Vadodara News : વડોદરા શહેરના ફતેગંજ વિસ્તારમાં રહેતા યુવકે માંજલપુર વિસ્તારમાં આવેલા ડ્રીમ આઇકોનિયા બિલ્ડિંગના નવમા માળેથી કૂદીને આપઘાત કરી લેતાં ચકચાર મચી જવા પામી છે. આ બનાવ અંગે માંજલપુર પોલીસે ઘટનાસ્થળે પહોંચી યુવકના મૃતદેહનો કબજો લઇ પોસ્ટમોર્ટમ અર્થે શહેરની સયાજી હોસ્પિટલ ખાતે ખસેડ્યો છે. બનાવ અંગેના CCTV પણ સામે આવ્યા છે.
વડોદરા શહેરના ફતેગંજ વિસ્તારમાં રહેતો અને માંજલપુર વિસ્તારમાં લોન્ડ્રીની દુકાન ધરાવતા યુવકે માંજલપુર વિસ્તારમાં આવેલા ડ્રીમ આઇકોનિયાના બિલ્ડિંગના નવમા માળેથી અગમ્ય કારણસર કૂદકો માર્યો. આ યુવકનું નામ બ્રિજેશ દશરથભાઈ પરદેશી (ઉંમર વર્ષ 45), જેઓ શહેરના ફતેગંજ વિસ્તારમાં આવેલી ધોબી શેરીમાં તેમનાં માતા-પિતા સાથે રહેતા હતા.
આ યુવક આ બિલ્ડિંગમાં કયા કારણસર ગયો અને શા માટે આ પગલું ભર્યું એ દિશામાં માંજલપુર પોલીસે વધુ તપાસ હાથ ધરી છે. આ યુવકના પરિવારમાં માતા-પિતા ઉંમરલાયક છે અને તેમની બહેનનાં લગ્ન થયેલાં છે. મૃતક યુવકની બહેન મુંબઈ ખાતે રહે છે અને તેઓ પરત આવ્યા બાદ અંતિમસંસ્કાર કરવામાં આવશે. હાલમાં માંજલપુર પોલીસે આ યુવકે કરેલી આત્મહત્યા પાછળનું કારણ જાણવા પ્રયાસ હાથ ધરી પોસ્ટમોર્ટમ અંગેની કાર્યવાહી હાથ ધરી છે.
