વિરાટ કોહલીની આગેવાની હેઠળની ભારતીય ટીમને રવિવારે UAE અને ઓમાનમાં રમાઈ રહેલા T20 વર્લ્ડકપમાં સતત બીજી હારનો સામનો કરવો પડ્યો હતો, જ્યાં ન્યૂઝીલેન્ડે તેમને એકતરફી અંદાજમાં આઠ વિકેટથી હરાવ્યું હતું. સેમિફાઇનલમાં પહોંચવાની ભારતની તકોને ભારતની સેમિફાઇનલમાં ફટકો પડ્યો છે અને ટીમ પાકિસ્તાન વિરુદ્ધ પ્રથમ મેચ 10 વિકેટે હાર્યા બાદ T20 વર્લ્ડકપમાંથી બહાર ફેંકાઇ જવાની આરે છે. ન્યૂઝીલેન્ડનો કેપ્ટન કેન વિલિયમસન ભારતને આસાનીથી હરાવીને ઘણો ખુશ છે અને તેણે ટીમનાં તમામ ખેલાડીઓનાં વખાણ કર્યા છે.
આ પણ વાંચો – T20 World Cup / પોતાની અંતિમ મેચમાં અફઘાનિસ્તાનનો આ ખેલાડી રડી પડ્યો, જુઓ Video
T20 વર્લ્ડકપ 2021ની મોટી મેચમાં ટીમ ઈન્ડિયાને ન્યૂઝીલેન્ડનાં હાથે 8 વિકેટે કારમી હારનો સામનો કરવો પડ્યો હતો. ભારતીય બેટ્સમેનોનું શરમજનક પ્રદર્શન બીજી મેચમાં પણ જારી રહ્યું હતું અને ટીમનો એકપણ બેટ્સમેન કિવી બોલરો સામે રમી શક્યો નહોતો. વિરાટ એન્ડ કંપની ટ્રેન્ટ બોલ્ટની ગતિ અને ઈશ સોઢી અને મિશેલ સેન્ટનરનાં ફરતા બોલ સામે સહેલાઈથી ઝૂકી ગઈ હતી. સેન્ટનર અને સોઢીએ કિવી ટીમની જીતની સ્ટોરી લખી હતી. ઈશ સોઢી, જે ભારતનો છે, તેણે ટીમ ઈન્ડિયાનાં બેટ્સમેનો પર કાળ બનીને તૂટી પડ્યો હતો અને તેણે વિરાટ કોહલી અને રોહિત શર્માની વિકેટ લઈને ન્યૂઝીલેન્ડની જીતની ગાથા લખી હતી.
સોઢીએ પોતાની ચાર ઓવરનાં સ્પેલમાં માત્ર 17 રન જ ખર્ચ્યા હતા. બે ઓવરમાં પહેલા તેણે રોહિત અને પછી કેપ્ટન કોહલીને પેલેવિયનનો રસ્તો બતાવ્યો હતો. સોઢી અને સેન્ટનેરે મધ્ય ઓવરોમાં ચુસ્ત બોલિંગ કરવાનું ચાલુ રાખ્યું અને ભારતીય બેટ્સમેનોને હાથ ખોલવાની કોઈ તક આપી નહીં, જેના કારણે દબાણ વધતું રહ્યું અને ભારતીય બેટ્સમેનોને ખરાબ શોટ રમવાની ફરજ પડી. સેન્ટનર સોઢી કરતાં વધુ ઇકોનોમી રહ્યો હતો અને તેણે તેની ચાર ઓવરમાં માત્ર 15 રન આપ્યા હતા. બન્નેએ મળીને આઠ ઓવરમાં માત્ર 32 રન આપ્યા. કિવી ટીમની સ્પિન જોડીએ ટીમ ઈન્ડિયાનાં બેટ્સમેનોને 7 થી 15 ઓવરની વચ્ચે બાઉન્ડ્રી મારવા દીધી ન હોતી અને ત્યાં જ મેચનો સૌથી મોટો ટર્નિંગ પોઈન્ટ સાબિત થયો હતો.
આ પણ વાંચો – T20 World Cup / પાકિસ્તાનની જીત પર શખ્સે ઉડાવી મજાક, ભારતીય પ્રશંસકે આપ્યો એવો જવાબ કે ચોંકી જશો આપ, Video
ઈશ સોઢી T20 ઈન્ટરનેશનલમાં ભારત વિરુદ્ધ સૌથી વધુ વિકેટ લેનાર બોલર બની ગયો છે. સુકાની વિરાટ કોહલીનાં આઉટ થવાની સાથે જ સોઢીએ ભારત સામે T20 ઈન્ટરનેશનલ ક્રિકેટમાં પોતાની 18 વિકેટ પૂરી કરી હતી. 2016 T20 વર્લ્ડકપમાં પણ, સોઢી અને સેન્ટનરે સાથે મળીને તબાહી મચાવી હતી અને સાત વિકેટ લઈને કિવી ટીમની જીતની સ્ટોરી લખી હતી. આ બે સિવાય ટ્રેન્ટ બોલ્ટે પણ શાનદાર બોલિંગ કરીને ત્રણ વિકેટ પોતાના નામે કરી હતી.