ગયાનાઃ ICC મેન્સ T20 વર્લ્ડ કપ 2024 ની મેચ નંબર-2 માં, વેસ્ટ ઈન્ડિઝે પપુઆ ન્યુ ગિની (P.N.G.) ને 5 વિકેટથી હરાવ્યું. 2 જૂન (રવિવારે) ગયાનાના પ્રોવિડન્સ સ્ટેડિયમમાં રમાયેલી આ મેચમાં યજમાન વેસ્ટ ઈન્ડિઝને જીતવા માટે 137 રનનો ટાર્ગેટ હતો, જે તેણે છ બોલ બાકી રહેતાં હાંસલ કરી લીધો હતો.
પાપુઆ ન્યુ ગિનીએ મેચમાં શાનદાર રમત રમી અને મેચને રોમાંચક બનાવવામાં કોઈ કસર છોડી ન હતી. એક સમયે વેસ્ટ ઈન્ડિઝની પાંચ વિકેટ 97 રનમાં પડી ગઈ હતી અને માત્ર ચાર ઓવર બાકી હતી. અહીંથી રોસ્ટન ચેઝ અને આન્દ્રે રસેલે 18 બોલમાં અણનમ 37 રન જોડ્યા અને ટીમને જીત અપાવી. રોસ્ટન ચેઝે 27 બોલમાં 4 ચોગ્ગા અને બે છગ્ગાની મદદથી અણનમ 42 રન બનાવ્યા હતા. જ્યારે રસેલે 9 બોલમાં 1 છગ્ગાની મદદથી 15 રન બનાવ્યા હતા. બ્રાન્ડોન કિંગ (34) અને નિકોલસ પૂરન (27)એ પણ ઉપયોગી ઇનિંગ્સ રમી હતી. પાપુઆ ન્યુ ગીની તરફથી કેપ્ટન અસદ વાલાએ સૌથી વધુ બે વિકેટ લીધી હતી.
ટોસ હાર્યા બાદ પ્રથમ બેટિંગ કરતા પાપુઆ ન્યુ ગિનીએ આઠ વિકેટે 136 રન બનાવ્યા હતા. પાપુઆ ન્યુ ગિની તરફથી સેસે બાઉએ સૌથી વધુ 50 રનની ઇનિંગ્સ રમી હતી. બાઉએ 43 બોલમાં 6 ચોગ્ગા અને 1 છગ્ગા ફટકાર્યા હતા. વિકેટકીપર બેટ્સમેન કિલપિન ડોરિગાએ પણ 18 બોલમાં ત્રણ ચોગ્ગાની મદદથી અણનમ 28 રન બનાવ્યા હતા. કેપ્ટન અસદ વાલા (21) અને ચાડ સોપર (10) પણ બે આંકડા સુધી પહોંચવામાં સફળ રહ્યા. વેસ્ટ ઈન્ડિઝ માટે અલઝારી જોસેફ અને આન્દ્રે રસેલે બે-બે વિકેટ લીધી હતી. જ્યારે અકીલ હુસૈન, રોમારિયો શેફર્ડ અને ગુડાકેશ મોતીએ 1-1 વિકેટ લીધી હતી.
આ મેચમાં રોવમેન પોવેલે વેસ્ટ ઈન્ડિઝની કેપ્ટનશીપ કરી હતી. જ્યારે અસદ વાલાના ખભા પર પાપુઆ ન્યુ ગિનીની જવાબદારી હતી. વેસ્ટ ઈન્ડિઝની ટીમમાં આન્દ્રે રસેલ, નિકોલસ પૂરન જેવા મજબૂત ક્રિકેટરો પણ સામેલ છે. જો જોવામાં આવે તો ક્રિકેટના ઈતિહાસમાં પ્રથમ વખત બંને ટીમો વચ્ચે મેચ રમાઈ હતી.
આ પણ વાંચો: T20 વર્લ્ડ કપ સુરક્ષામાં મોટી ચૂક, રોહિતને મળવા ઘૂસી આવ્યો…
આ પણ વાંચો: KKR સ્ટાર વેંકટેશ ઐય્યર થયો ‘ક્લીન બોલ્ડ’, લગ્નનાં તાંતણે બંધાયો
આ પણ વાંચો: બોલરો માટે આક્રમક ગણાતા ગંભીરને કોણે કર્યો હતો ‘ક્લિન બોલ્ડ’
આ પણ વાંચો: જોકોવિચે કપરા મુકાબલામાં મુસેટ્ટીને હરાવીને ફેડરરના રેકોર્ડની બરાબરી કરી આગળના રાઉન્ડમાં પ્રવેશ કર્યો
