Patan News : ગુજરાતમાં સાયબર ગુનાખોરીના વધતા જતા કેસો વચ્ચે પાટણ (Patan) જિલ્લામાં એક વિશાળ સાયબર કૌભાંડ (Cyber Fraud)નો પર્દાફાશ થયો છે. તપાસ દરમિયાન આશરે ₹398 કરોડના ગેરકાયદે નાણાકીય વ્યવહારો સામે આવતા કાયદા અમલવારી એજન્સીઓમાં ખળભળાટ મચી ગયો છે.
પ્રાથમિક તપાસમાં સામે આવ્યું છે કે ગેરકાયદે નાણાકીય નેટવર્ક દ્વારા વિવિધ બેંકોના કુલ 13 ખાતાઓનો ઉપયોગ કરીને કરોડો રૂપિયાની હેરફેર કરવામાં આવી હતી. આ સમગ્ર કૌભાંડમાં ખાતાધારકોની વ્યક્તિગત માહિતી અને બેંકિંગ સંબંધિત દસ્તાવેજોનો દુરુપયોગ કરવામાં આવ્યો હોવાની શંકા વ્યક્ત કરવામાં આવી રહી છે.
તપાસ એજન્સીઓના જણાવ્યા અનુસાર, વચેટિયાઓ દ્વારા અનેક વ્યક્તિઓના નામે બેંક ખાતા ખોલાવવામાં આવ્યા હતા અથવા તેમની વિગતો મેળવી તેનો ગેરકાયદે ઉપયોગ કરવામાં આવ્યો હતો. આ ખાતાઓ મારફતે મોટી રકમના વ્યવહારો થતાં સમગ્ર નાણાકીય ચેઇન સક્રિય હોવાનું બહાર આવ્યું છે.
આ કેસમાં મુખ્ય સૂત્રધાર સહિત કુલ 20 વ્યક્તિઓ સામે ફરિયાદ નોંધવામાં આવી છે. અત્યાર સુધીમાં 14 આરોપીઓની અટકાયત કરવામાં આવી છે, જ્યારે અન્ય સંડોવાયેલા લોકોની શોધખોળ ચાલુ છે. તપાસ દરમિયાન ડિજિટલ પુરાવા, બેંક ટ્રાન્ઝેક્શનની વિગતો અને અન્ય મહત્વના દસ્તાવેજો જપ્ત કરવામાં આવ્યા હોવાનું જાણવા મળે છે.
સાયબર ક્રાઇમ (Cyber Crime)નિષ્ણાતોનું માનવું છે કે આવા કૌભાંડો સામાન્ય લોકો માટે ચેતવણીરૂપ છે. પોતાની બેંકિંગ વિગતો, ઓળખપત્રો અને વ્યક્તિગત દસ્તાવેજો અજાણ્યા લોકો સાથે શેર ન કરવા તેમજ શંકાસ્પદ નાણાકીય વ્યવહારો અંગે તરત જ સંબંધિત અધિકારીઓને જાણ કરવાની જરૂર છે.
પોલીસ અને તપાસ એજન્સીઓ સમગ્ર નેટવર્કના મૂળ સુધી પહોંચવા માટે વધુ તપાસ કરી રહી છે. આગામી દિવસોમાં આ કેસમાં વધુ ખુલાસા થવાની શક્યતા વ્યક્ત કરવામાં આવી રહી છે.
