Iran News : ઈરાનમાં સર્વોચ્ચ નેતા અલી ખામેનીની સરકાર સામે ચાલી રહેલા વ્યાપક વિરોધ પ્રદર્શનો વચ્ચે અમેરિકા ખુલ્લેઆમ કડક વલણ અપનાવ્યું છે. અમેરિકાના રાષ્ટ્રપતિ ડોનાલ્ડ ટ્રમ્પે ઈરાનના શાસનને ચેતવણી આપી છે કે જો શાંતિપૂર્ણ પ્રદર્શનકારીઓ પર હિંસા ચાલુ રહેશે, તો અમેરિકા તેમનો બચાવ કરવા માટે આગળ આવશે.
ઈરાન (Iran) માં હાલ શાસન પરિવર્તનની માંગ સાથે ચાલી રહેલા વિરોધ પ્રદર્શનો આજે છઠ્ઠા દિવસે પ્રવેશી ગયા છે. શરૂઆતમાં આ પ્રદર્શન આર્થિક મુદ્દાઓને લઈને શરૂ થયા હતા, પરંતુ હવે તે રાજકીય સ્વરૂપ ધારણ કરી ચૂક્યા છે. રસ્તાઓ પર ઉતરેલા લોકો “સરમુખત્યારને મોત” અને “મુલ્લાઓ, દેશ છોડી દો” જેવા ઉગ્ર નારા લગાવી રહ્યા છે.
ગોળીબારમાં મોત, પરિસ્થિતિ વણસી
માનવાધિકાર સંગઠનો અનુસાર, સુરક્ષા દળોની ગોળીબારમાં અત્યાર સુધીમાં ઓછામાં ઓછા 6 પ્રદર્શનકારીઓના મોત થયા છે. કુહદશ્તમાં અમીરહેસમ ખોદયારીફર્દને માથામાં ગોળી મારીને ઠાર કરવામાં આવ્યો હતો. ફોલાદશહરમાં દારિયુશ અંસારી બખ્તિયારીવંદને કલાશ્નિકોવ એસોલ્ટ રાઇફલથી ગોળી મારી દેવામાં આવી. અઝના અને લોર્ડેગન શહેરોમાં પણ વિરોધીઓના મોતની પુષ્ટિ થઈ છે.
ઈરાન (Iran) ઈન્ટરનેશનલના અહેવાલ મુજબ, મારવદાશ્ત શહેરમાં તાલેઘાની સ્ટ્રીટ પર ચાલી રહેલા વિરોધ દરમિયાન સુરક્ષા દળોના સીધા ગોળીબારમાં ખોદાદાદ શરીફી મોનફારેદ નામના સ્થાનિક નાગરિકનું મોત થયું હતું.પરિસ્થિતિ વધુ બગડતા ઈરાન સરકારે અનેક વિસ્તારોમાં ઈન્ટરનેટ સેવાઓ પર પ્રતિબંધ મૂક્યો છે.
Iran ને ટ્રમ્પની ખુલ્લી ધમકી
આ તમામ ઘટનાઓ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ પર કડક નિવેદન આપ્યું છે. તેમણે લખ્યું:
“જો ઈરાન શાંતિપૂર્ણ પ્રદર્શનકારીઓ પર ગોળીબાર કરે છે અને હિંસાનો માર્ગ અપનાવે છે, જેમ કે તેમની પરંપરા રહી છે, તો યુનાઇટેડ સ્ટેટ્સ ઑફ અમેરિકા તેમની મદદ માટે આવશે.”
ટ્રમ્પે આગળ ઉમેર્યું,
“અમે તૈયાર છીએ. અમે બંધ છીએ, લોડેડ છીએ અને જવા માટે તૈયાર છીએ.”
આ નિવેદન બાદ વૈશ્વિક રાજકીય વર્તુળોમાં ચિંતા વધી ગઈ છે કે ઈરાન મુદ્દે અમેરિકા સીધો હસ્તક્ષેપ કરી શકે છે.
Iran સરકારનો કડક અભિગમ
બીજી તરફ, Iran નું શાસન કોઈ પણ પ્રકારની ઢીલ આપવાના મૂડમાં નથી. લોરેસ્તાન પ્રાંતના મુખ્ય ન્યાયાધીશ સઈદ શાહવારીએ જણાવ્યું કે અઝના અને ડેલ્ફાન શહેરોમાં અનેક પ્રદર્શનકારીઓની ધરપકડ કરવામાં આવી છે. તેમણે પોલીસ અને ન્યાયિક અધિકારીઓને “તોફાનીઓ” સામે કડક અને નિર્ણાયક કાર્યવાહી કરવા સૂચના આપી છે.
રાજ્ય સંચાલિત ફાર્સ ન્યૂઝ એજન્સી મુજબ, અઝનામાં પ્રદર્શન દરમિયાન પોલીસ મુખ્યાલય પર હુમલો થયો હતો, જેમાં ત્રણ લોકોના મોત થયા અને 17 લોકો ઘાયલ થયા હતા.
અમેરિકા: “લોકોના ગુસ્સાની સ્વાભાવિક અભિવ્યક્તિ”
ઈરાન ઈન્ટરનેશનલના અહેવાલ અનુસાર, યુએસ સ્ટેટ ડિપાર્ટમેન્ટે ઈરાનમાં ચાલી રહેલા વિરોધોને સરકારની નિષ્ફળતાઓ સામે લોકોના “સમજી શકાય તેવા ગુસ્સા” તરીકે ગણાવ્યા છે.
સ્ટેટ ડિપાર્ટમેન્ટના અધિકારીએ જણાવ્યું કે ઈરાન સરકારે દાયકાઓથી દેશના અર્થતંત્ર, કૃષિ, પાણી અને વીજળી જેવા મૂળભૂત ક્ષેત્રોની અવગણના કરી છે અને તેના બદલે આતંકવાદી સંગઠનો અને પરમાણુ કાર્યક્રમ પર અબજો ડોલર ખર્ચ્યા છે.
