દિલ્હીના લાલ કિલ્લાને ભલે દેશની ધરોહર માનવામાં આવે છે, પરંતુ એક મહિલાએ હાઈકોર્ટમાં અરજી કરીને પોતાનો અધિકાર વ્યક્ત કર્યો હતો. દિલ્હી હાઈકોર્ટમાં અરજી દાખલ કરીને મહિલાએ દાવો કર્યો હતો કે તે મુગલ બાદશાહ બહાદુર શાહ ઝફરના પૌત્રની વિધવા છે. તેથી, પરિવારની કાનૂની વારસદાર હોવાને કારણે, તેણી લાલ કિલ્લાની માલિકી ધરાવે છે. આ અરજીમાં મહિલાએ પોતાને કાનૂની વારસદાર ગણાવીને લાલ કિલ્લાની માલિકી તેને સોંપવાની વિનંતી કરી હતી. જોકે કોર્ટે આ અરજી ફગાવી દીધી હતી.
પોતાની અરજીમાં મહિલાએ કહ્યું હતું કે બ્રિટિશ ઈસ્ટ ઈન્ડિયા કંપનીએ લાલ કિલ્લા પર ગેરકાયદેસર રીતે કબજો મેળવ્યો છે અને તેને તેની માલિકી આપવી જોઈએ. અરજીને ફગાવી દેતા જસ્ટિસ રેખા પલ્લીની સિંગલ બેન્ચે અવલોકન કર્યું કે 150 વર્ષથી વધુ સમય પછી કોર્ટનો સંપર્ક કરવામાં આવ્યો હતો અને તેનું કોઈ સમર્થન નથી. આમ કોર્ટે મહિલાના રસપ્રદ દાવાને ફગાવી દીધો હતો. અરજદાર સુલતાના બેગમે રજૂઆત કરી હતી કે તે બહાદુર શાહ ઝફરના પ્રપૌત્ર મિર્ઝા મોહમ્મદ બેદર બખ્તની પત્ની છે, જેનું 22 મે 1980ના રોજ અવસાન થયું હતું.
અરજદારે રજૂઆત કરી હતી કે બ્રિટિશ ઈસ્ટ ઈન્ડિયા કંપનીએ મનસ્વી રીતે મુઘલ શાસક પાસેથી તેના અધિકારો છીનવી લીધા હતા. ન્યાયાધીશે કહ્યું, ‘મારું ઈતિહાસનું જ્ઞાન ઘણું નબળું છે પરંતુ તમે દાવો કર્યો હતો કે બ્રિટિશ ઈસ્ટ ઈન્ડિયા કંપની દ્વારા 1857માં તમારી સાથે અન્યાય કરવામાં આવ્યો હતો. તો પછી તેમાં 150 વર્ષનો વિલંબ કેમ થયો? તમે આટલા વર્ષોથી શું કરી રહ્યા હતા?’.
