Veraval News: ગીર સોમનાથ જિલ્લાના વેરાવળ-પાટણ સંયુક્ત નગરપાલિકાએ ચોમાસાની સિઝન અને સતત વરસાદને ધ્યાનમાં રાખીને શહેરની જર્જરિત (Dangerous Buildings) અને અતિ જોખમી ઇમારતો અંગે વિશેષ સાવચેતીના પગલાં શરૂ કર્યા છે. નગરપાલિકાના સર્વે મુજબ શહેરમાં 82થી વધુ ઇમારતો અતિ જોખમી હાલતમાં છે, જે કોઈપણ સમયે ધરાશાયી થઈ શકે તેવી સ્થિતિમાં હોવાનું જણાવાયું છે. આથી પાલિકા તંત્રએ નાગરિકોને આવી ઇમારતો તાત્કાલિક ખાલી કરીને સલામત સ્થળે સ્થળાંતર કરવાની અપીલ કરી છે.
82થી વધુ ઇમારતો અતિ જોખમી જાહેર
નગરપાલિકા દ્વારા કરવામાં આવેલા સર્વેમાં શહેરની 82થી વધુ ઇમારતોને જર્જરિત (Dangerous Buildings) અને અતિ જોખમી જાહેર કરવામાં આવી છે. ભારે વરસાદના કારણે આ ઇમારતોની સ્થિતિ વધુ નબળી બનતાં અકસ્માતની શક્યતા વધી છે. જાનહાનિ અને મિલકતને નુકસાન ન થાય તે માટે પાલિકા તંત્ર સતત દેખરેખ રાખી રહ્યું છે.
અગાઉ નોટિસ અને વીજ જોડાણ કાપવાની કાર્યવાહી
પાલિકાએ અગાઉ જ જોખમી ઇમારતોના માલિકો અને રહેવાસીઓને નોટિસ પાઠવીને મકાનો ખાલી કરવાની સૂચના આપી હતી. કેટલાક અત્યંત જોખમી મકાનોના વીજ જોડાણ પણ સુરક્ષાના હિતમાં કાપી દેવામાં આવ્યા હતા. તેમ છતાં કેટલીક જગ્યાએ લોકો હજુ પણ રહેતા હોવાનું સામે આવતા હવે વધુ સક્રિય અભિયાન શરૂ કરવામાં આવ્યું છે.
Dangerous Buildings: ઓટો રિક્ષા દ્વારા શહેરભરમાં જનજાગૃતિ અભિયાન
નગરપાલિકાએ લોકોને ચેતવવા માટે ઓટો રિક્ષા પર લાઉડસ્પીકર લગાવી શહેરભરમાં જનજાગૃતિ અભિયાન શરૂ કર્યું છે. મુખ્ય માર્ગો, રહેણાંક વિસ્તારો અને જોખમી ઇમારતોની આસપાસ લોકોને જાહેર અનાઉન્સમેન્ટ દ્વારા અપીલ કરવામાં આવી રહી છે કે તેઓ જર્જરિત મકાનોમાં પ્રવેશ ન કરે અને તાત્કાલિક સલામત સ્થળે ખસી જાય.સાથે જ આસપાસના રહેવાસીઓને પણ આવી ઇમારતોથી સુરક્ષિત અંતર જાળવવાની સલાહ આપવામાં આવી રહી છે.
જાહેર સુરક્ષા પ્રથમ પ્રાથમિકતા
નગરપાલિકા તંત્રએ જણાવ્યું છે કે નાગરિકોની સુરક્ષા સર્વોચ્ચ પ્રાથમિકતા છે. ચોમાસા દરમિયાન કોઈ દુર્ઘટના ન બને તે માટે આગોતરા પગલાં લેવામાં આવી રહ્યા છે. મિલકતધારકોને જર્જરિત ઇમારતો (Dangerous Buildings)નું તાત્કાલિક સમારકામ, પુનઃનિર્માણ અથવા જરૂરી હોય તો તેને દૂર કરવાની સૂચના આપવામાં આવી છે. જાહેર સુરક્ષાને જોખમમાં મૂકનારા કિસ્સાઓમાં નિયમ મુજબ કડક કાર્યવાહી કરવામાં આવશે તેવી પણ ચેતવણી આપવામાં આવી છે.
આ પણ વાંચો:જૂનાગઢમાં 450 કરતા વધુ જર્જરિત ઇમારતોને નોટિસ, 60 જેટલી ઇમારતો ઉતારી લેવાઇ
આ પણ વાંચો:AMCની મુખ્ય ઓફિસ જ બની જોખમનું ઘર! જર્જરિત B બ્લોકમાં 15 વિભાગો કાર્યરત, લિફ્ટ પણ બંધ
આ પણ વાંચો:સુરતમાં જર્જરિત મકાનનો સ્લેબ ધરાશાયી, મેડિકલ સ્ટોરના 75 વર્ષીય માલિકનું મોત
