પશ્ચિમ બંગાળના કૂચ બિહાર જિલ્લાના સીતલકુચીમાં સીઆઈએસએફ દ્વારા કરવામાં આવેલા ફાયરિંગમાં ચાર લોકોનાં મોત નીપજ્યાં છે. આ ઘટના બાદ તૃણમૂલ કોંગ્રેસે પ્રેસ કોન્ફરન્સ કરીને ચૂંટણી પંચ પર સવાલો ઉભા કર્યા છે. ટીએમસીએ આયોગને સવાલ પૂછ્યો છે કે કૂચ બિહારમાં હિંસક અથડામણ દરમિયાન કેન્દ્રીય દળએ કેમ ગોળીબાર કર્યો, જેમાં ચાર લોકોનાં મોત નીપજ્યાં. ટીએમસીએ આજે ચૂંટણી પંચનો જવાબ માંગ્યો છે.
એક વરિષ્ઠ પોલીસ અધિકારીએ કહ્યું કે, “પ્રારંભિક અહેવાલો અનુસાર, એક ગામમાં પોતાની ઉપર હુમલો કરવામાં આવતા સીઆઈએસએફના જવાનોએ ફાયરિંગ કર્યું હતું. જેમાં ચાર લોકો માર્યા ગયા હતા. ત્યાં અથડામણ થઈ હતી અને સ્થાનિકોએ તેમને ઘેરી લીધા હતા અને તેમની રાઇફલો છીનવી લેવાનો પ્રયાસ કર્યો હતો
કૂચબહારની ઘટના બાદ કેન્દ્રીય ચૂંટણી પંચે હાલના સમય માટે પોલિંગ સ્ટેશન -125 પર ચૂંટણી મોકૂફ કરી છે. કેન્દ્રિય ચૂંટણી પંચે આ નિર્ણય વિશેષ નિરીક્ષકના વચગાળાના અહેવાલના આધારે લીધો છે. હવે ચૂંટણી પંચે વિશેષ પોલીસ નિરીક્ષક વિવેક દુબેને માથાભંગાની ઘટના અંગે અહેવાલ માંગ્યો છે. સૂત્રોના જણાવ્યા અનુસાર, સ્પેશ્યલ પોલીસ ઓબ્ઝર્વરના અહેવાલમાં આવેલા અહેવાલમાં એવું કહેવામાં આવ્યું છે કે લગભગ 100 લોકોએ મતદાન અધિકારી પર હુમલો કર્યો હતો, ત્યારબાદ સુરક્ષા દળોના હથિયારો છીનવાનો પ્રયાસ પણ થયો હતો. સેન્ટ્રલ ફોર્સે તેના બચાવમાં ફાયરિંગ કર્યું હતું.
પહેલીવાર મત આપવા આવેલા યુવકની ગોળી મારીને હત્યા કરવામાં આવી હતી
પોલીસે એ પણ માહિતી આપી છે કે કૂચ બિહાર જિલ્લાના એક મતદાન મથકની બહાર, અજાણ્યા લોકોએ પહેલી વાર મત આપવા આવેલા યુવકને ગોળી મારીને હત્યા કરી હતી. તૃણમૂલ કોંગ્રેસે આરોપ લગાવ્યો હતો કે હત્યા પાછળ ભાજપનો હાથ છે, જ્યારે કેસરી પક્ષે દાવો કર્યો છે કે પીડિત મતદાન મથકનો મતદાન એજન્ટ છે અને આ માટે રાજ્યના શાસક પક્ષને દોષી ઠેરવે છે.
એક પોલીસ અધિકારીએ જણાવ્યું હતું કે સીતાલકુચીના પઠાણટુલી વિસ્તારમાં આનંદ બર્મન નામના યુવકને બૂથ નંબર 85 ની બહાર ખેંચીને ગોળી ચલાવવામાં આવી હતી. ઘટના સમયે મતદાન ચાલી રહ્યું હતું. આ ઘટનાને પગલે તૃણમૂલ અને ભાજપના સમર્થકો વચ્ચે ઘર્ષણ થયું હતું અને મતદાન મથકની બહાર બોમ્બ ફેંકી દેતાં ઘણા લોકો ઘાયલ થયા હતા. પરિસ્થિતિને કાબૂમાં લેવા કેન્દ્રીય દળોએ લાઠીચાર્જ કરવો પડ્યો.
ચૂંટણી અધિકારીએ શું કહ્યું
એક ચૂંટણી અધિકારીએ કહ્યું કે, અમને માહિતી મળી કે કૂચ બિહાર જિલ્લાના સીતલકુચીમાં મતદાન મથકની બહાર એક વ્યક્તિને ગોળી મારીને હત્યા કરવામાં આવી હતી. અમે સુપરવાઇઝરને વહેલી તકે અહેવાલ આપવા અને પરિસ્થિતિ વિશે માહિતી મેળવવા જણાવ્યું છે. આ વિસ્તારમાં પોલીસ અને રેપિડ એક્શન ફોર્સ (આરએએફ) તૈનાત કરવામાં આવી છે.
ભાજપના પ્રદેશ પ્રમુખ અને સાંસદ દિલીપ ઘોષ પર થોડા દિવસો પહેલા સીતલકુચી વિસ્તારમાં હુમલો થયો હતો. તૃણમૂલ નેતા અને નતાબરી મત વિસ્તારના ઉમેદવાર રવીન્દ્રનાથ ઘોષે આરોપ લગાવ્યો કે આ હત્યા પાછળ ભાજપના કાર્યકરોનો હાથ છે. તેમણે પીટીઆઈને કહ્યું, ‘હત્યા પાછળ ભાજપના ગુંડાઓનો હાથ છે. તેઓ ઘણા દિવસોથી અહીં અશાંતિ પેદા કરી રહ્યા છે કારણ કે તેઓ ચૂંટણી હારી રહ્યા છે અને હવે તેઓ લોકોની હત્યા કરી રહ્યા છે.
