La Nina El Nino Impact India: અસહ્ય ઉકળાટ અને કાળઝાળ ગરમીનો સામનો કરી રહેલા ગુજરાતના નાગરિકો અને ખાસ કરીને જગતના તાત એવા ખેડૂતો માટે હવામાન વિભાગ તરફથી ખુબ જ રાહતના સમાચાર આવ્યા છે. આ વર્ષે ચોમાસું સમયસર અને ધમાકેદાર રહેવાના મજબૂત સંકેતો મળી રહ્યા છે. હવામાન વિભાગના પૂર્વાનુમાન મુજબ, આ વર્ષે દેશ અને રાજ્યમાં ચોમાસાની સ્થિતિ એકદમ સાનુકૂળ રહેશે અને સાર્વત્રિક સારો વરસાદ થવાની પૂરેપૂરી સંભાવના છે.
આ તારીખે કેરળમાં બેસી જશે ચોમાસું
સામાન્ય રીતે ભારતમાં ચોમાસાની સત્તાવાર શરૂઆત કેરળના દરિયાકાંઠેથી થતી હોય છે. આ વર્ષે ચોમાસું તેના નિયત સમય કરતાં થોડું વહેલું શરૂ થાય તેવા સંકેતો છે. હવામાન વિભાગના અંદાજ પ્રમાણે, આગામી ૨૬ મેની આસપાસ ચોમાસું કેરળમાં દસ્તક આપી શકે છે. કેરળમાં વહેલા આગમનના પગલે ગુજરાતમાં પણ જૂન મહિનાના મધ્ય ભાગ સુધીમાં (15 જૂનની આસપાસ) નિયમિત ચોમાસું બેસી જવાની આશા રાખવામાં આવી રહી છે.
‘La Nina‘ અને ‘El Nino‘ની સંયુક્ત અસરથી ધમાકેદાર વરસાદ
હવામાન નિષ્ણાતોના જણાવ્યા અનુસાર, આ વર્ષે વાતાવરણમાં દરિયાઈ પ્રવાહોની મોટી અને હકારાત્મક અસર જોવા મળશે. આગામી દિવસોમાં ‘અલ નીનો’ સક્રિય થવાની શક્યતા છે, પરંતુ તેની સાથે જ ‘લા નીના’ની અસર પણ પાવરફુલ રહેશે. હવામાન વિજ્ઞાનમાં ‘લા નીના’ની સ્થિતિ ભારતીય ચોમાસા માટે હંમેશા આશીર્વાદરૂપ માનવામાં આવે છે. આ બંને વૈશ્વિક વાતાવરણીય ગતિવિધિઓની સંયુક્ત અસરને કારણે ચોમાસું એકદમ અનુકૂળ રહેશે, જે રાજ્યમાં સરેરાશ કરતાં વધુ કે સારો વરસાદ લાવવામાં મદદરૂપ બનશે.
ખેડૂતોમાં ખુશીનો માહોલ અને વાવણીની તૈયારીઓ
હવામાન વિભાગની આ પોઝિટિવ આગાહીને પગલે રાજ્યના ખેડૂતોમાં ભારે આનંદની લહેર જોવા મળી રહી છે. જો ચોમાસું ધારણા મુજબ સારું રહેશે તો ખરીફ પાક જેવા કે કપાસ, મગફળી અને ડાંગરના વાવેતરમાં મોટો ફાયદો થશે. આ સાથે જ આગામી દિવસોમાં પીવાના પાણી અને સિંચાઈની સમસ્યામાંથી પણ રાજ્યને મોટી રાહત મળશે.
