ એક્શનમાં

આ કૌભાંડને રોકવા માટે ભારતીય સાયબર અપરાધ સમન્વય કેન્દ્ર (I4C) એ બિહાર, ગુજરાત અને રાજસ્થાન પોલીસ સાથે મળીને મોટું ઓપરેશન હાથ ધર્યું છે. આ કડીમાં અમદાવાદ સાયબર ક્રાઈમ બ્રાન્ચે એક મોટી આંતરરાજ્ય સાયબર ઠગાઈ ગેંગના સભ્યોની ધરપકડ કરી છે. આ ગેંગની તપાસમાં 8 ટેલિગ્રામ ચેનલો, આશરે 1.5 કરોડ રૂપિયાના શંકાસ્પદ વ્યવહારો અને લગભગ 1000 જેટલા શંકાસ્પદ મોબાઈલ નંબરો મળી આવ્યા છે.

21 જૂને રી-NEET એક્ઝામ: સમયમાં કરાયો ફેરફાર

આગામી 21 June ના રોજ યોજાનારી NEET-UG રી-એક્ઝામ માટે NTA એ કેટલાક મહત્વના ફેરફારો પણ જાહેર કર્યા છે:

પરીક્ષાનો સમય હવે 180 મિનિટથી (3 કલાક) વધારીને 195 મિનિટ (3 કલાક અને 15 મિનિટ) કરવામાં આવ્યો છે.

વિદ્યાર્થીઓની સુવિધા માટે આન્સર શીટમાં રફ વર્ક કરવા માટેની જગ્યા પણ વધારી દેવામાં આવી છે.

NTA એ સ્વીકાર્યું છે કે આ પ્રતિબંધથી સામાન્ય યુઝર્સને થોડી મુશ્કેલી પડશે, પરંતુ મેસેજ મોકલવા કે મેળવવા પર કોઈ અસર નહીં થાય. એજન્સીએ વિદ્યાર્થીઓને સોશિયલ મીડિયાની અફવાઓથી બચીને માત્ર સત્તાવાર વેબસાઇટ neet.nta.nic.in પર જ ભરોસો રાખવાની સલાહ આપી છે.

આ પણ વાંચો: તમે કંઈ શીખ્યા જ નથી”, NEET પેપર લીક મુદ્દે સુપ્રીમ કોર્ટનો NTA પર આક્રોશ

આ પણ વાંચો: Telegram પર ‘Re-NEET 2026’ પેપર લીકના નામે મહાકૌભાંડ

આ પણ વાંચો:  NEET પરીક્ષાના પેપરો વિમાનો દ્વારા મોકલાશે, સુરક્ષા વ્યવસ્થા પર PM Modi ની સીધી નજર