Vadodara News: વડોદરા જિલ્લામાં ઓનલાઈન ફ્રોડનો વધુ એક કિસ્સો સામે આવ્યો છે. પોર ગામના એક ખેડૂતના બેંક ખાતામાંથી કુલ રૂ.2,67,780 ઉપાડી લેવાયા હોવાની ફરિયાદ નોંધાઈ છે. ખેડૂત પોતાના મોબાઈલમાં બેંક ઓફ બરોડાની Bob World App અપડેટ કરી રહ્યા હતા તે દરમિયાન સમગ્ર ઘટના બની હોવાનું સામે આવ્યું છે.
પોર ગામના પટેલ ફળિયામાં રહેતા વિમલભાઈ આશાભાઈ પટેલ (ઉંમર 51 વર્ષ) ખેતી કરીને પરિવારનું ગુજરાન ચલાવે છે. તેઓ બેંક ઓફ બરોડાની પોર શાખાના ખાતાધારક છે અને છેલ્લા આશરે ત્રણ વર્ષથી મોબાઈલ ફોનમાં બેંકની ‘Bob World App’નો ઉપયોગ કરીને નાણાકીય વ્યવહારો કરતા હતા.
Bob World App અપડેટ કર્યા બાદ થઈ ગઈ બંધ
વિમલભાઈ પોતાના મોબાઈલમાં ‘Bob World App’ અપડેટ કરી રહ્યા હતા ત્યારે એપ્લિકેશન અચાનક બંધ થઈ ગઈ હતી. તેમને એપનો પાસવર્ડ યાદ ન હોવાથી તેઓ તેને ફરીથી ખોલી શક્યા નહોતા.આ દરમિયાન સતત ત્રણ દિવસ સુધી તેમના મોબાઈલ ફોન પર વારંવાર OTP આવતા રહ્યા હતા. જોકે, ફરિયાદ મુજબ તેમણે આ OTP કોઈ અન્ય વ્યક્તિ સાથે શેર કર્યા નહોતા.
પાસવર્ડ બદલી એપ શરૂ કરી તો ખાતામાંથી રૂપિયા ઉપડી ગયા
થોડા સમય બાદ વિમલભાઈએ એપ્લિકેશનનો પાસવર્ડ બદલીને તેને ફરીથી શરૂ કરી હતી. એપમાં તપાસ કરતાં તેમના પગ નીચેથી જમીન સરકી ગઈ હતી, કારણ કે તેમના UPI ID મારફતે કુલ 10 અલગ-અલગ ટ્રાન્ઝેક્શન કરવામાં આવ્યા હોવાનું જાણવા મળ્યું હતું.આ 10 ટ્રાન્ઝેક્શનના માધ્યમથી તેમના બેંક ખાતામાંથી કુલ રૂ.2,67,780 ઉપાડી લેવામાં આવ્યા હતા.
તાત્કાલિક બેંક ખાતું બ્લોક કરાવ્યું
ખાતામાંથી મોટી રકમ ઉપડી ગઈ હોવાનું ધ્યાનમાં આવતાં વિમલભાઈએ તાત્કાલિક પગલાં લીધાં હતાં. તેઓ બેંક ઓફ બરોડાની પોર શાખામાં પહોંચ્યા હતા અને પોતાનું બેંક એકાઉન્ટ બ્લોક કરાવી દીધું હતું. આ ઉપરાંત તેમણે સાયબર ફ્રોડ અંગેની ફરિયાદ માટે સાયબર ક્રાઈમ હેલ્પલાઈન 1930 પર ફોન કરીને સમગ્ર ઘટનાની જાણ કરી હતી.
Bob World App અપડેટ કરતી વખતે સાવચેતી રાખવી જરૂરી
આ ઘટનાએ ફરી એકવાર ઓનલાઈન બેંકિંગ અને મોબાઈલ એપ્લિકેશનનો ઉપયોગ કરતી વખતે સાવચેતી રાખવાની જરૂરિયાત સામે લાવી છે. કોઈ અજાણી વ્યક્તિ સાથે OTP, UPI PIN, પાસવર્ડ કે બેંકિંગ સંબંધિત અન્ય ગુપ્ત માહિતી શેર ન કરવી જોઈએ. ખાતામાં કોઈ શંકાસ્પદ ટ્રાન્ઝેક્શન જણાય તો તાત્કાલિક બેંકનો સંપર્ક કરી ખાતું સુરક્ષિત કરાવવું અને સાયબર ક્રાઈમ હેલ્પલાઈન 1930 પર ફરિયાદ કરવી જરૂરી છે. પોર ગામના ખેડૂત સાથે બનેલી આ ઘટનાને લઈને સાયબર ફ્રોડની ફરિયાદ નોંધાયા બાદ સંબંધિત તંત્ર દ્વારા તપાસ હાથ ધરવામાં આવી છે.
આ પણ વાંચો:ઓનલાઈન પાર્ટ ટાઇમ જોબ આપવાના નામે ઠગાઈ કરતો આરોપી ઝડપાયો…
આ પણ વાંચો:વડોદરાના યુવક સાથે કેનેડાની નોકરીના નામે ઠગાઈ, ₹1.10 લાખ પડાવ્યા અને પાસપોર્ટ લીધો; ₹2 લાખ માગી ધમકી
આ પણ વાંચો:રેલવેમાં નોકરી અપાવવાના નામે 10.24 લાખની ઠગાઈ, વડોદરાના 4 યુવકોને નકલી લેટર આપી ફસાવ્યા
