NEET Paper Leak Case Supreme Court: દેશની સૌથી મોટી અને પ્રતિષ્ઠિત મેડિકલ પ્રવેશ પરીક્ષા NEET-UG ફરી એકવાર વિવાદોના વંટોળમાં ફસાઈ ગઈ છે. વર્ષ 2026માં યોજાયેલી આ પરીક્ષામાં પેપર લીક અને વ્યાપક ગેરરીતિના આક્ષેપો બાદ આ આખોય મામલો દેશની સર્વોચ્ચ અદાલત એટલે કે સુપ્રીમ કોર્ટમાં પહોંચ્યો છે. સોમવારે આ કેસની સુનાવણી દરમિયાન સુપ્રીમ કોર્ટે પરીક્ષા લેતી સંસ્થા નેશનલ ટેસ્ટિંગ એજન્સી (NTA) અને કેન્દ્ર સરકાર પર ભારે આક્રોશ ઠાલવ્યો છે. કોર્ટે ભૂતકાળની ગંભીર ભૂલોમાંથી કોઈ સબક ન લેવા બદલ સરકારની આકરી ઝાટકણી કાઢી છે.

‘તેઓ સુધરવા તૈયાર જ નથી’ – Supreme Courtની ભારે નારાજગી

આ વર્ષે દેશભરમાંથી અંદાજે 23 લાખ જેટલા વિદ્યાર્થીઓએ ભવિષ્યની આશા સાથે NEET-UG પરીક્ષા આપી છે. સુનાવણી દરમિયાન વિદ્યાર્થીઓ પક્ષે હાજર રહેલા એડવોકેટ તન્વી દુબેએ આ મામલાની ગંભીરતા અને ઈમરજન્સી સમજાવીને વહેલી સુનાવણી કરવા વિનંતી કરી હતી.

અરજીઓ પર સુનાવણી કરતી વખતે સુપ્રીમ કોર્ટની બેન્ચે ભૂતકાળના સુધારાઓ જમીની સ્તરે લાગુ ન થવા બદલ ગંભીર નારાજગી વ્યક્ત કરી હતી. કોર્ટે આકરા શબ્દોમાં કહ્યું કે, “આ ખરેખર બહુ દુઃખદ છે કે તેઓ પોતાની ભૂલોમાંથી કોઈ પાઠ શીખ્યા જ નથી. અમે અગાઉ આખી પરીક્ષા પદ્ધતિ સુધારવા માટે એક હાઈ-પાવર્ડ કમિટી બનાવી હતી, તો પણ સ્થિતિ કેમ આવી ને આવી જ રહી? તેઓ સુધરવા તૈયાર જ નથી.”

NTA ને આપી માત્ર ૩ દિવસની ડેડલાઈન

લાખો વિદ્યાર્થીઓના હિતને ધ્યાનમાં રાખીને સુપ્રીમ કોર્ટે નેશનલ ટેસ્ટિંગ એજન્સી (NTA) અને મોનિટરિંગ કમિટીને કડક આદેશ આપ્યા છે. કોર્ટે સ્પષ્ટ અલ્ટીમેટમ આપ્યું છે કે આગામી ૩ દિવસની અંદર સત્તાવાર સોગંદનામું (Affidavit) દાખલ કરીને મોનિટરિંગ સ્ટેટસ રિપોર્ટ રજૂ કરવામાં આવે, જેમાં ૧૪ નવેમ્બરે રચાયેલી વિશેષ મોનિટરિંગ કમિટીએ અત્યાર સુધી શું કામગીરી કરી તેનો સંપૂર્ણ રિપોર્ટ આપવાનો રહેશે. આ ઉપરાંત પરીક્ષાની સુરક્ષા સિસ્ટમને મજબૂત કરવા માટે હાઈ-પાવર્ડ કમિટીએ જે કડક ભલામણો કરી હતી, તેને વાસ્તવિકતામાં લાગુ કરવા માટે શું પગલાં લેવાયા તેની નિયમો અને સુરક્ષાના પાલન અંગેની વિગતવાર માહિતી પણ કોર્ટ સમક્ષ રજૂ કરવાની રહેશે.

સોલિસિટર જનરલને નોટિસ

સુપ્રીમ કોર્ટે આ કેસની મુખ્ય પિટિશન અને તેની સાથે જોડાયેલી તમામ અરજીઓ પર કેન્દ્ર સરકાર વતી હાજર રહેતા સોલિસિટર જનરલ ઓફ ઇન્ડિયાને સત્તાવાર નોટિસ પાઠવી છે. હવે આખોય મામલો 3 દિવસ પછી કોર્ટમાં એફિડેવિટ જમા થયા બાદ ફરી ખુલશે. કોર્ટ હવે એ બારીકાઈથી તપાસશે કે અગાઉની NEET પરીક્ષાઓના કરોડોના કૌભાંડો બાદ સરકારે જે મોટા-મોટા સુધારાના વાયદા કર્યા હતા, તે હકીકતમાં માત્ર કાગળ પર જ રહી ગયા છે કે તેનો કોઈ સાચો અમલ થયો છે.

આ પણ વાંચો: મતદાન અને ચૂંટણી લડવી મૌલિક અધિકાર નથી, સુપ્રીમ કોર્ટે આપી મોટી સ્પષ્ટતા

આ પણ વાંચો: સુપ્રીમ કોર્ટે મહિલાઓની ‘પીરિયડ્સ લીવ’ ની અરજી ફગાવી, જાણો કેમ?

આ પણ વાંચો:  દરેક મોબાઈલ ધારક ‘મીડિયા’ નથી! સુપ્રીમ કોર્ટે નકલી પત્રકારો અને સોશિયલ મીડિયા પેજ પર કર્યો પ્રહાર