Rajkot News:રાજકોટ (Rajkot) મહાનગરપાલિકા (MNC) ના રાજકીય વર્તુળોમાં ભાજપમાં આંતરિક જૂથવાદનો મુદ્દો ફરી એકવાર ચર્ચાનું કેન્દ્ર બન્યો છે. વિપક્ષી નેતા વશરામ સાગઠિયાએ ભાજપમાં જૂથવાદ, ખાસ કરીને મહિલા નેતાઓ સાથે થઈ રહેલા અન્યાયનો મુદ્દો ઉઠાવીને રાજકીય વાતાવરણ ગરમાવ્યું છે. દરમિયાન, શહેર ભાજપ પ્રમુખ માધવ દવેએ આ આરોપોને ફગાવી દીધા છે, જ્યારે કોંગ્રેસના નેતા ગાયત્રી વાઘેલાએ આ મુદ્દે ભાજપ પર નિશાન સાધ્યું છે.
ભાજપમાં ચાલી રહેલા આંતરિક ઝઘડા પર પ્રકાશ પાડતા, વિપક્ષી નેતા વશરામ સાગઠિયાએ કહ્યું, “શહેર ભાજપમાં વિવિધ જૂથવાદને કારણે મહિલા નેતાઓ અન્યાયનો સામનો કરી રહ્યા છે.” તેમણે ખાસ કરીને શાસક પક્ષના નેતા લીલુબેન જાધવનો ઉલ્લેખ કરતા કહ્યું, “પહેલાં એક મહિલા મેયરને નિશાન બનાવવામાં આવ્યા હતા,અને હવે લીલુબેન જાધવને પણ અન્યાયનો સામનો કરવો પડી રહ્યો છે.” સાગઠિયાએ ભાજપ નેતાઓ પર જૂથવાદ અને ખુલ્લેઆમ બોલવામાં અસમર્થતાને કારણે ઉત્પીડનનો આરોપ લગાવ્યો. તેમણે વધુમાં કહ્યું, “મહિલાઓના ગૌરવ અને સન્માનનું સન્માન કરવામાં આવી રહ્યું નથી, જે ચિંતાજનક છે.”
આ વિવાદના કેન્દ્રમાં રહેલા શાસક પક્ષના નેતા લીલુબેન જાધવે મીડિયા સમક્ષ ભાવનાત્મક રીતે પોતાનું દુઃખ વ્યક્ત કર્યું.તેમણે ગંભીર આરોપો લગાવ્યા કે ભાજપના આંતરિક વિવાદોમાં તેમને નિશાન બનાવવામાં આવી રહ્યા છે.લીલુબેનની ભાવનાત્મક અપીલથી રાજકીય વર્તુળોમાં ખળભળાટ મચી ગયો છે, અને વિપક્ષે આ મુદ્દે ભાજપ પર હુમલો વધુ તીવ્ર બનાવ્યો છે.
શહેર ભાજપ પ્રમુખ માધવ દવેએ આ આરોપોને નકારી કાઢતા કહ્યું કે, “ભાજપમાં ક્યારેય કોઈને નિશાન બનાવવામાં આવતું નથી. દરેક નેતાને સમાન મહત્વ આપવામાં આવે છે.” તેમણે લીલુબેન જાધવ સાથેના મુદ્દાને સ્પષ્ટ કરતા કહ્યું કે, “લીલુબેન સાથેની ચર્ચામાં તેમના મુદ્દાઓ ઉકેલાઈ ગયા છે.” જોકે, અમિત શાહને લખેલા પત્ર અંગે દવેએ કહ્યું કે, “મને આ બાબતની કોઈ જાણકારી નથી. શહેર ભાજપ પ્રમુખ તરીકે, મને આ અંગે કોઈ જાણ કરવામાં આવી નથી.”
કોંગ્રેસ નેતા ગાયત્રીબા વાઘેલાએ આ મુદ્દે ભાજપ પર નિશાન સાધ્યું. તેમણે કહ્યું કે, “ચૂંટાયેલા મહિલા નેતાઓનું અપમાન કરવું ભાજપ માટે કંઈ નવું નથી. તાજેતરમાં, મહિલાઓને લાત મારવાનો એક વીડિયો વાયરલ થયો હતો, અને અમદાવાદના એક ધારાસભ્યનો પણ આવો જ એક વીડિયો સામે આવ્યો હતો.” તેમણે ઉમેર્યું, “મેયર અને નેતાઓનું અપમાન થઈ રહ્યું છે, જે શરમજનક છે. જ્યારે મહિલાઓનું અપમાન થાય છે, ત્યારે અન્ય અધિકારીઓ નિષ્ક્રિય રહે છે. મહિલાઓના આત્મસન્માનથી વધુ મહત્વનું કંઈ નથી.” આ વિવાદે રાજકોટમાં રાજકીય વાતાવરણ ગરમાવ્યું છે. ભાજપમાં આંતરિક જૂથવાદનો મુદ્દો ફરી એકવાર ચર્ચામાં આવ્યો છે.
આ પણ વાંચો:રાજકોટ ઇન્ટરનેશનલ એરપોર્ટ પર શ્વાનોનું શયનાસન…!!
આ પણ વાંચો:રાજકોટ શહેરના 150 ફૂટ રીંગ રોડ પર અકસ્માતની ઘટના, બેના મોત
આ પણ વાંચો:રાજકોટ AIIMSમાં નવા એક્ઝિક્યુટિવ ડિરેક્ટર તરીકે ડૉ. એલ.એન. દોરૈરાજનની નિમણૂક
