Daman and Dadra Nagar Haveli News: કેન્દ્રશાસિત પ્રદેશ દમણ અને દાદરા નગર હવેલીમાં મ્યુનિસિપલ અને જિલ્લા પંચાયત ચૂંટણીઓની તારીખોની સત્તાવાર જાહેરાત કરવામાં આવી છે. આ જાહેરાત સાથે, પ્રદેશમાં પોલિટીક્સ ગરમાયું છે, ચૂંટણી પંચ દ્વારા જાહેર કરાયેલ સમયપત્રક મુજબ, 5 નવેમ્બરના રોજ મતદાન થશે. આ સ્થાનિક સ્વરાજ્યની ચૂંટણીઓ બંને કેન્દ્રશાસિત પ્રદેશો દમણ અને દાદરા નગર હવેલીમાં એકસાથે યોજાશે. પ્રાદેશિક વહીવટીતંત્રે શાંતિપૂર્ણ અને ન્યાયી ચૂંટણી માટે તૈયારીઓ શરૂ કરી દીધી છે.
આ ચૂંટણીઓ મ્યુનિસિપલ અને જિલ્લા પંચાયત બેઠકો માટેના ઉમેદવારોનું ભાવિ નક્કી કરશે. આ સ્થાનિક સ્તરની વિકાસ સંસ્થાઓ માટેની ચૂંટણીઓએ પ્રદેશમાં નોંધપાત્ર પોલિટીક્સ ગતિવિધિઓ જગાવી છે. જાહેરાત બાદ તરત જ વિવિધ રાજકીય પક્ષો અને સ્થાનિક નેતાઓએ ઉમેદવારોની પસંદગી, પ્રચારની વ્યૂહરચના અને મતદારો સુધી પહોંચવાના પ્રયાસો નક્કી કર્યા છે. રેલીઓ, સભાઓ અને ઘરે ઘરે પ્રચાર દ્વારા મતદારોને આકર્ષવાના પ્રયાસો શરૂ થઈ ગયા છે.
ચૂંટણીની જાહેરાત સાથે આદર્શ આચારસંહિતાનો પણ પ્રારંભ થયો છે. કાયદો અને વ્યવસ્થા જાળવવા અને ચૂંટણી નિયમોનું કડક પાલન સુનિશ્ચિત કરવા માટે વહીવટીતંત્ર દ્વારા ખાસ વ્યવસ્થા કરવામાં આવી રહી છે. 5 નવેમ્બરની ચૂંટણી સ્થાનિક રાજકીય પરિદૃશ્યને આકાર આપશે અને આગામી પાંચ વર્ષ માટે કોણ સત્તા સંભાળશે તે નક્કી કરશે. સમગ્ર પ્રદેશના મતદાતાઓ તેના મતાધિકારનો ઉપયોગ કરવા માટે ઉત્સુક છે.
આ પણ વાંચો:કેન્દ્રશાસિત પ્રદેશ દીવ,દમણ અને દાદરા નગર હવેલી મર્જ થઈ જશે
