ICC T20 વર્લ્ડ કપ 2021માં ભારતીય ક્રિકેટ ટીમની સફર પૂરી થતાની સાથે જ મુખ્ય કોચ રવિ શાસ્ત્રીનો કોચ તરીકેનો કાર્યકાળ પણ સમાપ્ત થઈ ગયો. શાસ્ત્રીએ ટૂર્નામેન્ટની શરૂઆત પહેલા જાહેરાત કરી હતી કે તેઓ હવે ટીમ ઈન્ડિયાના કોચ તરીકે તેમનો કાર્યકાળ વધારવા માંગતા નથી. શાસ્ત્રીની જગ્યાએ રાહુલ દ્રવિડને ટીમ ઈન્ડિયાના મુખ્ય કોચ તરીકે નિયુક્ત કરવામાં આવ્યા છે. પાકિસ્તાનના પૂર્વ ફાસ્ટ બોલર વસીમ અકરમે શાસ્ત્રીના જવા પર ઈમોશનલ પોસ્ટ લખી છે. તેમણે વિરાટ કોહલીની કેપ્ટનશિપ પર પણ પોતાનો અભિપ્રાય આપ્યો. T20 કેપ્ટન તરીકે કોહલીની છેલ્લી મેચ ICC T20 વર્લ્ડ કપ 2021માં નામિબિયા સામે હતી.
અકરમે સોશિયલ મીડિયા એપ ‘કુ’ પર લખ્યું, ‘ટી-20 કેપ્ટન તરીકે વિરાટ કોહલી જેવા ચેમ્પિયનને શાનદાર વિદાય. T20I કેપ્ટનશિપના છેલ્લા દિવસે, અમે તેનું નેતૃત્વ ફરીથી જોયું જ્યારે તેણે સૂર્યકુમાર યાદવને નામિબિયા સામેની મેચ પુર્ણ કરવા માટે બેટિંગ કરવા મોકલ્યો, જ્યારે તે પોતે કરી શક્યો હોત. સારા પ્રદર્શનનો શ્રેય નામિબિયાને પણ જાય છે. પરંતુ મારું દિલ મારા મિત્ર રવિ શાસ્ત્રી સાથે છે. વેલ્ડન, કોમેન્ટ્રી બોક્સ પર પાછા આવ, મિત્ર.’
અકરમે પાછળથી એક શો ‘A Sports’ દરમિયાન ભારતીય ટીમના મુખ્ય કોચ તરીકે શાસ્ત્રીના ચાર વર્ષના કાર્યકાળની પ્રશંસા કરી. તેણે એમ પણ કહ્યું કે શાસ્ત્રી માટે કોમેન્ટ્રી બોક્સમાં પરત ફરવાના દરવાજા ખુલ્લા છે. એવા અહેવાલો છે કે શાસ્ત્રી નવી IPL ટીમ અમદાવાદ ફ્રેન્ચાઈઝી સાથે કામ કરી શકે છે. તેમણે કહ્યું, ‘મારો સારો મિત્ર, શાઝી. કોચ તરીકે આ તમારી છેલ્લી ટૂર્નામેન્ટ હતી અને મને લાગે છે કે તમે છેલ્લા ત્રણ વર્ષમાં શાનદાર કામ કર્યું છે. અમે તેના વિશે અગાઉ વાત કરી હતી. મને લાગે છે કે તે તેજસ્વી હતો.’
