Ahmedabad News: ગુજરાતના ઇતિહાસમાં આ પહેલો એવો કેસ છે જ્યાં ટ્રેન અકસ્માતમાં ગર્ભસ્થ બાળકના મૃત્યુનું વળતર આપવામાં આવ્યું છે. ગુજરાત હાઈકોર્ટે (Gujarat High Court) સુરતના કીમ રેલ્વે સ્ટેશન પર ગર્ભમાં મૃત્યુ પામેલા બાળકના પરિવારને ₹8 લાખનું વળતર આપવાનો આદેશ આપ્યો છે. આ કેસમાં, કોર્ટે મૃત બાળકના પિતાને ₹8 લાખ અને ₹9% વ્યાજ ચૂકવવાનો આદેશ આપ્યો હતો. અગાઉ, રેલવે ટ્રિબ્યુનલે (Railway Tribunal) માતાના મૃત્યુ માટે ₹8 લાખ ચૂકવવાનો આદેશ આપ્યો હતો. 2018 માં, કીમ રેલ્વે સ્ટેશન પર એક ગર્ભવતી મહિલાનું મૃત્યુ થયું હતું.

Gujarat High Courtનો સીમાચિન્હરૂપ ચુકાદો

આ કેસના વકીલ નીતિન કાપડેએ સમજાવ્યું કે 14 એપ્રિલ, 2018 ના રોજ, મધ્યપ્રદેશના મૂળ રહેવાસી ઉષાબેન, તેમના પતિ, જયપ્રકાશ ઘાસીલાલ અને અન્ય બે સંબંધીઓ સાથે સુરતના કીમ રેલ્વે સ્ટેશનથી કાનપુર જવા માટે નીકળ્યા હતા.. તેઓ જયપ્રકાશ ઘાસીલાલના પિતરાઈ ભાઈના પુત્રના લગ્નમાં હાજરી આપવા માટે કાનપુર જઈ રહ્યા હતા. દરમિયાન, કીમ રેલ્વે સ્ટેશન પર MEMU ટ્રેનમાં ચઢવાનો પ્રયાસ કરતી વખતે, ઉષાબેનનું અકસ્માતમાં મૃત્યુ થયું. તે સમયે તે નવ મહિનાની ગર્ભવતી હતી; પોસ્ટમોર્ટમ રિપોર્ટમાં પુષ્ટિ મળી છે કે અકસ્માતમાં ગર્ભસ્થ બાળકનું પણ  મૃત્યુ થયું હતું. ત્યારબાદ, મૃતક મહિલાના પતિએ અમદાવાદમાં પશ્ચિમ રેલવે ટ્રિબ્યુનલમાં બે અલગ-અલગ વળતરના દાવા દાખલ કર્યા.

ટ્રિબ્યુનલે ફક્ત મહિલાના મૃત્યુ માટે વળતર મંજૂર કર્યું

તેમણે વધુમાં જણાવ્યું હતું કે રેલવે ટ્રિબ્યુનલે તેમની પત્નીના મૃત્યુ માટે માત્ર ₹8 લાખનું વળતર આપવાનો આદેશ આપ્યો હતો. જોકે, ગર્ભસ્થ બાળક માટે કોઈ વળતર આપવામાં આવ્યું ન હતું. તે સમયે, મૃત જન્મેલા બાળક માટે વળતર ન આપવાનું કારણ એ હતું કે ગર્ભને ‘માનવ’ તરીકે વર્ગીકૃત કરી શકાતું નથી. જોકે, સત્ય એ છે કે ગર્ભાવસ્થાના પાંચ મહિના પછી, ગર્ભને ‘વ્યક્તિ’ ગણવામાં આવે છે.

પરિવારે ટ્રિબ્યુનલના નિર્ણય સામે હાઇકોર્ટમાં અપીલ કરી. તેમણે કહ્યું કે જ્યારે પશ્ચિમ રેલવે ટ્રિબ્યુનલે ગર્ભસ્થ બાળક માટે વળતરનો દાવો ફગાવી દીધો, ત્યારે તેમણે ગુજરાત હાઇકોર્ટમાં અપીલ કરી. હાઇકોર્ટના ન્યાયાધીશ જે.સી. દોશીએ ઐતિહાસિક નિર્ણય સંભળાવ્યો, જેમાં ગર્ભસ્થ બાળકને સ્વતંત્ર ઓળખ આપવામાં આવી અને ₹8 લાખનું વળતર, 9% વ્યાજ સાથે, ત્રણ અઠવાડિયામાં ગર્ભસ્થ બાળકના પરિવારને ચૂકવવાનો આદેશ આપ્યો.

આ પણ વાંચો: નોકરી કે કામ પર જવા-આવવાનો સમય પણ રોજગારનો જ ભાગઃ ગુજરાત હાઈકોર્ટ

આ પણ વાંચો: ગુજરાત હાઈકોર્ટનો મોટો ચુકાદો: પત્નીને પ્રેમી સાથે જોતા હુમલો કરનાર પતિની 5 વર્ષની કેદની સજા યથાવત

આ પણ વાંચો: ગુજરાત હાઈકોર્ટનો ઐતિહાસિક નિર્ણય! 14 વર્ષની દુષ્કર્મ પીડિતાને 26 સપ્તાહનો ગર્ભપાત કરાવવાની મંજૂરી