Chicago Mass Shooting Updates: અમેરિકામાં જાહેરમાં થતા ફાયરિંગની ઘટનાઓ અટકવાનું નામ નથી લઈ રહી. શિકાગો(Chicago) શહેરમાં શુક્રવારે મોડી રાત્રે એક હૃદયકંપાવનારી ઘટના સામે આવી છે, જ્યાં અજાણ્યા હુમલાખોરોએ રસ્તા પર એકઠી થયેલી ભીડ પર અંધાધૂંધ ગોળીબાર કર્યો હતો. આ ભયાનક હુમલામાં મહિલાઓ અને એક સગીર સહિત કુલ 12 લોકો ગંભીર રીતે ઘાયલ થયા છે, જેને પગલે સમગ્ર વિસ્તારમાં ભારે અફરાતફરી અને દહેશતનો માહોલ સર્જાયો છે.
Chicago માં ભીડને ટાર્ગેટ બનાવી વરસાવી ગોળીઓ
પોલીસના સત્તાવાર અહેવાલ મુજબ, શુક્રવારે (Chicago) રાત્રે એક શંકાસ્પદ એસયુવી (SUV) કાર રસ્તા પર ઉભેલા લોકોની ભીડ પાસે આવીને અચાનક ઉભી રહી હતી. કાર ઉભી રહેતાની સાથે જ તેમાંથી બે સશસ્ત્ર હુમલાખોરો બહાર આવ્યા હતા અને કંઈપણ વિચાર્યા વગર અંધાધૂંધ ફાયરિંગ શરૂ કરી દીધું હતું. હુમલો એટલો ઝડપી હતો કે લોકોને ભાગવાનો મોકો પણ ન મળ્યો.
આ અંધાધૂંધ ગોળીબારમાં 8 પુરુષો અને 4 મહિલાઓ લોહીલુહાણ થયા છે, જેમની ઉંમર 17 થી 47 વર્ષની વચ્ચે છે. ઘટનાની જાણ થતાં જ પોલીસ અને એમ્બ્યુલન્સનો કાફલો ઘટનાસ્થળે દોડી ગયો હતો અને ઘાયલોને જુદી-જુદી હોસ્પિટલોમાં ખસેડ્યા હતા. તબીબોના જણાવ્યા મુજબ, ઘાયલો પૈકી 2 પુરુષોની સ્થિતિ અત્યંત ગંભીર છે. પોલીસે સીસીટીવી (CCTV) ના આધારે હુમલાખોરોને પકડવા તપાસના ચક્રો ગતિમાન કર્યા છે, જોકે હુમલાનું કારણ હજુ અકબંધ છે.
