મહારાષ્ટ્રમાં ‘ઓમિક્રોન’ના કેસ અચાનક વધી રહ્યા છે. શનિવારે પહેલો કેસ સામે આવ્યા બાદ રવિવારે વધુ 7 લોકો પોઝિટિવ મળી આવ્યા છે. હવે મહારાષ્ટ્રમાં કોરોના ‘ઓમિક્રોન’ વેરિઅન્ટના કુલ 8 કેસ સામે આવ્યા છે. મહારાષ્ટ્ર રાજ્યના જાહેર આરોગ્ય વિભાગે રવિવારે જણાવ્યું હતું કે, “મહારાષ્ટ્રમાં COVID19 ના ઓમિક્રોન વેરિઅન્ટ માટે વધુ સાત લોકો પોઝિટીવ મળી આવ્યા છે. મહારાષ્ટ્રમાં અત્યાર સુધીમાં ઓમિક્રોન વેરિઅન્ટના કુલ 8 કેસ નોંધાયા છે.
આ પહેલા શનિવારે મહારાષ્ટ્રના થાણે જિલ્લામાં કોરોના વાયરસના નવા સ્વરૂપ ‘ઓમિક્રોન’થી સંક્રમિત પ્રથમ કેસ જોવા મળ્યો હતો. મહારાષ્ટ્રમાં આ પ્રકારના ચેપનો આ પહેલો અને દેશમાં ચોથો કેસ હતો. પરંતુ હવે દેશમાં કુલ 12 કેસ નોંધાયા છે.
મહારાષ્ટ્રમાં વધુ સાત લોકોમાં કોરોનાના નવા પ્રકારમાં કોરોનાની પુષ્ટિ થઈ છે. રાજ્યના જાહેર આરોગ્ય વિભાગે જણાવ્યું હતું કે ઓમિક્રોન સંક્રમિતોની સંખ્યા વધીને આઠ થઈ ગઈ છે. દેશમાં અત્યાર સુધીમાં કર્ણાટક, ગુજરાત, મહારાષ્ટ્ર અને દિલ્હીમાં કોરોનાના ઓમિક્રોન કેસ નોંધાયા છે. મહારાષ્ટ્ર ઉપરાંત કર્ણાટકમાં બે ઓમિક્રોન સંક્રમિત, ગુજરાત અને દિલ્હીમાં એક-એકની ઓળખ કરવામાં આવી છે.
