અમદાવાદના નારોલ વિસ્તારમાં ક્રાઈમ બ્રાંચે મોટી સફળતા મેળવીને લગભગ 400 કિલોગ્રામ ગાંજાનો જથ્થો ઝડપી લીધો છે. આ ગાંજો ડુંગળીના થેલાઓની આડમાં છુપાવીને મહારાષ્ટ્રથી અમદાવાદ લાવવામાં આવી રહ્યો હતો. પોલીસને મળેલી ચોક્કસ માહિતીના આધારે નારોલ વિસ્તારમાં એક વાહનને અટકાવી તપાસ હાથ ધરવામાં આવી હતી, જેમાંથી કરોડો રૂપિયાનું માદક પદાર્થ મળી આવ્યું હતું. આ કેસમાં મહારાષ્ટ્રના બે શખ્સોની ધરપકડ કરવામાં આવી છે.
પોલીસ તપાસમાં ખુલ્યું છે કે આરોપીઓએ ગાંજાને ડુંગળીના થેલાઓની નીચે કુશળતાપૂર્વક છુપાવ્યો હતો જેથી વાહન ચેકિંગ દરમિયાન કોઈને શંકા ન જાય. મહિન્દ્રા પીકઅપ વાહનમાં ગાંજાનો જથ્થો લાવવામાં આવ્યો હતો અને તેને સામાન્ય શાકભાજીની સપ્લાય તરીકે દર્શાવવાનો પ્રયાસ કરવામાં આવ્યો હતો.
અમદાવાદમાં (Ahmedabad) કોને આપવાનો હતો તે દિશામાં તપાસ
ઝડપાયેલા ગાંજાની બજાર કિંમત કરોડો રૂપિયાની હોવાનું અનુમાન છે. હાલ પોલીસ આ બાબતની તપાસ કરી રહી છે કે આ નશીલા પદાર્થો અમદાવાદમાં કોને પહોંચાડવાના હતા અને પાછળ કઈ ગેંગ અથવા નેટવર્ક સંડોાયેલું છે. અધિકારીઓ માને છે કે આ કેસમાં મોટા રેકેટનો હાથ હોઈ શકે છે અને અન્ય સંડોાયેલા વ્યક્તિઓ સુધી પહોંચવા માટે તપાસનો વ્યાપ વધારવામાં આવ્યો છે.
ક્રાઈમ બ્રાંચની કડક કાર્યવાહી
ક્રાઈમ બ્રાંચના અધિકારીઓએ જણાવ્યું કે શહેરમાં નશીલા પદાર્થોની હેરાફેરી સામે કડક કાર્યવાહી કરવામાં આવશે અને આવી ગેરકાયદેસર પ્રવૃત્તિઓને રોકવા માટે સતત ઓપરેશન હાથ ધરવામાં આવશે. પોલીસે નાગરિકોને પણ શંકાસ્પદ પ્રવૃત્તિઓ અંગે માહિતી આપવા અપીલ કરી છે જેથી શહેરને નશામુક્ત બનાવવા માટે સહયોગ મળી શકે.
આ પણ વાંચો:સુરત એરપોર્ટથી1.40 કરોડનો ગાંજો પકડાયો , ધરપકડ કરાયેલો ઝાફર 28 વખત બાંગ્લાદેશ જઈ આવ્યો
આ પણ વાંચો:સુરતમાં 22 કિલો ગાંજો પકડાયો, CRPF કોન્સ્ટેબલની ધરપકડ
